भांगरभूंय | प्रतिनिधी
पणजीः सरकारी कर्मचाऱ्यांची तांक वाडोवपा खातीर केंद्र सरकारान मिशन कर्मयोगी उपक्रम सुरू केला. हाचे खाला सगल्या राज्य सरकाराच्या अधिकाऱ्यांनी आनी कर्मचाऱ्यांनी 15 जून मेरेन आयजीओटी – कर्मयोगी पोर्टलाचेर नोंदणी करची पडटली. कर्मचाऱ्यांक दर वर्सा उण्यांत उणें तीन अभ्यासक्रम आनी ह्या प्लॅटफॉर्मांतल्यान स वरां प्रशिक्षण पुराय करचें पडटलें. ही कर्मचाऱ्यांच्या वर्सुकी मूल्यांकन अहवालांत (एपीएआर) नोंद जातली.
कार्मीक खात्याचे अवर सचीव दुर्गा किनळेकार हांणी जारी केल्ल्या परिपत्रका प्रमाण, केंद्र सरकारान गतीशील प्रशासना खातीर क्षमता निर्माण करपाक चालना दिवपा खातीर नागरी सेवा क्षमता निर्माण करपा खातीर राष्ट्रीय कार्यावळ (एनपीसीएससीबी) – मिशन कर्मयोगी उपक्रम सुरू केला. सरकारी कर्मचाऱ्यांचें गिन्यान आनी कुशळटाय वाडोवपा खातीर आनी तांकां वेगवेगळ्या प्रकारचीं शिकपाचीं साधनां दिवपा खातीर आयजीओटी कर्मयोगी प्लॅटफॉर्माचेर वेगवेगळे अभ्यासक्रम उपलब्ध केल्यात.
15 जून पयलीं सगल्या कर्मचाऱ्यांनी कर्मयोगी प्लॅटफॉर्माचेर नोंदणी करपाची जापसालदारकी विभाग मुखेल्यांचेर आसतली. खात्याच्या मुखेल्यांनी क्षमता निर्माण करपाची येवजण तयार करची. तशेंच कर्मचाऱ्यांनी कर्मयोगी पोर्टलाचेर उपलब्ध आशिल्ले अभ्यासक्रम पुराय करपाची खात्री करची. सगळ्या राज्य सरकाराच्या अधिकाऱ्यांनी/कर्मचाऱ्यांनी दर वर्सा उण्यांत उणे तीन अभ्यासक्रम आनी उण्यांत उणें स वरां ह्या प्लॅटफॉर्माचेर प्रशिक्षण पुराय करचें पडटा. हे अभ्यासक्रम पुराय जाल्ल्याची नोंद संबंदीत कर्मचाऱ्याच्या वर्सुकीं कामगिरी मूल्यांकन अहवालांत (एपीएआर) जातली अशें परिपत्रकांत म्हणलां.
कर्मयोगी भारत हें एक खाशेल्या उद्देशाचें वाहन (एसपीव्ही). कंपनी कायदो, 2013 च्या कलम 8 खाला जानेवारी 2022 वर्सा स्थापन जाल्ली. ही कंपनी 100 टक्के सरकारी मालकीची नफाे विरयत कंपनी म्हणून नोंद जाल्या. ही कंपनी कर्मयोगी प्लॅटफॉर्माचे वेवस्थापन पळयता. ह्या प्लॅटफॉर्मांतल्यान सरकारी अधिकारी खंयच्याय वेळार, खंयच्याय सुवातेर, खंयच्याय साधना वयल्यान शिक्षण घेवन आपली तांक वाडोवपाक शकतात. हो प्लॅटफॉर्म तांकां मार्गदर्शन करून करिअर वेवस्थापनांत मजत करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
