भांगरभूंय | प्रतिनिधी
संवसारीक पांवड्यार पर्यटनाचे नदरेन गोंयाक खाशेलें म्हत्व मेळ्ळां. गोंयांतल्या जायत्या सोबीतकाय निर्मितींतल्यान, दर्यादेगांनी, चर्ची, देवमंदिरांतल्यान पर्यटन उदरगतीचे नदरेन गोंयाक खाशेलें म्हत्व दिलां. ही परंपरा खूब वर्सां सावन चलत आयल्या. गोंयच्या लोकां मदीं पर्यटन संदर्भाचो आदर आशिल्ल्यान आयज लेगीत गोंयांत व्हड प्रमाणांत पर्यटकांचो ओघ चालूच आसा. पूण, हालींच्या काळांत पर्यटकांक लुटपाचे प्रकार व्हड प्रमाणांत वाडपाक लागल्यात. पर्यटकांक रस्त्यार खोंट मारप, दुरुपेग करप, बायलांक त्रास दिवप, लुटप, तांचो अनादर करप हें सतत वाडत आसा. हाका लागून मुख्यमंत्री प्रमोद सावंत हांणी अशा प्रकारांचेर खर कारवाय करपाची शिटकावणी दिल्या. ताका येवकार दिवप तितलेंच म्हत्वाचें.
दर वर्सा लाखांनी पर्यटक गोंयांत येवपाक येतात. गोंयांत भंय ना. गोंयांत मजा करपाक एक बरी सुवात आशिल्ल्यान पर्यटकांचो आंकडो सतत वाडत आसा. खास करून नव्या जोडपीं हनीमून मनोवपाक व्हड प्रमाणांत गोंयांत येतात. नवें वर्स मनोवपाक गोंयांत जाल्ली व्हड गर्दी मतींत घेतल्यार गोंयच्या पर्यटन क्षेत्रांत खर बदल करपाची गरज आसा. पूण असो बदल दिसना. पर्यटकांची सुरक्षेची गजाल येता तेन्ना फाटल्या काळांत गोंयांत कितल्योशोच घडणुको घडत आसात. पर्यटक असुरक्षित आसत जाल्यार फुडाराक हें गोंय खातीर धोक्याची घांट थारतली हें न्हयकारूंक जायना. गोंयच्या दर एका कोनशाक पर्यटन व्हांवता अशें एक चित्र दिसपाक लागलां. आतां मेरेन दर्या वेळेर, दर्यादेग, पब, हॉटेलां, कॅसिनो हांचेर सरकाराचें चड लक्ष दिसता. हाचे परस गांवगिऱ्या वाठारांनी पर्यटनाची वेगळी गोंयची अस्मिताय निर्माण करपांत सरकाराची यंत्रणा उणी पडटा अशें दिसता. गोंयांतल्या पर्यटकांक असुरक्षीतपणाची भिरांत आशिल्ल्यान गोंयांतल्यान व्हड प्रमाणांत पर्यटक महाराष्ट्रांतल्या कोंकण वाठारांतल्या दर्यादेगांचेर वळटात, अशें दिसता. गोंयां प्रमाण महाराष्ट्र सरकारूय कोंकण वाठारांतल्या दर्यादेगेर खासा लक्ष दिता. हाका लागून गोंयांत येवपी जायते पर्यटक आतां गोंयांतले अर्थीक लुटमारीचो विचार करून कोंकण वाठारा कडेन वळपाक लागल्यात.
फाटलीं पांच वर्सां गोंयांत जायत्यो गजाली घडत आसात, जाका लागून पर्यटकांक असुरक्षीतताय निर्माण जाता. फाटल्या पंदरा दिसांनी मात चडूंच जालें. रस्त्यार पर्यटकांक खोंट मारप. तांकां हॉटेलाच्या कुडींत बंद करप. तांकां लुटप. अशे प्रकार वाडत आसात. हाका लागून गोंयची बदनामी जाता. फुडाराक गोंयच्या पर्यटनाचे उदरगतीचे नदरेन ही बदनामी खूब धोक्याची थारपाची शक्यताय आसा.शांत सैमाची आनी आकस्मीक आनंदाचो खीण अशी गोंयच्या पर्यटनाची एक वेगळी वळख आशिल्ली ती ल्हवू ल्हवू बदलत आसा. विचार केल्यार फुडल्या काळांत गोंय खातीर ह्यो गजाली खूब धोक्याचयो थारपाची शक्यताय न्हयकारूंक जायना.
गोंयांतल्या पर्यटकांक मान दिवपा कडेन कसलीच तडजोड जावची ना हें लक्षांत घेवप तितलेंच म्हत्वाचें. गोंयांत येवपी पर्यटक सुरक्षीत आसात. तांकां कसलेच तरेचो धोको ना. ह्या जाग्यार लुटमार जावची ना. गुंडगिरीक तोंड दिवचें पडचें ना….. गोंय राज्यांत अशी प्रतिमा निर्माण करप गरजेचें. तशें जालें जाल्यार येवपी काळांत पर्यटकांचो आंकडो खूब वाडूंक शकता. खण उद्देग बंद जाले उपरांत आयज गोंयची अर्थवेवस्था कॅसिनो आनी पर्यटनाचेर आदारून आसा. हाका लागून आमी पर्यटका संबंदीं आदर्शवादी मार्गदर्शक तत्वां तयार करूंक ना आनी ताचो आदर्श तयार करूंक अपेस आयल्यार फुडाराक गोंय फकत
नांवान पर्यटन वाठार म्हणून उरतलें.
मुख्यमंत्री प्रमोद सावंत हांणी पर्यटकांक त्रास दिवपी, तांचे मुखार धोको निर्माण करपी घटकां आड खर कारवाय करपाची शिटकावणी दिल्या. ही शिटकावणी फकत उलोवन न्हय तर चालीक लावप म्हत्वाचें. गोंयच्या वेगवेगळ्या वाठारांनी पुलीस येरादारी, ट्रॅफिक खातें आदी साबार तपासणी प्रक्रियांक लागून पर्यटकांक त्रास जाता. गोंयां भायल्या गाडयांची नंबर प्लेट दिसता तेन्ना पुलिसांनी आनी येरादारी खात्यान तांकां आडावन त्रास दिवपाचो यत्न सुरू जाता. ह्या वाठारांतल्या संबंदीत खात्याच्या वेवस्थेन तांचे कडल्यान खंयच्याय तरेन दंड वसूल करपाची कृतीय पर्यटकां मुखार समस्या निर्माण करपाक लागल्या. हे समस्येचे फाटभुंयेर गोंयांत येवपी पर्यटकांचो आंकडो ल्हवू ल्हवू उणो जायत आसा. सोशल मिडियाचेर गोंयांत येवपी पर्यटकांचेर कसो हल्लो जाता, कशे लुटतात तें येता. हाका लागून गोंयची वायट प्रतिमा जावंक लागल्या. ही बदनामी बेगीन थांबली ना जाल्यार फुडाराक गोंयची प्रतिमा इबाडूंक शकता आनी ताचो पर्यटकांच्या संख्येचेर वायट परिणाम जावं येता. हाचो गोंयचे अर्थवेवस्थेचेरूय व्हड प्रमाणांत परिणाम जातलो, हें न्हयकारूंक जायना.
आयज संवसारांतल्या जायत्या देशांचो अर्थीक फाटीचो कणो म्हळ्यार पर्यटन. त्या देशांत पर्यटकांक कसो मान दितात तें पळोवन गोंयांतय अशीच आदर्शांची संस्कृताय निर्माण करपाचो वेळ आयला. पर्यटकांक अडचणी हाडपाचो यत्न करप गोंयच्या फुडाराचे नदरेन हानीकारक थारपाची शक्यताय आसा.
गोंयांतल्या पर्यटकांक समस्या निर्माण करपी आनी तांचे मुखार धोक्याची परिस्थिती निर्माण करपी घटकां आड सरकारान खर कारवाय करप गरजेचें. बेगीन बेगीन पयशे जोडपाची संवय आशिल्ल्या थोड्यांनी पर्यटकांक फटोवपाक सुरवात केल्या. सरकारान हाचेर खासा लक्ष दिवचें अशें आमी मागतात. गोंय सरकाराच्या पुलीस, येरादारी खात्यान पर्यटक गाडयो तपासच्यो. पूण पर्यटकांचेर व्हड प्रमाणांत दंडात्मक कारवाय करपाची धांवपळ करची न्हय. ताका लागून फुडल्या काळांत गोंयचे प्रतिश्ठेक खत लागपाक शकता.
उदय सावंत
9422446242
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
