समान नागरी कायदो जावचो ??

भांगरभूंय | प्रतिनिधी

गोंयच्या समान नागरी कायद्यान बायलांचेर सुद्धा अन्याय केल्लो आसा. हे आमका गोंयकारांक पसून खबर ना. काय आदल्या मंत्र्यांक वा आदल्या न्यायाधीशाक जाय म्हणून हो कायदो आदर्श जायना.

लोकसभेचे 2024 चे वेंचणुकेची बडी धोलार पडचे पयलीं, वेंचणुकेचो बोवाळ आयकूंक येवपाक लागला. म्हारगाय,
भ्रश्टाचार, फॅमिलीराज, रोजगार अश्या लोकांक भेश्टावपी प्रस्नांक फाटो दिवन, नवो प्रस्न आयज तयार जाला. तो म्हणजे ‘समान नागरी कायदो’. सत्तेर आशिल्लो पक्ष, भाजपान हो प्रस्न खूबच गंभीरपणान घेतला, अशें दिसता. समान नागरी कायदो देशांत लागू जाल्यार देशाचे सगले प्रस्न सुटावे जातले काय?
संविधानाच्या 44 व्या कलमा नुसार सगल्या नागरिकांक समान नागरी कायदो लागू करचो, अशें म्हणलां. भाजपाचे कार्यकर्ते, बरे मागपी आनी भौसंख्याक विचारसरणीचे लोक ह्या कलमा कडेन बोट दाखोवन हें बेगोबेग लागू जावचे, अशी मागणी करतात. पूण डायरेक्टीव प्रिन्सीपल ऑफ स्टेट पॉलिसी (संविधानांतली निर्देशक धोरणतत्वां) कलम 25 त दिल्ल्या नागरिकांच्या मूलभूत हक्का आड वचूंक शकनात, हे लक्षांत घेवन जाय.
Art. 25 (Freedom of conscience and free profession, practice and propogation of religion. दोन दिसा पयलीं ‘दस्तरखूद’ प्रधानमंत्री नरेंद्र मोदी हांणी तर हो कायदो जाता तितले बेगीन लागू जावंक जाय, अशें मत उक्तायलां. प्रधानमंत्र्यांक जाय तर कितेंय जावंक शकता, हाचो अणभव आमी घेतिल्लो आसा. म्हजे माहिती प्रमाण फाटल्या कायदो आयोगान ह्या कायद्याची गरज नाशिल्ल्याचें 2018 वर्सा स्पश्ट केलां. त्या कायद्याचेर लोकां कडल्यान सुचोवण्यो परत्यो कित्याक मागतात, हाचे फाटलो हेत दुबावांत घालता. फाटल्या आठ वर्सांत सरकारान व्हड- व्हड निर्णय घेतले. – डिनोमिनेशन, लॉक डावन, शेतकी विधेयक…. पूण लोकांच्यो सुचोवण्यो घेवंक ना, तर आतांच हें कित्याक हो प्रस्न उप्रासता.
लोका कडल्यान सुचोवण्यो मागोवच्या पयली समान नागरी कायदो म्हणजे किते? त्या संबंदीची माहिती सरकारान दिसाळ्यांनी प्रसीद्ध करची. तशेंच सरकाराक लोकां कडल्यान कसली अपेक्षा आसा, ताची माहिती लोकांक दिवची. 2021 वर्सा गोंयचे दोन जेष्ठ पत्रकार प्रकाश कामत आनी सुहासिनी प्रभुगांवकार हांणी हे संबंदी ‘भांगरभूंय’ त सुंदर माहिती दिल्ली. पूण ताचेर जाय तशी प्रतिक्रीया वाचूंक मेळळी ना. लोकां कडल्यान माहिती मागप एकदम बरें. लोकशाय पद्दत, त्या निमतान कायदो वाचपाची संद लोकांक मेळटली.
काय समुदायांच्या वैयक्तीक कायद्या बदला, पुराय देशाक एक समान नागरी कायद्या सकयल हाडटना, संविधान तज्ञ, विचारवंत, बायलांचे प्रतिनिधी, राजकी पक्ष, सगल्या कडेन भासाभास जावंक फावो. गोंयचो कायदो आदर्श न्हय, अशें जाणकार म्हणटात. तातूंत खूबश्यो त्रूटी आसात. समान नागरी कायदो लागू करचे पयली त्या त्रुटींची नोंद घेवप, खूब म्हत्वाचें. गोंयच्या समान नागरी कायद्यान बायलांचेर सुद्धा अन्याय केल्लो आसा. हे आमका गोंयकारांक पसून खबर ना. काय आदल्या मंत्र्यांक वा आदल्या न्यायाधीशाक जाय म्हणून हो कायदो आदर्श जायना. सगल्या आंगांनी चर्चा करून ताची अमंलबजावणी करची आनी समुदाया भितर गैरसमज जावचे न्हय हाची जतनाय सरकारान जरुर घेवची.

रवींद्र फोगेरी,
गणेशपुरी, म्हापशें