भांगरभूंय | प्रतिनिधी
भांगरभूंय। प्रतिनिधी
वाळपयः सम्राट क्लब इंटर नॅशनलांच्या गोंयांतल्या सम्राट क्लबांनी गांवगिऱ्या वाठारांतल्या कलाकारांक माची मेळोवन दिली. गोंयांत गांवगिऱ्या वाठारांत बरे कलाकार आसात. ताकां आपली कला सादरीकरणा खातीर माची मेळनाशिल्ल्यान ते उजवाडांत येनाशिल्ले. तांच्या कला गुणांक वाट मेकळी करून दिवपाचें काम सम्राट क्लब करतात अशें सम्राट इंटर नॅशनलाचे आदले प्रांताध्यक्ष तशेंच गोंय पर्यटन उदरगत म्हामंडळाचो सरवेवस्थापक दीपक नार्वेकार हांणी सांगलें. वाळपय सम्राट क्लबान आयोजीत केल्ल्या राज्य पांवड्या वयले एकपात्री नाट्याभिनय आनी एकोडी नाच सर्तीच्या इनाम भेटवण कार्यावळींत ते उलयताले.
ह्या वेळार माचयेर नाट्य दिग्दर्शक प्रमोद महाडेश्वर ,सत्तरी पत्रकार संघाचो अध्यक्ष उदय सावंत ,वाळपय सम्राट क्लबाचो अध्यक्ष अशोक काणेकर, सचीव चंदन गांवस आनी भांडारी संजय हळदणकार आशिल्ले. भारतीय संस्कृतीच्या संवर्धनाचें काम सम्राट क्लबान हातांत घेतलां. गोंयांत 35 सुवातांनी सम्राट क्लबांच्या माध्यमांतल्यान हे काम चलता. गांवगिऱ्या वाठारांतल्या कलाकारांक माची मेळोवन दिवपाक जाय हें आमच्या लक्षांत आयलें आनी ते खातीर आमी जायते उपक्रम चालीक लायले अशें नार्वेकार हांणी सांगलें.
कलाकारांच्या फाटीचेर सदांच तोखणायेचो हात पडपाक जाय. ताका लागून तांकां उर्बां मेळटा. सम्राट क्लबाच्या उपक्रमांक लागून गांवगिऱ्या वाठारांतल्या कलाकारांक आपली कला सादरीकरणाची संद मेळटा अशें प्रमोद महाडेश्वर हांणी सांगलें. पालकांनी आपल्या भुरग्यांक माचयेर येवपाची उर्बां दिवपाक जाय अशें उदय सावंत हांणी सांगलें. अशोक काणेकारान सुरवेक प्रास्तावीक केलें. सत्तरी तालुक्याच्या सर्वांगी मळार वाळपय सम्राट क्लबा वेगवेगळे उपक्रम चालीक लायतलो अशें तांणी सांगलें.
सम्राट क्लबान घेतिल्ल्या एकपात्री अभिनय सर्तीत जैतिवंत जाल्ल्या सुप्रिया भाटकार, वैभव सावंत, आदित्य बोटरकार, वैष्णवी वेलिंगकार, सुजय सावंत हांका तशेंच एकोडे नाच सर्तीत जैतिवंत जाल्ल्या दीक्षा कळंगुटकार, कृतिका माळशेकार, रुद्रानी नायक, संतोषी गांवस, रबिया खान, फातिमा खान, सुमीत नायक हांका इनामां आनी प्रशस्तीपत्रकां मानेस्तांचे हस्तुकीं भेटयलीं. एकोडी नाचाचे परीक्षण आर्या जोशी आनी अंकिता गांवस आनी एकपात्री सर्तीचें परिक्षण सुभाषचंद्र गांवस आनी अनिकेत नागरे हांणी केलें. सूत्रसंचालन अनुराधा म्हाळशेकारान केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
