भांगरभूंय | प्रतिनिधी
विरोधकांचो आरोपः सभापतीच्या आसना मुखार घातलो बोवाळ
भांगरभूंय । प्रतिनिधी
पणजीः राष्ट्रीयीकरणाच्या माध्यमांतल्यान गोंयांतल्यो सगल्यो न्हंयो गोंय सरकारान केंद्र सरकाराक विकल्यात, असो आरोप शुक्रारा विरोधी आमदारांनी केलो आनी सभापतीच्या आसना मुखार एकठांय जावन बोवाळ घातलो. ताका लागून कांय वेळ सभाघरांतलें वातावरण तणावाचें जालें.
मुख्यमंत्री डॉ. प्रमोद सावंत आनी पर्यावरण मंत्री आलेक्स सिक्वेरा हांणी विरोधकांचे आरोप भायर मारले.
शुक्रारा प्रस्न जापेच्या वराक आमदार क्रूज सिल्वा हांणी ‘सागरमाला’ प्रकल्पा खाला गोंय सरकारान गोंयांतल्यो न्हंयो केंद्राक कित्याक दिल्यो, असो प्रस्न उपस्थीत केलो. ह्या निर्णयाचो व्हड मार गोंयांतल्या नुस्तेकार भावांक बसतलो असोय तांणी दावो केलो. केरळ सरकारान योग्य कारणां दिवन आपल्या राज्यांतल्या 10 न्हंयांच्या राष्ट्रीयीकरणाक स्पश्ट विरोध केलो. तसो निर्णय गोंय सरकारान कित्याक घेवंक ना, असोय प्रस्न तांणी विचारलो. हातूंत मध्यस्थी करून विरोधी पक्ष फुडारी युरी आलेमांव हांणी गोंय सरकारान गोंयांतल्यो न्हंयो केंद्राक विकिल्ल्याचो, जाल्यार आमदार कार्लोस फेरेरा हांणी न्हंयो भेट दिल्ल्याचो आरोप केलो.
आमदार सिल्वा हांच्या प्रस्नांक जाप दितना पर्यावरण मंत्री सिक्वेरा हांणी विरोधकांचे आरोप पुराय तरेन भायर मारले. न्हंयांच्या राष्ट्रीयीकरणाचो विशय दिगंबर कामत हांच्या फुडारपणा खाला 2012 त आशिल्ल्या काँग्रेस सरकाराच्या काळांत आयिल्लो. त्या वेळार दिगंबर कामत आनी ते उपरांत आदले मुख्यमंत्री मनोहर पर्रीकार हांणीय ताका विरोध केल्लो. ते उपरांत गोंय सरकारान राष्ट्रीय न्हंय प्राधिकरण आनी मुरगांव पोर्ट ट्रस्टा वांगडा (एमपीटी) समजिकाय कबलात केली. ते कबलाती प्रमाण ‘सागरमाला’ प्रकल्पा खाला गोंयांतल्या न्हंयांचेर जे प्रकल्प, साधनसुविधा उबारतले, ताचे पुराय अधिकार बंदर आनी कप्तान खात्या कडेन आसतले, अशें स्पश्टपणान नमूद केलां. ताका लागून विरोधकांच्या आरोपांत कसलेंच तथ्य ना, अशेंय तांणी स्पश्ट केलें.
मजगतीं, मंत्री सिक्वेरा हांणी समजिकाय कबलातींतले मुद्दे वाचून दाखोवपाक सुरवात केले उपरांत युरी सयत क्रूज सिल्वा, कार्लोस फेरेरा, विरेश बोरकार, व्हेन्झी व्हिएगश आक्रमक जाले आनी तांणी थेट सभापतीच्या आसना मुखार धांव मारली आनी गोंय सरकारान गोंयांतल्यो न्हंयो केंद्राक विकिल्ल्याच्यो घोशणा दिवपाक सुरवात केली. ताका लागून सभाघरांत बोवाळ जालो.
पार्सेकार हांणी दाखयल्ली तयारीः फेरेरा
न्हंयांच्या राष्ट्रीयीकरणा संबंदांतलो विशय 2010 त सुरू जालो. ताका आदले मुख्यमंत्री दिगंबर कामत आनी मनोहर पर्रीकार हांणी विरोध केल्लो. पूण आदले मुख्यमंत्री लक्ष्मीकांत पार्सेकार हांणी मात न्हंयो दिवपाची तयारी दाखयल्ली. ते संबंदांतलीं कागदपत्रांय आपले कडेन आसात, अशें कार्लोस फेरेरा हांणी स्पश्ट केलें.
विरोधकांचे आरोप गरजे भायलेः मुख्यमंत्री
न्हंयांच्या राष्ट्रीयीकरणा वयल्यान विरोधक गोंय सरकाराचेर गरजे भायले आरोप करतात. तांकां ती संवय जाल्या. हे विशीं गोंय सरकारान राष्ट्रीय न्हंय प्राधिकरण आनी एमपीटी वांगडा जी कबलात केल्या ती आपूण सभाघरा मुखार दवरतां. ती वाचून विरोधकांनी ताचेर उलोवचें, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
