समुपदेशन गरजेचें

भांगरभूंय | प्रतिनिधी

वेसनां, चंगळवाद, ताण, निर्शेवणी पलतडी जिवीत आसा, हें विद्यार्थ्यांनी जाणून घेवचें.  

बिट्स पिलानीचो गोवा कॅम्पस सध्या चर्चेंत आसा. कारण मरणां. फाटल्या 10 म्हयन्यांत थंय पांच विद्यार्थी मरण आयिल्ले अवस्थेंत मेळ्ळ्यात. भोवतेक मरणांची आत्महत्या म्हूण नोंद जाल्या. पुलीस तपास करतातूच, पूण सरकारानूय खास समिती तयार केल्या. ही तंत्रज्ञान संस्थाय चवकशी करता. कॅम्पसांत जें कितें जालां, तें गंभीर. ह्या मरणां फाटलें सत्य सोदपाकूच जाय. कारण गोंयच्या शिक्षण मळाचेर हाचो परिणाम जावंक शकता. हाॅस्टेलांत पांचवें मरण जालां, तें बंगळुरूच्या ऋषी नायराचें. 19 वर्सांचो तो तरणाटो. खबरो आयल्यात, ताचे प्रमाण तो खंय डिप्रेशनांत गेल्लो. ताचे इश्टीणीन अडेज म्हयन्यां पयलीं खंय आत्महत्या केल्ली. पुलिसांक ऋषीची ओंकारी मेळ्ळ्या खंय. घडये ताका वखदांचो ओव्हरडोज जाला आसतलो. बिट्स पिलानींत शिकपी भोवतेक भुरगे गोंयां भायले. ताका लागून ह्या पांचूय मरणाच्यो खबरो राष्ट्रीय पांवड्या वयल्या सगल्या दिसाळ्यांनी आयल्यात. गोंयची बदनामी जाल्या. आयआयटी, आयटी आनी हेर अभ्यासक्रमाच्या संस्थांनी अश्यो घडणुको घडूंक नात. म्हणल्यार अशीं फाटोफाट मरणां. मात ताण, तणाव, निरशेवणी असल्या भावनां विशींच्यो घडणुको घडल्यात. गोंयांतली ही गजाल वेगळी. फक्त सरकारानूच न्हय, तर समाजान, जाणकारांनी हाचेर उपाय सुचोवंक जाय. मुख्य म्हणल्यार ते चालीक लावपाक जाय.

पोरूं डिसेंबरांत ओमप्रीय सिंगाक मरण आयलें. कारण- मानसीक ताण खंय. अंदूं मार्चांत अथर्व देसाय फांस लायिल्ले अवस्थेंत मेळ्ळो. ती आत्महत्या असो दुबाव तपास यंत्रणांक आसा. मे म्हयन्यांत कृष्ण कसेरा परिक्षा चालू आसतना गोळाक हुमकळटना मेळ्ळो. आॅगस्टांत कुशाग्र जैनाक न्हिदेंत मरण आयलें. हे सगले 20- 22 वर्सांचे तरणाटे. आवय- बापायन तांकां आपल्या काळजाचेर फातर दवरून इतले पयस शिकपाक धाडिल्ले. तांचे विशीं सपनां पळयिल्लीं. आयज तीं सगलीं तुटल्यांत. मातये भरवण जाल्यांत.  

उच्च शिक्षण घेवन उंचेल्या पदाचेर काम करपी तशे भिवकुरे मानसिकतायेचे आसनात. तांणी आत्महत्या केली? केली जाल्यार कित्याक? काय त्यो आत्महत्या नाशिल्ल्यो? परिक्षा कठीण आशिल्ली? नापास जावपाचो भंय आशिल्लो? पूण जीव दिवप हो ताचे वयलो उपाय न्हय? चडश्यांक दिसता मानसीक ताण आनी निर्शेवणेक लागून हें जालां. हो ताण परिक्षेचो, फुडाराचो. परिक्षा कठीण आसली जाल्यारूच तो बरो अधिकारी जाता? संवसारांत सगल्यांत हुशार पूण वृत्तीन सकयल्या पांवड्याचो आसल्यार पयलो नंबर कितें कामाचो? आयआयटी आनी हेर अभ्यासक्रमांचेर फेरविचार जावंक जाय. तो इतलो कठीण कित्याक? बरी टक्केवारी आसल्यारूच प्रवेश, ती मेळोवपाक म्हारग ट्युशनां…. संस्थेचीय एकूणच ठेवण बदलूं येता? सुदारीत अभ्यासक्रम लावं येता? ह्या एकूण प्रकारांत संस्थात्मक आडनदर आसा अशेंय मत काय जाणकारांनी उक्तायलां. हाॅस्टेलांत रावपी चले, चलयांची वागणूक, तीं खंय वतात, कितें करतात ताचे कडेन संस्था, हाॅस्टेलाच्या वाॅर्डनाचें लक्ष नाका? 

समाजांतल्या सगल्याच थरांचेर सर्त वाडल्या. कुटुंबा पसून पयस रावप, एकाकीपण, बंदिस्त जागो, अभ्यासाचो ताण ह्या कारणांक लागून तणाव वाडूं येता. मोगाचीं प्रकरणां आतां हायस्कुलांनी पावल्यांत. बिट्स पिलानीच्या कॅम्पसाचो अंतर्गत नियाळ घेवपाची प्रक्रिया सुरू जाल्या. सरकारानूय जिल्होधिकाऱ्याची  समिती नेमल्या. विरोधकांनी विशेश कृती दळ नेमून चवकशी करपाची मागणी केल्या. हाॅस्टेलांनी रावपी भुरग्यांक रॅगींग करपाचेंय वेसन आसता. हालींच कांय भुरगे एकल्याक बडयतनाचो उत्तर भारतांतलो व्हिडियो व्हायरल जाला. विद्यार्थ्यांचें समुपदेशन गरजेचें. जाणकार, हेल्पलायनूय जाय. बिट्स पिलानींत विद्यार्थ्यांचो गट केला. ते एकमेकांची चवकशी करतात. तांच्या मनांतलें जाणून घेतात. कोणेय आपलीं सुखा- दुख्खां एकमेकां कडेन वांटून घेत जाल्यार तणाव उणो जाता. वेसनां, चंगळवाद, ताण, निर्शेवणी पलतडी जिवीत आसा, हें विद्यार्थ्यांनी जाणून घेवचें.