भांगरभूंय | प्रतिनिधी
फुकटचें मेळिल्लें कोणाक आवडना? सभावाचो भाग तो. तातूंत तांकां दोशी धरप योग्य न्हय. पूण फुकटेगिरीचो वसो घेतना कोणाक लुटप, भ्रश्टाचार, चोरी, गुन्यांव करप, शोशण करप चुकीचें. तातूंत तो भौशीक पयसो, मालमत्ता आसत जाल्यार ती महाचूक. तिका माफी ना. संबंदिताक ख्यास्त जावपाकूच जाय. तीय बी ताका स्वताक आनी ताच्या लागींच्या लोकांक सासणाची याद उरता तसली. तरातरांचे मोह कित्याक जातात आनी ते टाळपाक कितें करपाक जाय हाचेर खरें म्हणल्यार समुपदेशन जावचें. सरकारी पांवड्या वयल्या भ्रश्टाचारा आड लोक उलयतात, पूण तो जिवो दवरपाक स्वताच योगदान दितात. म्हारगाय, एकमेकां कडेन चलिल्ली सर्त, झेत, वाॅर्र अशा साबार कारणांक लागून थोडे भ्रश्टाचार करपाक लागल्यात. अर्थिकूच न्हय, तर तरातरांचे भ्रश्टाचार! थोड्या सरकारी खात्यांक तर लोक सरळ बोट दाखयतात आनी बरेच खेपे तें सत्य सिद्ध जालां. दिवचले पुलीस स्टेशनाचेर तालांवाची रक्कम बँकेंत भरिनासतना पर्सींत उडोवपाचें धाडस एके बायल पुलिशेन केलां. म्हयनोभर हें कोणाकूच (म्हणजे सामान्य लोकांक) खबर नाशिल्लें. मात, अचकीत प्रसार माध्यमांनी खबर आयली आनी धडाधड चक्रां घुंवपाक लागलीं. ते बायलेक आतां वरिश्ठांनी निलंबीत केल्या. तिणें रक्कम भरिल्ल्याचेंय कानार पडटा. भितर ती एकलीच आसा काय आनीक कोण वांगडा आसात, तें तपासा उपरांत कळटलेंच.
पेपरांनी आयिल्ल्या खबरां प्रमाण, फेब्रुवारी ते आॅक्टोबर 2024 ह्या काळांत हो प्रकार घडलो. पुलीस येरादारी नेम मोडप्यांक तालांव दिताले. त्या चलनाची म्हायती आल्तिनो येरादारी पुलीस मुख्यालयांत धाडची पडटा. तर रक्कम बँकेंत घालतात. तें काम ही बायल पुलीस करताली. ती खंय अर्दीच रक्कम बँकेंत भरताली. आल्तिनोचेर चलना वयलो आनी बँकेंतले रकमेचो आंकडो तपासलो तेन्ना ताचो ताळमेळ बसना जालो. रक्कम थोडी न्हय, 17 लाख 30 हजार रुपया. मागीर चवकशी जाली. त्या वेळार संबंदीत पुलिसाची कोलवाळे बदली जाल्ली. घडये ते खातिरूच तिची बदली केल्ली आसूंक जाय. तिका पयशेय भरपाक सांगलें आसूंक जाय. कारण तिणें गुन्यांव मान्य करून सगले पयशे भरतां अशें सांगलां खंय. मात हें प्रकरण ‘द गोवन’ पेपराचेर आयलें आनी फुडल्यो घडामोडी घडल्यो.
दर 3- 4 म्हयन्यांनी एका तरी पुलिसाचेर गंभीर आरोप जातात. हाका लागून पुलीस खात्याची बदनामी जाता. प्रामाणीक पुलिसूय मागीर निरशेतात. पोरूं खुद्द पुलीस मुखेल्यांचेरूच आरोप जाल्ले. मागीर तांची बदलीय जाल्ली. हालींच हणजूणें पुलीस स्टेशनाच्या तीन पुलिसांक पर्यटकां कडल्यान लांच घेतिल्ल्याच्या कथीत आरोपा वयल्यान निलंबीत केल्यात. दर्यादेगां वयल्या पुलिसांचेर, येरादारी पुलिसांचेर सगल्यांत चड आरोप जातात. म्हणटकच तांणी सांबाळून रावंक नाका? चडांत चड बदली जातली, निलंबीत जाल्यार अर्दो तरी पगार मेळटलो, आमचो आमदार, मंत्री म्हाका सांबाळून घेतलो…. असो मना पसून विस्वास बऱ्याच जाणांक आसता, ताकाच लागून ते मोहाचो खीण दिसलो काय स्वता जावन ताचे लागीं वतात. ताका बळी पडटात. विचार करिनासतना पावलां उखलतात. दिवचल प्रकरणा उपरांत हेर पुलीस स्टेशनांतल्या तालांवाची वळेरी आनी बँकेंतल्या पयशांचो आंकडो तपासपाची गरज आसा. सगलेच तालांव आॅनलायन करपाक जाय. हें सुरूय जालां आसतलें. पूण रक्कम चड आसली काय थोडे ड्रायव्हर निळी नोट भायर काडटात आनी तालांवां पसून मुक्ती मेळयतात. एआय वरवीं चलतात, त्या सिग्नलांचेर कॅमेऱ्याक लागून कोणे येरादारी नेम मोडल्यात तें कळटा. पूण साद्या, किरकोळ चुकांक लागूनय तालांवाची मॅसेज येता. तालांव हे निधी एकठांय करपाचें साधन जावंक जायना. गाडयो चलोवप्यांक शिस्त लागपाक ताचो वापर जावचो. थोडे लोक चार- चार फावटी तालांव पडूनय तो भरिनात. विमोय भरूंक नाशिल्ले आसतले. आॅनलायन तपास केल्यार म्हायती मेळटली. तालांवाचे रकमेची अफरातफर करपी पुलिसाचें निलंबन नाका. तिका बडतर्फ करचें, अशें विरोधी आमदारांचें मत. तशें तांणी राज्यपालांक पत्रूय बरयलां.
वरिश्ठांनी अदीं मदीं पुलीस खात्यांत सान्न मारूंक फावो. नाजाल्यार लोकांक उलोवपाक रान मेकळें जाता. पुलीस हे आमचेच भाव, भयणी. तांकां पगारूय बरो मेळटा. तांणी हांयस टाळपाक शिकूंक जाय. पुलीस भरती, प्रशिक्षण जाता, तेन्ना हाचे धडे नव्या उमेदवारांक दिल्यार चड बरें. फुडलें जोत, तशें फाटलें जोत, ही परंपरा सांबाळपाचो यत्न करपी दिवचलची पुलीस मोहाक बळी पडली. तिच्या घरच्यां सयत सगल्यांकूच मनस्ताप जालो. म्हत्वाचें म्हणल्यार लोकां कडल्यान मेळिल्लो तालांवाचो पयसो सरकारी तिजोरेंत वचपा बदला भलतेच कडेन गेलो. सरकाराक पडिल्लो हो तालांवूच!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
