भांगरभूंय | प्रतिनिधी
विधानसभेचे अर्थसंकल्पी अधिवेशन येत्या सोमार सावन सुरू जाता. अर्थसंकल्प मांडपाचो दीस आजून निश्चित जावंक ना. तरी तो ह्याच अधिवेशनांत सादर जातलो, अशें मुख्यमंत्री डाॅ. प्रमोद सावंत हांणी स्पश्ट केलां. अर्थसंकल्पा वेली चर्चा मात फुडल्या अधिवेशनात जातली. फांटले बरेच म्हयने अर्थसंकल्पाची तयारी सुरू आसा. शुल्क वाडय नासताना स्वंयपुर्णतायेचेर भर दिवपी अर्थसंकल्प आसतलो, अशे सुतोवाच डाॅ. सावंत हांणी केलां. पयली भशेन अंदुंच्या अर्थसंकल्पात येवजण्यो तशेच घोशणांचो पावस आसतलो. अधिवेशनाच्या दुसरे वा तिसरे दिसा अर्थसंकल्प सादर जावपाची शक्यता आसा.
अंदुच्या अर्थसंकल्पा विशीं लोकांक उमळशीक आसा. तशीच सरकार आनी विरोधक हांचे कामगिरी विशीं सुद्धां. सरकार पक्षाच्या तुळेत विरोधकांचें संख्याबळ बरेंच उणें आसा. तरीय फांटल्या अधिवेशनांत नव्या आमदारांची कामगिरी बरी जाल्ली. युरी, वेंझी, विरेश बोरकार हे लोकांचे प्रस्न बरे पद्दतीन सभाघरात मांडटा. म्हादय आसूं वा कला अकादमी, विजयान सेगीतपणान सरकाराचेर हल्लो करप सुरूच दवरलां. विजयाच्या आक्रमकपणाक लागून अधिवेशनात जान येता. विरोधकांचें अस्तित्व जाणवता. हे खेपो सुद्धा ते सगळ्या मंत्र्यांक धारेर धरतले, अशी आस्त आसा. फांटलें अधिवेशन म्हादयच्या प्रस्नाक लागून गाजलें. म्हादयचेर चर्चा करपाची मागणी करून पयलेच दिसा विरोधकांनी सभात्याग केल्लो. म्हादयचेर चर्चा जावन सभाघर समिती स्थापन जाल्ली. आतां सुद्धा म्हादयचो प्रस्न आसाच. कळसा- भांडुरा प्रकल्पा खातीर डीपीआराक दिल्ली मान्यताय केंद्रान फांटी घेवंक ना. कळसा- भांडुरा प्रकल्पा खातीर कर्नाटकान अर्थसंकल्पात भरीव तजवीज केल्या. हाका लागून म्हादयचो प्रस्न अधिवेशनांत येतलोच. मात फांटल्या अधिवेशना सारखी ताचेर चर्चा जावची ना. रानां वाठारांत लागिल्लो उजो, मात अधिवेशनात पेट्टलो.
मार्चाच्या सुरवेक सगळ्या रानांनी उजो लागलो. तो पालोवपाक सरकाराक नौदळ तशेच हवाई दळाची मजत घेवची पडली. हेलिकॉप्टरांनी उदकाची फवारणी जाले उपरांत उजो नियंत्रणात आयलो. पूण ताका बरेच दीस लागले. दोन सप्तक भर रानांनी उजो पेट्टालो. उजो कसो लागलो? तो कसो पातळ्ळो? हाचीं कारणां आजून स्पश्ट जावंक नात. चवकशे उपरांत उज्याचेर सविस्तर अहवाल तयार जातलो. चवकशी सुरू आसा, अशें राना मंत्री विश्वजीत राणे हांणी स्पश्ट केलां. उज्याचीं कारणां तशेच उपाय येवजणेंचो मुद्दो विरोधक उपस्थित करतले. हाचे वेल्यान सभाघरांत बोवाळ जावपाची शक्यताय आसा. रानांतल्या उज्या उपरांत उदकाचो उणाव हो एक मुद्दो आसतलो. पेडणें म्हाला सयत सांतआंद्रे मतदारसंघात फेब्रुवारी सावन उदकाचो उणाव जाणवपाक लागला. उदकाच्या उणावाक लागून सांत आंद्रे मतदारसंघांतल्या लोकांनी भौशिक बांदकाम खात्याच्या कार्यालयाचेर मोर्चो व्हेल्लो. उदकाच्या प्रस्नाचेर आरजीचे आमदार बोरकार हे बरेच आक्रमक आसा. अधिवेशनात ते उदकाचो प्रस्न निश्चितपणान मांडटलें. सत्तरीत सुद्धा उदकाचो उणाव आसा. टँकर माफियांक लागून उदकाचो उणाव जाता. उदकाच्या उणावा फाटल्यान शडयंत्र आसा, असो आरोप मंत्री राणे हांणी केल्लो. गोंयात उदकाचो उणाव ना. तरी लोकां मेरेन उदक पावपाक आडमेळी येतात. मार्च म्हयनो आयलो काय दोंगराळ वाठाराक उदक पाव ना. दर वर्साचें हें रडगाणे. पर्वरेंतली उदकाची समस्या आतां सुटावी जाल्या. हेर वाठारांत मात उदकाचो उणाव कायम आसा. सभाघरात उदकाच्या उणावाचेर नेटाची चर्चा जातली.
म्हादय, उदकाचो उणाव, राना वाठाराक लागिल्लो उजो हे काय म्हत्वाचे विशय. वाडटे अपघात आनी येरादारीची कोयंडी ह्यो सुद्धा गंभीर समस्या. फांटली बरीच वर्सा जुवारी पुलाच्या कामाक लागून कुठ्ठाळीत सेगीत येरादारीची कोयंडी जाताली. जुवारी पुलाची एक लेन उक्ती जाल्ल्यान कुठ्ठाळेंतल्या येरादारीचो प्रस्न सुटला. अटल सेतू बंद आशिल्ले कारणान मेरशी जंक्शन तशेच पर्वरी ट्रॅफीक जॅम जालें. हाका लागून प्रवाशांचे बरेच हाल जाले. पणजेंत स्मार्ट सीटीची कामां फांटल्या दोन म्हयन्यां सावन सुरू आसात. हाका लागून पणजेत सदाच येरादारीची कोयंडी जाता. रस्ते सगळे धुल्लान माखल्यात. सांत इनेज जंक्शन, कांपाल, मिरामार, चर्च चौक हांगां सकाळी आनी सांजे वाहन चालकांचे हाल जातात. येरादारी पुलिसां कडेन येरादारीचे वेवस्थापन सारकें जायना. नोकरी तशेच हेर कामां निमतान पणजे सगळ्या वाठारांतले लोक येतात. हाका लागून स्मार्ट सीटीच्या कामाचो सगळ्या लोकांक त्रास जाता. स्मार्ट सीटीच्या कामा भशेन अपघातांचो आकडो वाडत आसा. तरेकवार येवजण्यो आनी उपाय सरकार घेत आसले तरी अपघातांचो आंकडो उणो जावंक ना.
अधिवेशन फकत चार दिसांचें आसतलें. राज्यांतल्यो समस्या बऱ्योच आसात. सगळ्यो समस्या मांडपाक चार दीस पुराय जावचे ना. काँग्रेस, गोवा फॉरवर्ड, आप आनी आरजी हे सध्या विरोधांत आसात. विरोधी आमदारांचें संख्याबळ फकत सात आसा. सत्ताधाऱ्यां कडेन बत्तीस आमदार आसा. अर्थसंकल्पाचेर चर्चा जावची ना. हाका लागून प्रस्नोत्तर तशेच लक्षवेधी सुचोवणेचेर उलोवपाची संद आमदारांक मेळटली. वेळेचो कोण कसो वापर करता, हाचेर आमदाराचें येस निंबून आसतलें. युनायटेड ओपोजिशन हो प्रयोग दर अधिवेशनात आसता. हे खेपेय तो जातलो. युरी आलेमाव, एल्टन डिकोस्ता, कार्लोस फेरेरा, वेंझी व्हिएगस, विरेश बोरकार हे पयलेच खेपो विधानसभेत पावल्यात. नव्या आमदारांची कामगिरी पोरस आमदारां परस सरस आशिल्ली. दिगंबर कामत, मायकल लोबो हांच्या प्रवेशाक लागून सत्ताधाऱ्यांची ताकद वाडल्या. कोणे खंयच्या विशयाचेर आनी कितलो वेळ उलोवचें ताचें वेवस्थापन सारकें जावपाक जाय. स्मार्ट सीटीचीं कामां, येरादारीची कोयंडी, उदकाचो उणाव, रानांतलो उजो ह्या प्रस्नांक सरकाराक जाप दिवची पडटली. विरोधकां सयत सरकाराची सुद्दा अधिवेशन म्हणजे परिक्षा आसतली.
गणेश जावडेकार
9860610762
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
