भांगरभूंय | प्रतिनिधी
पेडणें: दरेक सरकार वेगळ्यावेगळ्या वेवसायिकांक लुकसाण भरपाय वा वेगळेवेगळे उपक्रम राबोवन मजत करीत आसता. पूण परंपरीक पद्दतीन शेंकड्यांनी वर्सां सावन मिठाचो वेवसाय करप्यांक सरकार कसलीच मजत करिना. सरकारान परंपरीक पद्दतीन मिठाचो वेवसाय करप्यांक मजत करपा बदला न्हंयचे देगेर बंधारे बांदून वेवसायाक प्राधान्य दिवचें अशी मागणी आगरवाड्या वेले परंपरीक पद्दतीन मीठ वेवसाय करपी प्रवीण बगळी हांणी केली.
आगरवाड्यार व्हड संख्येन मिठागर आशिल्ल्यान ह्या गांवाक आगरवाडो अशें नांव पडलां. परंपरीक पद्दतीन धव्या रंगाचें मुठ फक्त आगरवाडो चोपडें पंचायत वाठारांतल्या मिठागरांत उपलब्ध जायत आसता. ह्या मिठाक गोंयांत व्हड प्रमाणांत मागणी आसता. ही मागणी लक्षांत घेवन परंपरीक पद्दतीन वेवसायीक मिठाचो वेवसाय करतात. मीठ वेवसाय करीत आसतना वातावरण म्हत्वाचें आसता.
प्रवीण बगळी हांणी म्हायती दितना सांगलें, सरकार वेगळ्योवेगळ्यो येवजण्यो वेवसायिकां खातीर चालीक लायता. ताचो लाव खूबशे जाण घेतात. पूण मिठाचो वेवसाय करप्यांक आयज मेरेन कसलीच येवजण लागू केल्ली ना. सरकाराक आमी दोश दिनात वा मागणीय करिनात. पूण सरकाराक जर मीठ वेवसायिकांक प्रोत्साहन दिवपाचें आसत जाल्यार शापोरा न्हंयचे देगेर जे फुटिल्ले बंधारे आसात ताचें पक्के बांदकाम करून तांकां वेवस्थींत दारां लावन आमकां दीत जाल्यार ह्या वेवसायाक बरे दीस येतले.
नोव्हेंबर म्हयनो सुरू जालो की मिठागरांत जें उदक सांचता तें उदक उसपुपाचें काम करतात. दोन म्हयने काम करीत आसतना मिठागरांत जी चौकोनी सुवात आसता ती माती मोव करून घेवन, शिमो बांदप अशीं कामां जातात. जानेवारीच्या पयल्या सप्तकांत मीठ उत्पादन करपाक सुरवात करतात. अंदूंय कामाक सुरवात जाल्या. पावस निमाणे मेरेन पडिल्ल्यान आनी वातावरण इबाडिल्ल्यान मिठाचें उत्पादन करतना अडचणी येत आसात. जानेवारीच्या निमाण्या सप्तकांत तरी मीठ ह्या मिठागरांतल्यान काडटलों अशें बगळी हांणी सांगलें.
पोरूं वर्सा व्हड प्रमाणांत ह्या मिठागरांतल्यान आपल्याक मीठ मेळिल्लें. अंदूंय आपले कडेन मिठाचो सांठो आसा. जर चड पावस बेगीन पडत जाल्यार मिठाक दर व्हड प्रमाणांत येवंक शकता अशेंय प्रवीण बगळी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
