भांगरभूंय | प्रतिनिधी
-120 लिजां पर्यावरण संवेदनशील मसुद्यांतल्या गांवांनीपणजीः सध्या गोंयांत आशिल्ल्या 250 खण लिजांतल्यान सुमार 120 लिजां पर्यावरण संवेदनशील वाठार आनी पर्यावरण संवेदनशील वाठाराच्या मसुद्यांत उल्लेख केल्ल्या 99 गांवांनी आसात. हे विशीं निमाणी अधिसुचोवणी जाय मेरेन ही लिजां सुरू करपा संबंदी कसलोच निर्णय घेवंक मेळचो ना. सध्या सरकार फकत सुमार 130 खण लिजां सुरू करूंक शकता अशें खण संचालक नारायण गाड हांणी शेनवारा आमच्या प्रतिनिधी कडेन उलयतना स्पश्ट केलें.
कितल्याशाच वर्सां सावन बंद आशिल्लो खण वेवसाय परतून सुरू करपा खातीर सरकाराचे यत्न सुरू आसात. हे खातीर फाटल्या कांय म्हयन्यांत खण खात्यान कांय वाठारांनी खण लिजांची पावणी केला. होंडा, कोडली आनी कुर्पे-सुळकर्णेच्या खण लिजांची पावणी पुराय जाले उपरांत आतां खात्यान पर्यावरण संवेदनशील वाठारांतल्या खण लिजांचो विचार सुरू केला. पूण ह्या दोन वाठारांनी सुमार 120 लिजां आसात आनी केंद्रीय पर्यावरण संवेदनशील वाठाराच्या मसुद्यांत 99 गांवांचो आस्पाव केला. देखून हे संबंदी निमाणी अधिसुचोवणी जाय मेरेन थंयच्या लिजांचो पावणी करपा खातीर विचार करपाक मेळना अशें गड हांणी सांगलें.
मजगतीं, खण लिजांच्या पावणे उपरांत राज्य सरकारान थंयच्यान खनिज म्हाल काडटना खण लीज धारकांक कसलेच त्रास जावचे न्हय हे खातीर पुराय जतनाय घेतल्या. ह्यो खणी बेगीन सुरू जातले अशेंच तांणी नमूद केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
