भांगरभूंय | प्रतिनिधी
बेवारस मालमत्ता कायद्या वयल्यान कार्लोस आनी मुख्यमंत्र्यांचो वाद
भांगरभूंय । प्रतिनिधी
पणजी : वारस नाशिल्ल्या मालमत्तांच्या कायद्या वयल्यान गोंय विधानसभेंत सत्ताधारी आनी विरोधकां मदीं नेटाचो वाद जालो. आमदार कार्लोस फेरेरा हांणी ह्या कायद्या वरवीं सरकाराचेर जमीन हडप करपाचो आरोप केलो. हाचेर मुख्यमंत्री डॉ. प्रमोदसावंत हांणी जमनी वाटावपा खातीर हो कायदो हाडिल्ल्याचें स्पश्ट केलें. फेरेरा हांणी ह्या कायद्या आड न्यायालयांत वच्चें, अशेंय मुख्यमंत्र्यान सांगलें. महसूल मंत्री बाबूश मोंसेरात आनी आमदार निलेश काब्राल हांणी लेगीत फेरेरा लोकांची दिशाभूल करता, असो आरोप केलो.
ते आदीं, हे संबंदांत आमदार निलेश काब्राल हांणी लक्षवेदी सुचोवणी मांडिल्ली. तांणी सांगलें, सध्या सोशल मिडियाचेर आमदार फेरेरा हांचो एक व्हिडियो व्हायरल जाता. तातूंत ते गोवा एस्चीटस फोरफीचर अॅण्ड बोना व्हेकेंशिया कायद्या वरवीं सरकार जमीन हडप करपाक सोदता, अशें सांगता. हे चुकीचे आनी गैरसमज पातळावपी म्हायतीक लागून लोकां मदीं भंयाचें वातावरण तयार जालां. सरकारान अश्यो 60 मालमत्ता वळखिल्ल्याची चुकीची म्हायती लेगीत व्हिडियोंत दिसता. हे विशीं आमदार फेरेरा हांणी स्पश्टीकरण दिवप गरजेचें आसा.
मुख्यमंत्री डॉ. प्रमोद सावंत हांणी सांगलें, हे आदींच्या सरकारांनी ह्यो जमनी हडप प्रकरणां कडेन आडनदर केली. आमच्या सरकारानूच ह्या गंभीर विशयांचेर पावल उखल्लां. हे खातीर एसआयटीची स्थापना केल्या. आतां मेरेन 22 प्रकरणांचो तपास पुराय जाला आनी 30 प्रकरणांचो तपास चालू आसा. ह्या तपासांत आतां मेरेन 75 जाणांक अटक केल्या. तातूंतले 6 जाण सरकारी कर्मचारी आसात. तातूंतल्या एका दुबाविताक 13 खेपे अटक केल्या. फेरेरा हांचो व्हिडियो सरकाराची बदनामी करता. अशे प्रकार सोंसून घेवचे नात. व्हिडियोक लागून लोकांचो गैरसमज जाता, तो तत्काल काडप गरजेचें आसा, अशें तांणी सांगलें.
सगल्यो व्याख्या स्पश्ट : मुख्यमंत्री
आमदार कार्लोस फेरेरा हांणी ह्या कायद्यांतल्यो कांय व्याख्या स्पश्ट नाशिल्ल्याचो दावो केलो. तांणी सांगलें, हें विधेयक पोरूं विधानसभेंत आयलें तेन्ना लेगीत आपणें सरकार जमीन हडप करपाक सोदता, अशें म्हणिल्लें. ताचेर मुख्यमंत्र्यान कायद्यांतल्यो सगल्यो व्याख्या स्पश्ट आसात आनी जमनी ताब्यांत घेवचे आदीं 10 वर्सांचो काळ दिला अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
