भांगरभूंय | प्रतिनिधी
कार्मीक खात्याचो आदेश
पणजीः सरकारी कचेऱ्यांनी वाडदिसाच्यो पार्टी, निरोप पार्ट्यो आनी हेर खंयच्याय प्रकारच्यो पार्ट्यो आनी खेळ आयोजीत करचे न्हय अशी शिटकावणी कार्मीक खात्यान दिल्या. हे संबंदी हालींच एक परिपत्रक जारी जालां. कर्मचाऱ्यांनी शिश्टाचार, शिस्त आनी वेळ पाळचो हे खातीर विभाग मुखेल्यांची जापसालदारकी आसतली. नेमाचें उल्लंघन केल्यार खात्याच्या मुखेल्यां आड दंडात्मक कारवाय करपाची शिटकावणी दिल्या.
हे विशीं परिपत्रकांत सरकारी कर्मचारी कचेऱ्याच्या वेळार दीर्घकाळ चलपी वाडदिसाच्यो पार्टी, निरोप पार्ट्यो, खेळ वा खंयच्याय खाजगी कार्यावळींनी अनधिकृत कार्यावळींनी वांटो घेत आसतात. ही गजाल हालींच कार्मीक खात्याचे नदरेक हाडल्या. अशा घडणुकांक लागून कामांत आडमेळीं येता. उत्पादकतायेंत उणाव जाता आनी सरकारी कचेऱ्यांनी कामाक येवपी नागरिकांक असुविधेक समकार वच्चे पडटा.
अशा वैयक्तीक कार्यावळींनी ऑफिसाच्या वेळाचो आनी सुवातेचो गैरवापर जाता. सरकारी सेवकांचें अशें आचरण सरकारी सेवकाक अयोग्य आसा. अशा वागणुकेचेर शिस्तबद्ध कारवाय करपाक जाय. सीसीएस (आचार) नेम, 1964 च्या नेम 3 च्या उपनेम (1) प्रमाण दरेका सरकारी सेवकान सदांच प्रामाणीकपण राखप आनी कर्तव्याची निश्ठा दवरची पडटा. तशेंच ताणें सरकारी सेवकाक अयोग्य दिसपा सारकें कसलेंच कृत्य करचें न्हय.
सगल्या सरकारी खात्यांनी आनी कर्मचाऱ्यांनी वयल्या नेमाचो खरपणान पाळो दिवचो. कचेरेची सुवात आनी वेळ फक्त प्रशासकी काम आनी भौशीक सेवे खातीर वापरतात हाची खात्री करची. सरकारी सेवकांनी आपलीं अधिकृत कामां करतना योग्य शिश्टाचार, शिस्त आनी वेळार पाळो दिवचो हाची खात्री सगल्या खात्याच्या मुखेल्यांनी करची. नाजाल्यार संबंदीत खात्याच्या मुखेल्यां आड दंडात्मक कारवाय सुरू करतले अशें परिपत्रकांत स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
