भांगरभूंय | प्रतिनिधी
पणजी : राज्य सरकारान राज्याच्या खेळां उदरगती खातीर एक व्यापक धोरण तयार केलां, ताळगांवचे उदरगती पसून तें ऑलिम्पीक पांवड्यावेले तयारे मेरेन दरेका टप्प्यांचेर खेळगड्यांक फाटबळ दितात. विधानसभेंत सादर केल्ले आंकडेवारी प्रमाण, फाटलीं तीन वर्सां हजारांनी खेळगड्यांक विवीध येवजण्यांचो लाव मेळ्ळा. विशेश म्हळ्यार बायलां खेळगड्यांचो वांटो कांय प्रमाणांत वाडला.
खेळगड्यांक आंतरराष्ट्रीय पांवड्यार उत्कृश्ठ कामगिरी खातीर उर्बा दिवपाच्या हेतान सरकारान आकर्शक इनामां दिवपाची येवजण जाहीर केल्या. हे येवजणे खाला ऑलिम्पीकच्या भांगरा पदका खातीर १ कोटी रुपया, रुप्या पदा खातीर ५० लाख रुपया आनी कांस्य पदा खातीर २५ लाख रुपया दितात. ऑलिम्पिकांत फकत वांटेकार जावपी खेळगड्याकूय १० लाख रुपयांची उर्बा दिवचे खातीर भेट दितात. तशेंच, विश्व चॅम्पियनशिपांतल्या भांगरा पदक जैतिवंताक १५ लाख रुपया आनी राष्ट्रीय खेळां मदल्या भांगरा पदका खातीर ३ लाख रुपया मेळटात.
हजारांनी खेळगड्यांक अर्थीक मजत
सरकारान फकत येसस्वी खेळगड्यां पुरतेंच मर्यादीत दवरी नासतना तांणी व्हडा संख्येन खेळाडूंक मदत केल्या. राज्य खेळां संघटणां वरवीं राबयल्ल्या अनुदान येवजणेंतल्या २०२२ ते जुलय २०२५ ह्या काळांत २,१०४ खेळगड्यांक राष्ट्रीय आनी आंतरराष्ट्रीय सर्तींनी वांटेकार जावपा खातीर अर्थीक मजत मेळ्ळ्या. हाचे वांगडाच, ‘अर्थीक मजत येवजणे’ खाला फाटल्या तीन वर्सांनी ६ खेळगड्यांक तांच्यो विशेश गरजो पुराय करपाक सरळ मजत दिली.
गोंय सरकाराच्या खेळां धोरणाचें व्हड येस म्हळ्यार‘डाएट कोचींग कॅम्प’ येवजणेक लागून गांवांगांवांतल्या बायलां खेळगड्यांचो वाटो वाडला. हे येवजणे खाला बायलां लाभार्थींचो आंकडो २०२२-२३ वर्सा फकत ४१ आशिल्लो, तो २०२४-२५ वर्सा ३५६ मेरेन पावला. हो सुमार णव पटीन वाडला. हे येवजणेंत २१ दिसांच्या प्रशिक्षणा वांगडाच खेळगड्यांक दर दिसा ८० रुपयांचो जेवणाचोय भत्तो दितात.
आंतरराष्ट्रीय पांवड्यार विशेश येवजण आंतरराष्ट्रीय पांवड्यार उत्कृश्ठ कामगिरी खातीर सरकारान विशेश येवजण सुरू केल्या, हे खातीर वर्सुकी २ कोटी रुपयांची तरतूद आसा. हे येवजणेंतल्यान वेंचीक १० खेळगड्यांक उच्च दर्जाचे प्रशिक्षण आनी आंतरराष्ट्रीय सर्तींनी वांटो घेवपा खातीर दरेकी ३० लाखां मेरेन अर्थीक मजत दितात. हें गोंयच्या खेळगड्यांक संवसारीक पांवड्यार तयार करपा खातीरचें एक म्हत्वाचें पावल.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
