भांगरभूंय | प्रतिनिधी
सप्तका भितर गोंय मुक्ती दीस सरकारी पांवड्यार मनयतना राज्याचो फाटल्या दोन वर्सांच्या उदरगतीचो नियाळ, नवीं आश्वासनां लोकां कडेन पावोवपाचे यत्न जातले. कोविडाचे कसवटीच्या तेंपार सरकाराक झुजचें पडलें. पूण उदरगत थांबूंक ना हें सरकार दाखोवन दिवंक लागलां. उदरगत करतना सैमीक तशेंच हेर अरिश्टां, आव्हानां सरकारा मुखार येतात तेन्ना प्रशासनांतले अणभवी अधिकारी सरकाराचे मजतीक धांवतात. त्या अधिकाऱ्यांनी तंत्रगिन्यानान फुडें आशिल्ल्या तरणाट्यांचो आदार घेवपाक अनमनपाक जायना. सगलेच अधिकारी तरणाट्यांक अणभवाचें 100 टक्के गिन्यान दितले अशें न्हय, पूण अणभवाचो लाव तरणाट्यांनी घेतल्यार, नवें शिकल्यार फुडाराची वाट सोंपी जातली. अरिश्टां, आश्वासनां वांगडा राज्या मुखार नवे प्रस्न कसले आसात ते सरकारान गोंय मुक्ती दिसा निमतान सांगचें पडटलें.
हवामान, विज्ञान, तंत्रज्ञानाच्या बदलांतल्यान मनीसजिणेंत जावपी बदल, जेवणा खाणांच्योच न्हय हेर संवयी गोंयकारांक बदलपाची गरज आसा. ते विशीं अचूक मार्गदर्शन करपी त्या त्या मळांतले ज्ञानी आसचे. मार्गदर्शनय त्या त्या वेळारच जावप बेस बरें.
आयचे आवय-बापूय चडशे 10 वी मेरेन शिकिल्ले आसतले, तीस चाळीस वर्सां आदीं तीन चार भुरगीं आसतालीं. ताचे उपरांत दोनूच भुरगीं आनी आतां एकूच वा उसरां भुरगें असो निर्णय घेवपी शिकिल्लीं आवय-बापूय आसात. त्या आवय-बापायक आपलें भुरगें दोतोर, इंजिनियरच न्हय जाल्यार चंद्रार वचपी अंतराळवीर जावचें अशेंय दिसता. सपनां पळोवचीं, भुरग्यां भितर केळोवचीं, पूण सपनांतलें मळब हाता लागीं येवंक ना, सपना प्रमाण जैतिवंत जालीं ना जाल्यार निर्शेणी येवपाक जायना. भुरग्याचीच न्हय भुरग्याच्या आवय-बापायचे मानसिकतेंत बदल घडोवन हाडपाचें, सरकारी नोकरेंतल्यानच न्हय, प्रायव्हेट कंपनींनी नोकरी करुनूय भुरगें व्हड पांवड्यार पावंक शकता. ड्रायव्हराचीच न्हय जाल्यार कोयर वेवस्थापनांतल्या कामदारांची, गोंयच्या आदिवासी समाजातलीं भुरगींय शिक्षण हक्क कायद्यांतले तजविकेंतल्यान अधिकारी, दोतोर, इंजिनीयर, वकील जाल्यांत, उद्देग आनी वेवसायांत पावल्यांत हेंवूय सरकारान सांगपाक जाय. आरंभाक कमी पगार घेवपी, सरकारी हाॅस्पिटलांनी कामाक आशिल्ले आयज गाडयो घेवन भाेंवतात. मंत्रीय जाल्यात पूण फुडारांत संकश्टां आयल्यार तांणी कितें करचें हाची येवजण सरकारानच न्हय जाल्यार जण एकल्यान करची पडटली. उंचेलें शिक्षण घेवन ल्हान पिरायेचेर सक्षम जावपी, आपले विचार मेकळेपणान उक्ते करपी नवी पिळगी वर्सुकें नियोजनय करता.
कोयराचो विलो लावपा सावन, कोयरांतल्यान, खणींतले मातयेंतल्यान घरां बांदपाचेंच न्हय जाल्यार भुंयकांपानय मोडनाशिल्लें घर बांदपी संशोधन केल्लें विज्ञानीक, गोंयकारय आसात. विश्वांतल्या गोंयकारांक वर्स सोंपतना संमेलनांतल्यान एकठांय हाडपाचें यत्न परतून एकदां जाल्यार अरिश्टांतल्यान सरकाराक मार्ग दाखोवपी, अर्थीक बळगें दिवपी शंबर हात आसतलेच.
एनआयटीक नवें घर मेळपाक कळाव लागलो, आय आय टी फुडल्या पांच वर्सांनी नव्या घरांत वतली अशी आस्त आसा. शिक्षण विकास म्हामंडळाच्यो येवजण्यो चालीक लावपाक समाजीक संस्थांनी फुडें कित्याक सरचें न्हय? भौशीक गणेशोत्सव मंडळांचो, मठांच्या निधीचो थोडो वांटो शिक्षणाक मेळप शक्य आसा. गोंय सरकाराच्या सचिवांक उद्देग, समाजीक संस्था, कंपनीं कडल्यान शिक्षण, दिव्यांग खातें, समाजीक येवजणी पासत निधी मेळोवपाची तांक आसपाक जाय.
‘म्हजी बस’ येवजणेची बांदावळ नवी, ते बांदावळींतल्या सुदारपांतल्यान (दुरुस्ती) नवे बालरथ विद्यार्थ्यांक मेळपाक जाय. बालरथ येवजणेंत प्रायव्हेट बसवाल्यांक आस्पावन घेवपा खातीर भासाभास करपाक जाय. राज्यांत घराघरांनी चार, स गाड्यो, स्कुटरी, मोटरसायकली येतात तश्योच बशीय व्हड संख्येन रस्त्यार धांवपाक लागल्यात. बशींचें वेळापत्रक चालीक लावप, बशी दर एका गांवां मेरेन पावतात काय ना हाचेर नदर दवरप सी सी टी व्ही यंत्रणे वयल्यान येरादारी खातें, पुलीस खात्याचो येरादारी विभाग करता? शारांतली येरादारीची कोंयडी सोडोवपाक नगरपालिका नागरिकांचे मजतगट कित्याक बांदना? नगरसेवक कितलो वेळ आपआपल्या प्रभागाक दर म्हयन्याक दितात ताचो नियाळ नगरपालिका प्रशासन खातें वा नगराध्यक्ष, महापौरांनी घेतल्यार फक्त उक्तावणाक, बुन्यादीचे फातर घालपाक, सरकारी कार्यावळींक, उत्सवांक नगरसेवकांची हजेरी आसता हें होलमतलें. नगरसेवक थेट हेल्पलायनीचेर कित्याक आसचे न्हय?
रेवडी संस्कृताय लोकसभा, विधानसभा न्हय जाल्यार पंचायत, नगरपालिका वेंचणुकां मेरेन पावल्या हें सत. नगरसेवक, पंच, सरपंचांचें मानधन वाडटा, बसका, भत्तेय तांकां मेळटात, कंत्राटांतल्यान रेवड्यो मेळोवपाचे तंत्रय तांकां खबर आसता. तरणाटे ह्या तंत्रा खातीर नगरसेवक, पंच, सरपंच जावपाक सोदतात. पूण घटनेन स्पश्ट केल्लीं तांची लागणूक, हक तांकां कळटात काय ना हें नागरिकांनी फुडल्या वेंचणुकांनी दारांत मतां मागूंक येतल्यांक विचारचें पडटलें.
सरकार जशें काल नोकरेक लागिल्ल्यांक रोखड्या रोखडो पगार वाडोवन, बडट्यो दिवकं शकना तशेंच प्रायव्हेटय. कंत्राटी नोकऱ्यो सरकारांत दुपेटीन, तिपेटीन वाडल्यात, पूण सरकारी नोकरी मेळची अशें तरणाट्यांक कित्याक दिसता? गोंय मुक्ती उपरांत, राज्य पांवडो मेळटकूच आनी आयजय सरकारी नोकरीच तरणाट्यांक जाय, तेखातीर रिणां काडचीं पडलीं तरी हरकत ना, ही मनाची वृत्ती बदलपाची जापसालदारकी शिक्षक, पालकांची.
अरिश्ट आनी उदरगती वेळार सैम सांबाळपाचीं व्हड आव्हानां येतात. पूल, प्रकल्प उबारतना व्हड संख्येन झाडां लावपाचीं, जमनी गेल्ल्यांक दुसरे कडेन जमीन, घरां दिवपाचीं आश्वासनां वेळार पाळपाक जाय. मोपा विमानतळ जालो, नव्या झुआरी पुलाच्या दुसऱ्या मार्गिकेचें उक्तावण जाता पूण हे उदरगतींतल्यान कितलो फायदो जालो? जातलो? अर्थीक आनी हेर वाटांनी तें गोंय मुक्ती दिसाच्या भाशणांतल्यान लोकांक कळपाक जाय.
दाबोळीच न्हय मुरगांव तालुको टायम बाॅमार बसला. फुटल्यार ताचे परिणाम साश्टी मेरेन दिसतले हें विधानसभेंत आदले मुख्यमंत्री मनोहर पर्रीकार हांणीय सांगिल्लें. भाजपा सरकार सत्तेर येतकीच मोपा विमानतळाची बुन्यादय तांणी घाल्लीं. मुरगावांतली बेशिस्त आळेबंदा हाडपाचें व्हड आव्हान आसा.
सुहासिनी प्रभुगावकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
