भांगरभूंय | प्रतिनिधी
संजीवनीच्या गोमंतक ऊस उत्पादक संघटणेन मारलो उलो
फोंडें: ऊसाची लागवड चालूच दवरात. सगळे ऊस सरकार घेतलें अशें आस्वासन मुख्यमंत्री प्रमोद सावंत हांणी दिल्लें. मात अर्थीक संकश्टांत सांपडिल्ल्या ऊस उत्पादकांक बियां (बेणें, उसाचे कुडके करून रोयतात. ताका कोंब येवन मागीर तो उस जाता.) विकत घेवप कठीण जालां. ऊसाचें बीं विकत घेवपा खातीर तोंडान आस्वासनां दिवचे परस सरकारान परिपत्रक जारी करून ऊसाचीं बियां विकत घेवपाक सहकार्य करचें. सरकारान फुडल्या ४ दिसांनी परिपत्रक जारी करपाचो उलो संजीवनीच्या गोमंतक ऊस उत्पादक संघटणेचे बसके उपरांत आयोजीत पत्रकार परिशदेंत मारलो.
हे बसकेक ऊस उत्पादक संघटणेचे अध्यक्ष राजेंद्र देसाय, फ्रान्सीस मास्कारेनास, संजय कुर्डीकार, अशोक वेळीप आनी हेर ऊस उत्पादक हजर आशिल्ले.
हे विशीं चड म्हायती दितना गोमंतक ऊस उत्पादक संघटनेचे अध्यक्ष राजेंद्र देसाय हांणी, ४ जानेवारीक ऊस उत्पादकांनी मुख्यमंत्री प्रमोद सावंत हांची भेट घेतिल्ली. तेन्ना मुख्यमंत्र्यांनी ऊस लागवड चालूच दवरपाची मागणी ऊस उत्पादकांक केल्ली. हाका लागून लागपी परिपत्रक रोखडेंच ४- ५ दिसांनी जारी करपाचें आस्वासनूय दिल्लें. मात आजूनय मुख्यमंत्र्यांनी आस्वासनां पुराय करूंक ना. हाका लागून अर्थीक संकश्टांत सांपडिल्ल्या ऊस जाला. बीं घेवपा खातीर सरकारान येवजण बंद केल्ल्यान ऊस उत्पादकांक कठीण परिस्थितींतल्यान वयचें पडटा. हाका लागून तोंडी आश्वासनां परस सरकारन परिपत्रक जारी करपाचो निर्णय बसकेंत घेतिल्ल्याचें सांगलें.
संजय कुर्डीकार हांणी राज्यांतल्या सरकारान ऊस उत्पादकां कडेन पुरायेन आडनदर केल्ल्याचें दिसता. सरकारान कारखान्याविशीं स्पश्ट धोरण जाहीर करचें वा ऊस उत्पादकांक दिवपी अनुदान फुडाराक चालूच दवरपाची गरज तांणी उक्तायली.
अशोक वेळीप हांणी, ऊस उत्पादकांची जमीन पडींग उरल्यार राज्यांतल्या ऊस उत्पादकांचें कुटूंब त्रासांत पडटलें. फाटलीं पांच वर्सां सरकारान कारखानो सुरू करपा विशीं आस्वसानां ऊस उत्पादकांक दिलीं. मात कारखानो सुरू करपा विशीं आजूनय कसल्योच हालचाली सुरू जावंक नाशिल्ल्याचें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
