समान नागरी कायदो: सगल्यांक विस्वासांत घेयात

भांगरभूंय | प्रतिनिधी

समान नागरी कायदो लागू जायत जाल्यार शिक्षण आनी नोकऱ्यां मदलें आरक्षण रद्द जातलें असोय कांय जाणांचो समज आसा. पूण आरक्षण आनी समान नागरी कायदो हाचो कसलोच संबंद ना. दोनूय विशय वेगळे आसात.

देशांत समान नागरी कायदो लागू करपाचो निर्णय केंद्र सरकारान घेतला. ते विशींच्या हालचालींक गती आयल्या.
 2024 वर्सा जावपी लोकसभा वेंचणुके पयलीं देशांत समान नागरी कायदो लागू जातलो अशें म्हणिल्लें तें आतां खरें जातना दिसता. घडये येता त्या पावसाळी अधिवेशनांतूच हे विशींचें विधेयक केंद्र सरकारा वतीन मांडपाची शक्यताय आसा.
देशांत समान नागरी कायदो लागू करचो ही आतांचीच मागणी नासून ती खूब पोरणी आसा. ताचेर वेळावेळार चर्चा लेगीत जाल्या. पूण ह्या वेळार केंद्र सरकार हो कायदो मंजूर करून घेवपाचे तयारेंत आसा अशें दिसून येता. म्हणूनच ह्या मुद्या वयल्यान देशांत वातावरण तापिल्ल्याचें चित्र पळोवंक मेळटा. 22 व्या विधी आयोगान समान नागरी कायद्या विशीं लोकां कडल्यान सुचोवण्यो आनी हरकती मागयिल्ल्यो. ताका लाखांनी लोकांनी प्रतिसाद दिवन हरकती आनी सुचोवण्यो नोंदयल्यात. कांय जाणांनी ह्या कायद्या विशीं फक्त लोकांनीच न्हय जाल्यार राजकी पक्षांत लेगीत मतभेद आशिल्ल्याचें पळोवंक मेळटा. विशेश म्हणल्यार ज्या विधी आयोगान हो विशय हातांत घेतला, तातूंत लेगीत ह्या विशयाचेर मतभिन्नताय आसा. सद्याच्या 22 व्या विधी आयोगाच्या मतान हो कायदो देशांत लागू जावंक जाय. जाल्यार हाचे पयलींचो म्हणल्यार 21 व्य विधी आयोगान हो कायदो अनावश्यक आशिल्ल्याचें मत उक्तायिल्लें.
हो कायदो लागू करपा फाटल्यान भाजपाचो हेतू नितळ नाशिल्ल्याचो आरोप विरोधकां वतीन जायत आसा. समान नागरी कायदो लागू करून हिंदू-मुस्लीम धर्मा भितर तेढ निर्माण करप आनी त्या बळग्यार 2024 ची वेंचणूक जिखप असो भाजपाचो डाव आशिल्ल्याचो आरोप विरोधक करीत आसात. जाल्यार आमचो देश एक कुटूंब आसून एकाच कुटुंबांतल्या वांगड्यां खातीर वेगळेवेगळे कायदे आसपाचें कारण कितें? सगल्यां खातीर एकूच कायदो जाय अशें मत भाजपाचें आसा. वट्ट समान नागरी कायद्या खातीर पुराय देशांत खूबशे मतभेद आसात. म्हणूनच सरकारान हो निर्णय ताकतिकेन घेनासतना देशांतल्या सगल्या घटकांक विस्वासांत घेवनूच घेवंक जाय.
आमच्या देशांत सगल्या धर्मांक आनी तांच्या धर्मीक स्वातंत्र्या प्रमाण लग्न, वारसो हक्क, दत्तक घेवप, घटस्फोट बी विशयांचेर आपआपल्या धर्मा प्रमाण निर्णय घेवपाचो अधिकार दिला. जर समान नागरी कायदो लागू जालो जाल्यार लग्न, वारसो हक्क, दत्तक घेवप, घटस्फोट ह्या गजालींनी सगल्या धर्मां खातीर एकूच कायदो लागू जातलो.
सद्या हिंदू, बौद्ध, जैन, शीख ह्या धर्मां खातीर हिंदू लग्न कायदो लागू आसा. जाल्यार मुस्लीम आनी क्रिस्तांव धर्मां खातीर वेगळे कायदे आसात. फक्त मुस्लीम आनी क्रिस्तांव धर्मूच न्हय जाल्यार ईशान्य भारतांत 200 जातीं मदीं लेगीत तांचे परंपरे प्रमाण स्वताचे कायदे आसात. जर समान नागरी कायदो लागू जालो जाल्यार तांचो लेगीत ह्या कायद्यांत आस्पाव जातलो. ह्या 200 जातींक संविधानान संरक्षण दिलां. जर तांचोय ह्या कायद्यांत आस्पाव जालो जाल्यार थंयच्या लोकांची खर प्रतिक्रिया उप्रासतली.
सद्या मणिपूर पेटलां. अशा वेळार जर हो निर्णय जालो जाल्यार त्या उज्यांत तेल ओतपाचेंच काम जातलें. समान नागरी कायदो लागू जायत जाल्यार शिक्षण आनी नोकऱ्यां मदलें आरक्षण रद्द जातलें असोय कांय जाणांचो समज आसा. पूण आरक्षण आनी समान नागरी कायदो हाचो कसलोच संबंद ना. दोनूय विशय वेगळे आसात. समान नागरी कायदो हो फक्त विवीध धर्मांच्या लग्ना विशींचो धर्मीक कायद्यांत समानताय हाडप हो आसा. पूण होच खरो कळीचो मुद्दो आसा. ताका लागून हो विशय सरकारान खूब गंभीरतायेन हाताळूंक जाय. कायदो लागू करचे पयलीं देशांतल्या सगल्या घटकां कडेन, राजकी पक्षां कडेन तशेंच धर्मीक फुडाऱ्यां कडेन चर्चा करूंक जाय. कायद्या विशींची रुपरेखा ह्या घटकांक समाजान सांगूंक जाय. सगल्यांक विस्वासांत घेवनूच ह्या कायद्या विशीं पावलां उबारूंक जाय. बळजबरीन वा जबरदस्तीन पाशवी भोवमताच्या बळार हो कायदो लागू केल्यार देशांत अराजकतां माजतली हें निश्चीत.

श्याम ठाणेदार
9922546295