भांगरभूंय | प्रतिनिधी
पणजीः गोंयांतल्या सगल्या सरकारी कर्मचार्यांनी गळ्यांत वळखपत्रां घालप आतां सक्तीचें केलां. तशेंच गळ्यांत वळखपत्र घातलें ना जाल्यार ती वायट वागणूक अशे मानतले आनी दोशी कर्मचार्यांचेर केंद्रीय नागरी सेवा (आचार) नियम, १९६४ खाला शिस्तभंगाची कारवाय करतले. हे विशींचे आदेश जारी केल्यात.
आदेशांत म्हणलां, ‘ड्युटी’चेर आसतना सरकारी कर्मचार्यांनी आपलें वळखपत्र घालप गरजेचें. कार्यालयांत, ‘ड्युटी’च्या निमतान भायर वतना वळखपत्र गळ्यांत आसप गरजेचें. हे विशीं जायते फावटीं सुचवण्यो दिवन लेगीत त्या पाळिनात हें दिसून आयलां. हाका लागून वळखपत्र दिवपाचो हेत फळादीक जायना. वळखपत्र हें कार्यालयीन शिस्त, लोकांक सरकारी कर्मचार्यांची वळख पटची आनी सरकारी कार्यालयांत सुरक्षा वेवस्था घटमूट करपा खातीर दितात. मात, कर्मचारी सहकार्य करिनाशिल्ल्याचें दिसून येता.
ह्यान फुडें हें सोसून घेवचे ना, सरकारी कार्यालयांतले सगले मुखेली, महामंडळांचे मुखेली आनी सरकारी कार्यालयां कडेन संबंधितांनी कर्मचारी वळखपत्र गळ्यांत घालतात काय ना हें पळोवचें. ना जाल्यार तांचेर कारवाय करची, अशें आदेशांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
