भांगरभूंय | प्रतिनिधी
पणजी: सरकारी कर्मचारी भरती करपाचे घोटाळे आडावपा खातीर कर्मचारी भरती आयोग स्थापन केलां. आतां सावन भरती प्रक्रिया फकत कर्मचारी भरती आयोगा वरवीं जातली. ताका लागून सरकारी नोकर्यांचें हांयस दाखोवन पयशे मागपाचेर नागरिकांनी विस्वास दवरचो न्हय अशें आयज जाल्ले राज्य मंत्रीमंडळाचे बसके उपरांत मुख्यमंत्री डॉ. प्रमोद सावंत हांणी म्हणलें.
सरकारी नोकरी दिवपाचें हांयस दाखोवन सामान्य लोकांक कोट्यांनी रुपयांची तोपी घातिल्ल्या कितल्याशाच जाणांक फाटल्या कांय दिसांनी अटक केल्या. हे फाटभूंयेर अशा लोकां आड खर कारवाय करपाचें उतर मुख्यमंत्र्यांनी ह्या वेळार दिलें.
ज्या नोकर्यां खातीर सरकारान जायरात करूंक ना अश्या नोकर्यां खातीरूय लोक पयशे दितात. हें चिंता करपा सारकें आसा अशें ताञणी म्हणलें. ह्यान फुडें योग्यताय आनी गुणवत्तेचेर नोकर्यो दितले. हाका लागून बेगीनूच आयोगा वतीन नोकर भरतीच्यो जायराती दितले अशेंय तांणी मुखार म्हणलें.
फाटल्या कांय दिसांनी नोकर्यांचें हांयस दाखोवन फटींगपणां केल्ल्याचीं विंगड विंगड प्रकरणां मुखार आयलीं. हातूंत पुजा नायक, अजित सतरकार हांचो आसपाव आशिल्लें एक प्रकरण, पशूवैजकी डॉक्टर प्रकाश मुकुंद राणेचें दुसरें, सागर नायक- सुनीता शशिकांत पाऊसकार आनी दीपश्री सावंत- गांवस ह्या तिगांचो आसपाव आशिल्लें एक प्रकरण उक्ताडार आयलां. पुलीस हे विशीं कारवाय करतात. कालूच फटोवपाच्या एका प्रकरणांत जामीन मेळ्ळे उपरांत सांजेवेळार दिवचल पुलिसांनी पुजा नायक हिका परत अटक केली.
विद्यार्थ्यांची दोळ्यांची तपासणी करतले
स्वयंपूर्ण गोंय मोहिमे खाला पयली ते बारावी मेरेनच्या ३३ हजार विद्यार्थ्यांच्या दोळ्यांची तपासणी करतले. हातूंतले वट्ट १२ हजार विद्यार्थ्यांक सरकारा कडल्यान फुकट वक्लां वाट्टले. जाल्यार ८ ते १० विद्यार्थ्यांच्या दोळ्यांचेर शस्त्रक्रियाय करतले, अशी म्हायती मुख्यमंत्र्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
