भांगरभूंय | प्रतिनिधी
गोंय सरकारांत, सत्तेंत आशिल्ल्या राजकी पक्षांत राजनिती बदलपाचें वारें व्हावंक लागलां. घरचे देणें अती जाता हो लेख शेनवारा 7 जूनाक भांगरभूंयत बरयतना सरकार चिंततलें, बदल घडोवन हाडटलें ही आस्त आशिल्ली. ताचे आदीं आदले कला आनी संस्कृती मंत्री गोविंद गावडे, प्रदेश भाजप अध्यक्ष दामोदर (दामू) नायक हांचे कडेन उलयिल्लें. पत्रकारितेच्या मळार राजकी पत्रकारिता करतना राजकारण्यां कडेन थेट उलोवन म्हायती घेवप, विचार उक्तावप म्हत्वाचें. फुडें कितें जातलें तें तेन्ना होल्मता. मंत्रीमंडळांत जाले ना जाल्यार मंत्र्यांच्या खात्यांनी बदल जातले हें फाटल्या वर्सभरांतल्या घडणुकांनी कळटालें.
पोरूं जुलयांत गोंयांत एके कार्यावळीक आयिल्ले तेन्ना केंद्रीय मंत्री नितीन गडकरी हांणी मंत्र्यांच्या खात्याच्या वावराचो नियाळ करून गरज ते बदल करपाची सुचोवणी केल्ली. गोंयच्या राजकारणांतली बारीकसाण शेजारच्या राज्यांतल्या महाराष्ट्र, कर्नाटकांतल्या राजकारण्यांक चड बरी कळटा. नितीनजींचो गोंयांत भाजपाक सत्तेर हाडपाक खातीर व्हड वांटो, गोंयां कडेन तांचें नातेंय आसा. त्या नात्यांतल्यान गोंयच्या राजकारण्यांक ते लागींचे.
मुख्यमंत्र्यांक सुचोवणी करचे आदीं नितीनजी भाजपच्या आमदार, फुडाऱ्यां कडेन उलयिल्ले नासतले व्हय? मुख्यमंत्र्यांच्या, गोंयच्या, केंद्रांत भाजपाच्या गोपांत कितें चल्लां तें तांकां खबर आसता. ते अणभवी, अणभवांतल्यान केल्ल्या सुचोवणेचो लाव सरकाराक जावचो ही तांची मोख आसुये.
पयलींचे कला आनी संस्कृती मंत्री गोविंद गावडे हांणी आदिवासी समाजाच्या सरकारी येवजण्यांतली आडमेळीं फाटल्या तीस दिसांनी पयस करून घेतली. समाजाचे माचये वेल्यान उलयतना आदिवासींच्या कल्याणाच्यो येवजणी, समाजाच्या नेतृत्वाचें उणेपण तांकां कळिल्लें ? समाजा खातीर तळमळ परगटायतना सरकारांत मुख्यमंत्र्यां कडेन आशिल्ल्या खात्याचेर टिका केल्ली हें तांकां खीणभर लक्षांतय नासतलें. तांच्या उतरांचेर जाल्ल्या खवदळा उपरांत मुख्यमंत्री, प्रदेश भाजपाध्यक्षां कडेन उलयतना आपल्याक मंत्रीपद व्हगडावचें पडटलें हें तांकां कळूंक ना? आदिवासी समाजाक नव्या नेतृत्वाची गरज भाजपाचे वांगडी, युनायटेड ट्रायबल असोसिएशनाचे फुडारपण करपी आदले मंत्री प्रकाश वेळीप हांणी उक्तायिल्ली. बोवाळांत आदिवासी समाजांतय एका परस चड पंगड (ग्रुप) आसात हें राज्यांतल्या लोकांक कळ्ळें. तातूंतले तातूंत समजिकाय दाखयिल्ली सभापती रमेश तवडकार हांणी. श्री. गावडे हांचे वांगडा उटा आंदोलनांत बंदखण भोगपी सभापती तवडकार हांकांय मंत्रीपद जाय पूण आपल्याच आदिवासी भावाक दुखोवन न्हय हें तांणी सांगलां. श्री. गावडे हांकां मंत्रीमंडळांतल्यान कुशीक करप म्हळ्यार तांकां पक्षांतल्यान भायर मारप न्हय. एखाद्रे तांचेर वेगळी जापसालदारकी कांय तेंपान येवंक शकता, तांकां केंद्रीय पांवड्यार संद कित्याक मेळची न्हय? तांचें व्यक्तीत्व देश पांवड्यार झगझगूंक शकता, ती तांक तांचे मदीं आसा.
मंत्रीपद नासलें तरी पक्षाचे आमदार म्हणून अस्तित्व दाखोवप, मतदारसंघाच्यो अडचणी मांडून त्यो सोडोवन घेवप ते करूंक शकतात. मंत्रीपदार रावन मतदारसंघा परस खात्यांचो वावर करचो पडटा, राज्यांतल्या लोकां पासत वावुरतना मतदारसंघा कडेन आडनदर जाता. श्री. गावडे मतदारां पासत, आदिवासी समाजा पासत वावुरतले, विरोधकां आड आवाज उठोवपाक अनमनचे ना अशी कार्यकर्त्यांची इत्सा आसतली. कार्यकर्त्यांक विस्वासांत घेवन ते फुडाराची दिका थारयतले. कलेच्या मळारय परतून वतले, शेतकाम, वेवसायाक चड वेळ दिवंक शकतले. वेंचून येत सावन ते मंत्रीपदार आशिल्ले, थोडे उणे पडले आसत पूण राजकी अस्तित्वाची निर्मणी करपाक तांकां येस मेळ्ळां.
एका फोंडें तालुक्याचे खूब मंत्री सरकारांत आयजूय आसात. ज्या तालुक्यांत मंत्री ना त्या तालुक्याच्या आमदारांक मंत्रीपद दिवपाचो विचार सरकारान करपाची गरज आसा. पिराय, शिक्षण, वावर विचारांत घेवन.
आमदार निलेश काब्राल हांच्या खात्याचेर आरोप जाले तेन्ना तांणी मंत्रीपद सोडलें. सकारात्मक रावन सरकारी येवजण्यो तांणी मतदारां मेरेन पावयल्यात. थारायिल्ले प्रकल्प पुराय करपाक ते जैतिवंत जाल्यात. आमदार म्हणून तांचें कामकाज बरें आशिल्ल्यान तांकां परतून मंत्रीपद दिवपा पासत चेपण आसा. तांकां मंत्रीपद दिवप, ना दिवप मुख्यमंत्री थारायतले.
आमदार आलेक्स रेजिनाल्ड लाॅरेन्स हांणी उद्देगीक विकास म्हामंडळाक नवे दिकेन व्हरपाक पावलां मारल्यांत. अपक्ष आसले तरी भाजपा सरकारा बराबर रावन आपल्या मतदारसंघांत उदरगत ते व्हरुंक शकल्यात. मंत्रीपदा परस आमदारांनी मतदारसंघातल्या समेस्तां पासत समेस्त जावन वावुरप म्हत्वाचें. मंत्रीपदा पसून पयस उरुनय मतदारां मेरेन पावंक रेजिनाल्ड हांकां जें येस आतां मेरेन मेळ्ळां तें फुडारांत मेळचें ना अशें न्हय.
2027त कांय आमदारांचे मतदारसंघ बदलचे पडटले, 33 टक्के अस्तुरी राखीवता विधानसभा वेंचणुकेंत आसतली हाची जाणविकाय भाजपा नेतृत्वाक आसा. ते नदरेंतल्यान बदलांची पावलां सरकार मारता. एका मंत्र्यांक सरकारांतल्यान काडटना अणभव, नव्या आमदारांक मंत्रीपदाची संद मेळूंक शकतली, खात्यांतय बदल जातलेच.
2027त 27 भाजपा आमदार विधानसभेर पावोवपाची मोख पक्षा मुखार आसा. राज्य कार्यकारिणी सगल्या समाजांक प्रतिनिधित्व दिवपी आसली तरी कागाळी, तंटे आसतलेच. मंत्री, आमदारां परस कार्यकर्त्यांक कार्यकारिणीर आस्पावन घेवपाचे यत्न जाल्यात. केंद्रांत भाजपा मित्रपक्षांचें सरकार आशिल्ल्यान गोंयच्या बदलपी राजकारणाचो अभ्यास करुन 2027 त 27 हाडपाचे तयारेक आरंभ सरकारान केला. चवथी वेळार, आदीं राजकारणाक, बदलांक नेट येतलो. 2026 वर्स राजकारणांतल्या व्हड बदलांचें आसतलें, कांय व्हड राज्यांच्या वेंचणुकांचेर तें निंबून उरतलें.
उदरगतीचीं पावलां सांबाळून घालतना दिल्लें उतर पाळप सरकाराक आतां म्हत्वाचें दिसूंक लागलां. सरकार फाटीं वता, जात धर्माचें राजकारण वाडटा अशेय आरोप जातले. कांय समाजांतले दोन वटेन आशिल्ले पंगड एकठांय येवंक शकतात तेखातीर मानसीकता बदलून तत्वांक पाळो दिवप गरजेचें.
गोंयचो समाजीक, धर्मीक एकवट आयच्या झुजाच्या खिणाक सांबाळप देशाक आदर्श थारुये अशा वावराची अपेक्षा आसा. गेल्ल्या दिसां परस, आयज आनी फाल्यांक म्हत्व आसा. जाण्ट्यां वांगडा तरणाट्यांक, निश्ठावंतांक आस्पावन घेवपी प्रदेश भाजपा कार्यकारिणी ते नदरेंतल्यान जाल्या. जिल्हो, अस्तुरी समित्यां परस मतदारसंघांतल्यो मंडळ समित्यो म्हत्वाच्यो. मतदार केंद्रा मेरेन तेच समिती कार्यकर्ते वावुरपी. राज्यांतले हेर राजकी पक्ष ते करतले व्हय?
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
