भांगरभूंय | प्रतिनिधी
पणजी : सरकारान ७ वर्सां परस चड सेवा दिल्ल्या रोजंदारी कर्मचार्यांक ’Temporary Status’ म्हळ्यार तात्पुरतो कर्मचारी दर्जो दिवपाचो निर्णय घेतला. मुख्यमंत्री डॉ. प्रमोद सावंत हांणी आयज हो म्हत्वाचो निर्णय जाहीर केला. ह्या निर्णयाक लागून कर्मचार्यांक चड वेतन, रजा आनी हेर सवलतींचो लाव मेळटलो. ही सुधारीत येवजण १ ऑगस्ट २०२५ सावन लागू जातली. सुमार ३,००० कर्मचार्यांक हाचो लाव मेळटलो.
क्लेरिकल कर्मचार्यांक दर म्हयन्याक २५,००० रुपयांचें वेतन मेळटलें. हातूंत दर वर्सा ३% वाड दितले. दिसवड्या वेतनाचेर काम करपी मजुरांक, जर तांणी २०२० मेरेन ७ वर्सां पुराय केल्यार ताचें मूळ वेतन २०,००० रुपया इतलें थारायतले. २०२० सावन प्रतिवर्स ३% वाड दिल्ल्यान २०२५ वर्सा तांचें वेतन २३,१८५ रुपयां मेरेन वतलें. ज्या मजुरांचें दर म्हयन्याक सरासरी वेतन १२,८१८ रुपया इतलें आसा, तांच्या वेतनांत सुधारीत येवजणे उपरांत सुमार ५२% वाड जातली.
तात्पुरतो दर्जो मेळिल्ल्या कर्मचार्यांक दर १५ दिसां उपरांत १ दिसाची ’कॅज्यूअल लिव’ (सामान्य रजा), दर वर्सा १५ दिसांची सीक लिव्ह, मॅटर्नीटी लिव्ह (मातृत्व लाव कायद्या प्रमाण) असो लाव मेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
