भांगरभूंय | प्रतिनिधी
भांगरभूंय । प्रतिनिधी
म्हापशेंः सरकारी नोकऱ्यांत पारदर्शकताय राखतले अशें सांगपी राज्य सरकार रोजगार मेळावो आपल्या पक्षाचे कार्यावळी प्रमाण घेवन नोकरेक नेमणूक केल्ल्याची पत्रां दिता ही व्हड शोकांतिका आसा. कर्मचारी भरती खऱ्या अर्थान कर्मचारी निवड आयोगा वतीन जावपाक जाय. तशेंच ती फकत गुणवत्तेचेर जावपाक जाय अशें काँग्रेस पक्षाचो फुडारी एल्वीस गोम्स हांणी सांगलें. शुक्राराक म्हापश्यांत पक्षाच्या कार्यालयांत आयोजीत केल्ले पत्रकार परिशदेंत ते उलयताले. ह्या वेळार विजय भिके, उत्तर गोंय काँग्रेस जिल्हो अध्यक्ष विरेंद्र शिरोडकार, अतुल नायक आनी जॉन नाझारेथ आशिल्ले.
सरकारी नोकरे खातीर पयशे दिवपाची गरज ना अशें सागून लोकांक ते खातीर पयशे दिवचेच पडटले असो ल्हिपिल्लो संदेश पावपाचें काम राज्य सरकारान केलां. बिरेस्तार रोजगार मेळाव्यांतल्यान तरणाट्यांक नोकरीची नियुक्तीं पत्रां दिवपाची कार्यावळ सरकारी आशिल्ली. मात थंय भाजपाचो गोंय राज्य अध्यक्ष हाजीर आशिल्लो. ह्या तरणाट्यांक पगार सरकारी तिजोरेंतल्यान मेळटलो मात ह्यो नोकऱ्यो भाजपान दिल्यात अशें हे कार्यावळींतल्यान दाखोवपाचें काम सरकारान केला अशी टिका गोम्स हांणी केली.
मुदलांत नोकर भरती तशेंच सरकाराच्या सगल्या कामकाजांत पारदर्शकताय जाय. भाजपा वतीन नोकर भरती मेळावो हो खटाटोप फकत व्होट बँके खातीर चलयला. फुडाराक सरकारी नोकरेक रुजू जावपी तरणाटे भाजपाचे कामगार आसतले, काय सरकाराचे, हे विशीं दुबाव उप्रासतलो अशें तांणी सांगलें. नोकर भरती मेळाव्यांतल्यान सरकार जायत्या जाणांक रोजगार मेळोवन दिल्ल्याचो दावो करता. मात सत वेगळेंच आसा. आमी म्हायती हक्क कायद्या वरवीं म्हायती मागयल्या आनी तातूंतल्यान सरकाराचो खरो चेरो काँग्रेस पक्ष लोकां सामकार आमी हाडटलो अशें विजय भिके हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
