भांगरभूंय | प्रतिनिधी
सरकारांतल्या मंत्री, आमदारांक उलोवंक माची आसता. मुख्यमंत्र्यां कडेन वचून तांचे कडेन कागाळी करपाची धिटाय दाखोवची, पत्र बरोवचें.
गृह आधार येवजणेचे पयशे बँकेत घालूंक नात, दर्यादेगेर पर्यटक व्हडा प्रमाणांत ना, रोमी कोंकणी, मराठी राजभास जायना, पुतळे, फेस्तां, उक्तावणां जातात, स्मार्ट सिटीचो वावर अजून जावचो आसा, पर्वरे, साळावले उदकाच्यो पायपलायनी फुट्टात, गोंयकारपण उरुंक ना हीं ल्हान, सान किजींला करीत सरकारांतले मंत्री, आमदार राग मिडीया मुखार उक्तावपाक लागल्यात. माय तापता तशें रागार, फुगार जावपय वाडटलें. खबराकारांक जाय आसता खावड, व्हिज्युअल मिडीयाक दीसभर खबरो गिरायकांक पावोवपाच्यो आसतात. त्या बोवाळांत स्वयंपूर्णावरी प्रदर्शना कडेन पळोवपाक कोणाक वगत आसा? कितल्योशोच खबरो, नेगेटीव्ह, पाॅझिटीव्ह प्रदर्शनांत आसात. लकी ड्राॅ, माती, प्लास्टिक, बुयांवां, बाटल्यो… साबार. लखपती, करोडपती दीदी कोणाक दिसतल्यो? लखपती निर्बळा, लाडली लक्ष्मी स्वयंपूर्णेचें खाशेलपण. तें कोणाक दिसतलें?
सरकाराचेर रागार, फुगार जाल्ल्या मंत्र्यांनी मुख्यमंत्री डाॅ. प्रमोद सावंत, भलायकीमंत्री विश्वजीत राणे हांच्या कार्यावळींची, वावराची देख घेवची. आपापल्या खात्यां वरवी अस्तुरेक सगले मंत्री लखपती, करोडपती करुंक शकतात. आरंब करात आपल्या घरांतल्यान. घरकान्न, भयण, भावजय, ताईक, आकाक वांगडा घेवन. एक दीस तांकां विसव मेळ्ळ्यार वर्साचे 364 दीस घरांतली अस्तुरी तुमचे बराबरीन आॅफिसांनी गेल्ली दिसतली. मानसिकताय बदलल्यार आदली प्रधानमंत्री इंदिरा गांधी क्रियाशील अस्तुरी जाल्ली खासदार प्रियांका गांधी हांचे मदीं पळोवंक मेळटली.
आम आदमी पार्टेच्यो आमदार आतिशी मार्लेना गोंयांत आयल्यो, फाल्यांच विधानसभा वेंचणूक जातली अशेतरेन धोल बडयले. वेंचणूक म्हणल्यार तळागाळांत वचून कमीच दोन वर्सां रात दीस मतदारां खातीर वावुरचें पडटा. सरकारांतल्या मंत्री, आमदारां मदीं अस्वस्थाय वाडल्या आसत, पूण भिरांत कित्याक? केंद्र सरकारांत प्रधानमंत्री नरेंद्र मोदी हांचें सरकार आसा. मागीर गोंय दुसऱ्या मार्गान कशें वतलें? मतदारां पासत वावुरिल्ल्या लोकप्रतिनिधींक मतां मेळटलीं, पूण राजकारणांत येवपाक हेरांची सर्त लागिल्ल्यान लोकप्रतिनिधी अस्वस्थ आसपाची शक्यताय आसा.
सरकाराचेर रागार, फुगार जावपाचीं कारणां तशीं शंभर दोनशे न्हय, हजार आसतलीं. एक तेंप असोय आशिल्लो जेन्ना काँग्रेस सत्तेर आशिल्ल्या महाराश्ट्रवादी गोमंतक पक्षाच्या आमदारांक फोडटाली. म. गो. वांगडा युती, आघाडी करुन भाजपान सत्ता मेळयली. म. गो. च्या भुजांवेल्यान पळेत भाजपा सत्तेर आयल्या उपरांत साबार प्रसंग आयले, भाजपाचें दल जड जायत गेलां. राजकारणात देंवप, चडप, पडप आसता. राजकारण्यां परस चड उमळशीक लागल्या समेस्तांक मंत्रीमंडळ बदलाची. प्रशासनाकय मंत्रीमंडळ बदल जातात, अशें खबरांतल्यान कळटा तेन्ना प्रशासन अस्वस्थ जाता. तेच अस्वस्थतायेंतल्यान प्रशासन सवकासायेन चलपाक लागलां जाल्यार तें समेस्तांच्या दारांत व्हरचें पडटलें, जागृताय करची पडटली. पयलींचे अधिकारी रिटायर जाल्यात, नवे अधिकारी सेवेंत आयल्यात, तांकां खातें समजून घेवंक, वेगीं प्रश्न सोडोवंक कळाव लागता, कामकाजाच्यो पद्धती, कायदे बदलल्यात. रिटायरमेंटाच्या वाटेर आशिल्ल्या अधिकाऱ्यांक समेस्तां मेरेन वचपाचें, तांच्या कामाचें पडिल्लें नासता, मुख्यमंत्र्यांकय तें होल्मलां. भौशीक गाराणी विभाग क्रियाशील करपाची गरज आसा.
सरकारांतल्या मंत्री, आमदारांक उलोवंक माची आसता, मुख्यमंत्र्यां कडेन वचून तांचे कडेन कागाळी करपाची धिटाय दाखोवची, पत्र बरोवचें. मुखेलमंत्री अती व्यस्त जाल्यात, आपल्या भुजांचेर आशिल्लो खात्यांचो भार तांकां देंवोवचो पडटलो, विश्वासांतल्या आमदार, मंत्र्यांक आनीक खातीं दिवपाक कळाव नाका. समाजकल्याणमंत्री सुभाष फळदेसाय हांच्या खात्याचे इमारतीचो, नोकरभरतेचो प्रश्न बेगोबेग सुटावो केल्यार वावर नेटान जातलो. पावसा आदीं नवे सुवातींत समाजकल्याण खातें थिरावप गरजेचें.
सरकाराची तीन वर्सां सोंपतना मंत्र्यांच्या, खात्याच्या वावराचो केल्लो नियाळ समेस्तां मुखार दवरप म्हत्वाचें आसा, तातूंतल्यान सुदारप जातलें. फुडलीं दोन वर्सां म्हत्वाचीं आशिल्ल्यान राजकी पक्षा परस मुख्यमंत्र्यांनी प्रशासना कडेन चड लक्ष दिवपाक जाय. सुरु जाल्ले उदरगतींत आडमेळीं हाडप शक्य ना, उदरगत, बदलाचेर गोंयचे फुडले पिळगेचो फुडार निंबून आसा.
राश्ट्रीय शिक्षण धोरण (एनईपी) चालीक लावप फुडाराचे नदरेन एक म्हत्वाचें पावल. विदेसांत, राश्ट्रकुल देसांक मायभाशेंचें (राजभाशेचें) म्हत्व कळपाक लागलां. तोच म्हासत्तेचो मार्ग, वाट. राज्याचो 40 वो वर्सदीस मनयतना गोंय भारता बराबरीन मुखार सरिल्लें दिसपाक जाय. समेस्तांक वारें, शिंयांळ्या ऋतुमानाची म्हायती खिणाखिणाक पावोवपाचो वावर माध्यमां सानुल्या खबरांनी करतात. आनीक बेगींतल्या बेगीन खबरो पावोवपाचें तंत्र येवपाचे वाटेर आसा. खबरो दितना दिवपी मनीस विश्वासाचो आसल्यार लोकां मदीं गोंदळाचें वारें नासता. माध्यमांतले नवे पिळगेक विश्वास जोडपाक कळपाक जाय. दिल्ली, मेळिल्ली म्हायती सत, फट, कायद्यान बसता की ना हें सांगपी माध्यम यंत्रणा घडोवपाक सरकारी मान्यता मेळिल्लें माध्यम स्कूल, म्हाविद्यालय अजूनय गोंयांत ना. अभ्यासक्रमांक अणभव, साद्या उतरांची जोड मेळ्ळ्यार नवी अणभवी पिळगी घडटली, पूण ती आदलेवरी आसचीना हें सत. राजकी ते माध्यमा मेरेनचे नवे पिळगे पासत एथिक्स (नीतीसंहिता) शिकोवचीच पडटली. आमदार आनी मंत्र्यां खातीर प्रशिक्षणाच्यो कार्यावळी वर्साक एकदां पांचनखेत्री हाॅटेलां परस हेर सभाघरां, परिशद घरांनी जावच्यो. गांवगिऱ्या वाठारांनी मंत्री, आमदारांक व्हरून, एकठांय बसून भासाभास केल्यार विचार परगटावपाक संद मेळटली, प्रदेशाध्यक्ष तो वावर करुंक शकतात. भाजपाच्या नव्या प्रदेशाध्यक्षांनी शिस्तीची शिटकावणी दिल्या, एकदां पक्षाच्या सगल्या आमदारांची, मंत्र्यांची एकवटीत बसका घेवची, मोबायल आॅफ दवरुन.
आर्टिफिशल इंटेलिजन्स जेन्ना देसांत मोबायला वेल्यान तुमच्या आमच्या मेंदवांत रिगपाचे येत्न करतलें तेन्ना घुस्पागोंदळ आसता, तें शास्त्र माध्यमांक समजावन सांगचें पडटलें. माध्यम कायदे देश पावंड्यार बदलचेच पडटले, ते बदलतना खबरांकार उद्येजक जाल्यार ताचे खातीर निती कशी आसची तें थारावपाक जाय. खबरांकार राजकारण्यांक मोडूंक, जोडूंक शकतात, आमदार निलेश काब्राल हांकां तें कोडू सत होल्मलां आसतलें. मंत्री आमदारां इतले मेकळेपणान उलोवंक शकना, तांचेंर बंधनां आसतात, तांकांय फटोवपाचे येत्न जातात. आमदार तिडकतात, रागार फुगार जातात ते मंत्री तांकां मेळनात म्हणून? विशय तांकां समजना म्हणून? कोण धोंशी घालतात, संस्कृताय शेणोवपाक कोण जापसालदार आसात तें मुख्यमंत्री डाॅ. प्रमोद सावंत हांकां कळ्ळां, तेय सादूर जाल्यात, कोर्टा मेरेन कोण वतात, धांवतात, कित्याक तें तांकां कळ्ळां, वाडपी स्थलांतरीत कामगारांचे चोंबे तांकांय अस्वस्थ करतात.
राजभास नोकरेखातीर सक्तीची करपाचो सरकारान घेतिल्लो निर्णय, धोरण समा आसा. त्या निर्णयाक धरून तांणी रावचें, मूळ गोंयकार, नीज गोंयकार मतदार तांचे बराबरीन रावतलो हातूंत दुबाव ना. चुको जातल्योच, मुख्यमंत्रीय चुकले आसत, पूण ते सुदाल्ल्यात, कोंकणीच उलयतात. इंग्लीश आमची राजभास न्हय, तीं आमची राश्ट्रभास जावंक शकना हें मेकळेपणान सांगपाची धिटाय तांणी दाखोवची. गोंयकारपण राजभास कोंकणीचेर निंबून आसा, ती तिगल्यार गोंय, गोंयकारपणय उरतलें, तिगतलें. विचार परगटावपाक माध्यमांनी, समेस्तांनी राजभासेचो उपेग करचो. राजभास हीच आमची गिन्यानाची, पोटाची भास हें आमदारांक सांगपाचो होच वगत. इंग्लेज माध्यम मुळाव्या शिक्षणाच्या पावंड्यार नाका, इंग्लेज मुळाव्या शाळांक अनुदान नाका तींच गोंयच्या पयल्या मुख्यमंत्र्यांक भाऊंक आर्गां. भाऊ कोंकणी उलयताले, तांची मराठीय कोंकणीवरी.
सुहासिनी प्रभुगांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
