भांगरभूंय | प्रतिनिधी
न्या. फेर्दीन रिबेलो : नियाळ घेवपाची मुख्यमंत्र्याची हमी
भांगरभूंय । प्रतिनिधी
पणजी : नगर नियोजकान दोंगराचे बाह्यरेशेचें उल्लंघन करपी दोंगर कांपणी विशींचें परिपत्रक फाटीं घेवन जी मान्यताय ह्या परिपत्रका वरवीं दिल्या तांचेर फेरविचार करचो. ह्या परिपत्रकाक लागून गोंयच्या रानांचेर संकश्ट येतलें, अशीं शक्यताय न्या. फेर्दिन रिबेलो हांणी मुख्यमंत्री डॉ. प्रमोद सावंत हांचे कडेन उक्तायली. हे विशीं नियाळ घेवन निर्णय घेतले, अशी जाप मुख्यमंत्र्यान दिल्या.
आदले न्यायाधीश फेर्दीन रिबेलो हांणी पर्वरी मंत्रालयांत मुख्यमंत्र्याची भेट घेतले उपरांत पत्रकारां कडेन उलयताले. आमी मुख्यमंत्र्या कडेन आमचे 10 मुद्दे दिल्यात आनी ते अंमलांत हाडपाक मेळटात, अशें मुख्यमंत्र्याक सांगिल्ल्याचें रिबेलो हांणी म्हणलें.
23 नोव्हेंबराक नगर नियोजकान दोंगर कांतरपा विशीं जारी केल्ल्या परिपत्रकाचो मुखेल विशय तांचे मुखार मांडून तें परिपत्रक फाटीं घेवपाक सांगलें. ह्या परिपत्रकाचो आदार दोंगराच्या चडावार जीं रानां आसात तांची बाह्यरेशा बदलपाक नगर नियोजन खातें मान्यताय दिता आनी नगर नियोजकाक हें परिपत्रक काडपाचो कसलोच अधिकार ना, अशें रिबेलो हांणी सांगलें.
भारतीय सर्वेक्षक जनरल हांणी बाह्यरेशा आराखडो तयार केला, पूण हो आराखडो कुशीक दवरून खाजगी आर्किटेक्टांनी आपले आराखडे तयार केल्यात आनी ह्या आराखड्यांच्या आदाराचेर नगर नियोजन खातें दाखले दितां. देखून हें परिपत्रक बेगिनात बेगीन रद्द करचें आनी सर्वेक्षक जनरल हांणी तयार केल्ल्या बाह्यरेशा आराखड्याच्या आदाराचेर जी परवानगी दिल्या ताचेर फेरविचार करून सगल्या बांदकामांचेर स्थगिती दिवची, अशी मागणी रिबेलो हांणी केली.
मुख्यमंत्र्यान पासियेस काडून आमचें आयकून घेवन आमचें म्हणणें कितें तें तांकां समजलां. आमी तांकां परिपत्रक आनी कायदो दाखोवन सांगलां, कलम 17 अ खाला नगर नियोजकाक हें परिपत्रक जारी करपाचो कसलोच अधिकार ना. मुख्यमंत्र्याक आमचो मुद्दो कळ्ळा आनी आमी परिणामांची आमी वाट पळयतात, अशें रिबेलो हांणी सांगलें.
हीं रानां गोंयच्या लोकांचीं आनी कितलेशींच वर्सा जालीं तांकां कोणेंच हात लावंक ना. पूण आतां हीं घरां गोंयकारांक न्हय, तरी लेगीत तीं गोंयकारांच्या जिवार बांदतात. आमकां सारकें उदक, लायट, रस्ते ना, पूण ही सगली सुविधा तांकां मेळटली. उदरगतीच्या नांवान बंगले, इमारती येवन फायदो कितें, असो प्रस्न रिबेलो हांणी उपस्थीत केलो. मजगती, हे विशीं उलयतना मुख्यमंत्री डॉ. प्रमोद सावंत हांणी सांगलें, रिबेलो हांणी दिल्लें निवेदन तांकां मेळ्ळां. ह्या निवदेनांत मांडिल्ल्या मुद्द्यांचो नियाळ घेवन फुडलो निर्णय घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
