भांगरभूंय | प्रतिनिधी
नवी दिल्ली, खबरां संस्था: राष्ट्रीय स्वयंसेवक संघ म्हणल्यार आरएसएसाचे कसलेच कार्यावळींत वा शाखेर वचपाक सरकारी कर्मचाऱ्यांक बंदी आशिल्ली. १९६६ त तेन्नाची प्रधानमंत्री इंदिरा गांधी हांणी तसो निर्णय घेतिल्लो. ५८ वर्सां आदली ही बंदी आतां एनडीए सरकारान काडल्या. ९ जुलयाक ते विशींची अधिसुचोवणी जारी केल्या. भाजपाच्या सोशल मिडिया सेलाचे मुखेली अमित मालवीय हांणी तांच्या एक्स अकावंटाचेर हे विशींचो सरकारी आदेश शॅर केला. आतां सरकारी कर्मचाऱ्यांक काम सुट्टकच, सुटये दीस वा रजा घेवन संघाचे शाखेचेर वा कार्यावळीक वचपाक मेळटलें.
कॉंग्रेसीची सरकाराचेर टिका
सरकारी कर्मचार्यांक स दसकां सावन आशिल्ले हे निर्बंध काडिल्ल्यान कॉंग्रेसीन सरकाराचेर टिका केल्या. हे विशीं कॉंग्रेसीचे महासचिव जयराम रमेश हांणी एक्सचेर पोस्ट घाल्या. तातूंत तांणी म्हणलां, ‘१९४८ त महात्मा गांधीजी हांच्या खुना उपरांत लोहपुरुस सरदार पटेल हांणी संघाचेर बंदी हाडिल्ली. उपरांत बरे वागणुकेच्या आस्वासना उपरांत प्रधानमंत्री पं. नेहरु हांणी ती बंदी काडिल्ली. संघान केन्नाच नागपुरांत राष्ट्रध्वज आशिल्लो तिरंगो बावटो हुबोवंक ना. संघांत वचपाक सरकारी कर्मचार्यांचेर १९६६ त निर्बंध हाडिल्ले. ४ जून २०२४ दिसा संघ आनी नॉन-बायोलॉजिकल प्रधानमंत्री हांचे मदीं संघर्श निर्माण जाला. हाका लागून ९ जुलयाक ५८ वर्सां आदीं सावन आशिल्ले निर्बंध काडल्यात. हे निर्बंध अटलबिहारी वाजपेयी प्रधानमंत्री आसतनाय लागू आशिल्ले.’
केंद्राच्या आदेशांत कितें आसा?
केंद्र सरकाराच्या कार्मिक खात्यान जारी केल्ल्या ह्या आदेशा प्रमाण, सरकारी कर्मचार्यांच्या सहभागाचेर मर्यादा घाल्ले कार्यावळींच्या वळेरेंतल्यान राष्ट्रीय स्वयंसेवक संघाचें नांव काडून उडयलां. देखून आतां सरकारी कर्मचार्यांक राष्ट्रीय स्वयंसेवक संघाच्या कार्यावळींनी वांटो घेवंक मेळटलो. ३० नोव्हेंबर १९६६, २५ जुलय १९७० आनी २८ ऑक्टोबर १९८० ह्या दिसा जारी केल्ल्या सरकारी आदेशांचो ह्या आदेशांत उल्लेख केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
