समाज माध्यमां हीं मनीस जोडपा खातीर वापरया !

भांगरभूंय | प्रतिनिधी

समाज माध्यमां मनश्यां आनी मनां जोडपा खातीर वापरया, तोडपा खातीर न्हय. दुस्मानकाये खातीर न्हय, इश्टागती खातीर वापरया.

पिडिलायट इंडस्ट्रीज हे नामनेचे भोवराश्ट्रीय कंपनीत हांवें कांय काळ काम केलां. फॅविकॉल हो हे कंपनीचो नामनेचो
ब्रँड. ‘यह फॅविकॉल का मजबुत जोड है, टुटेगा नहीं’ अशी हे कंपनीच्या जायरातींत एक टॅग लायन आसता. दोन विंगड लाकडी घटकांक घट्ट जोडून दवरप हो फॅविकॉलाचो धर्म.
तंत्रज्ञान दिसान दीस समाज माध्यमाचीं नवीं नवीं व्यासपिठां संवसारभरच्या लोकांक उपलब्ध करून दित आसा. समाजाक एका धाग्यान बांदून दवरपाची प्रभावी शक्त समाज माध्यमांत आसता. शेणिल्लीं नातीं परतून जुळोवपाची आनी तुटिल्लीं नातीं जोडपाची प्रचंड तांक समाज माध्यमांनी वेळावेळार सिद्ध केल्या. जे तरेन दोन लाकडाचे कुडके घटमूट जोडपाचें काम फॅविकॉल करता, तेच तरेन समाजीक मळाचेर दोन मनश्यांक जोडपाचें काम तंत्रज्ञानाच्या आदारान समाज माध्यमां वरवीं जावपाक जाय. नामनेचे उर्दू कवी बशीर बद्र हांची ‘इसी शहर मे कई साल से मेरे कुछ करीबी अजीज है, उन्हें मेरी कोई खबर नहीं, मुझे उनका कोई पता नहीं…’ अशी आयच्या धकाधुकीच्या काळांतली नात्यांची अवतिकाय दाखोवन दिवपी एक कविता आसा. तंत्रज्ञानान समाज माध्यमां वरवीं पयसावपी हीं नाती लागीं हाडपाची संद आमकां तयार करून दिल्या. तिचो आमी योग्य उपेग करून घेवपाक जाय. पूण दुर्दैवान, वास्तवांत तशें घडिल्लें दिश्टी पडना. समाज माध्यमांचो वापर दुसऱ्यांची उणीं- दुणीं काडपाक, फटीच्या आनी दुस्वासाच्या पोस्टांनी दुसऱ्याक बदनाम करपा खातीर कांय जाण करतात. आपल्या विकृत पोस्टांनी कोणाची तरी नाहक बदनामी जाता, तांतूंतल्यान दुसऱ्याक मनस्ताप जाता हाचें भान हे लोक दवरनात.
मनीस गुलाम जाता
फाटी एका राजकी फुडाऱ्याच्या सांगातान एके चलयेचो फोटो व्हायरल जालो. राजकीय फुडाऱ्याचें चारित्र्य हनन करपाच्या यत्नांत त्या निश्पाप अस्तुरेचो चेहरोय बदनाम जाता म्हणपाचें सोयरसुतक कोणेंच दवरलें ना. समाज माध्यमांचेर जे तरेची भास कांय जाण वापरतात ती खात्रेन सभ्य लोकांनी उलोवपाची वा आयकुपाची नासता. आपल्या दुस्वासी पोस्टांतल्यान आपल्या स्वकियां कडेन आशिल्ल्या नात्यांत दुराय येवं येता म्हणपाचें भान हे लोक दवरनात. एकदां हो दुस्वासाचो विशाणू मनांत भरलो म्हणटगीच उपरांत तो मनश्याक आपलो गुलाम करून घेता. जाणें आपल्याक कसलीच अपेक्षा बाळगिनासतना आदार केला ताका लेगीत वायट उतरां वापरपाक तो मागीर फाटीफुडें पळयना. कारण तो मानसीक नदरेन कफल्लक जाल्लो आसता.
मनीस तोडपाचें माध्यम
मनीस जोडपाच्या हावेसान आरंभ जाल्लें ‘फेसबूक’ हें समाज माध्यम आयज मनीस तोडपाचें माध्यम जालां. ह्या व्यासपिठार बुद्धीक गिरेस्तकाये परस खाकनवाळपणच चड दिसून येता. फेस म्हणल्यार चेहरो आनी बूक म्हणल्यार कोंकणी भाशेंत हिशेबाची पटी वा पुस्तक. फेसबुक युजराचो चेहरो ताच्या पोस्टांतल्यान ताच्या संस्कार पुस्तकांत वा हिशेब पटयेंत दिसपाक जाय. ताचे बुद्धीक गिरेस्तकायेचें दर्शन ताच्या फेसबूक पेजीर ठळकपणान घडपाक जाय. पूण मुळांत ‘आडातच नाही तर पोहऱ्यात कुठून येणार?’ हे मराठी ओपारी सारखें कट्टुलांतच ना जाल्यार फेसबुकार वा हेर समाज माध्यमांचेर तें कशें दिश्टी पडटलें?
खरें, बरें मेळूंक जाय
समाज माध्यमांचो उपेग भोव हुशारकायेन, समाजिकायेन आनी एकामेकांचो आदर- सन्मान राखून जावंक जाय. समाज माध्यमांचेर तुमकां फॉलो करप्यांक कितें तरी नवें, खरें आनी बरें अशें जिविताच्या उपेगाचें सारें मेळपाक जाय. कलाकारांनी समाज माध्यम म्हणल्यार आपली सर्जनशिलताय सवंसारा मुखार दवरपाचें व्यासपीठ म्हूण पळोवंक जाय. कवी आसत जाल्यार ताणे लोकमनांक भावतल्यो आनी जागृत करतल्यो अश्यो कविता पोस्ट करून ताचेर वाचकांच्यो प्रतिक्रिया घेवपाक जाय. या प्रतिक्रियांचो वापर आपले कलेच्या गुणात्मक वाडी खातीर करपाक जाय. कोणाचीय निंदा नालस्ती करपाच्या हावेसान पोस्ट केल्ल्या कवितांक चड लायक मेळनात, बरोवण्याची लायकी मात्त कळटा. चित्रकार, लेखक, छायाचित्रकार हांकां समाज माध्ममां वेल्या जाणकारांचें योग्य तरेन मार्गदर्शन मेळपाक जाय. तशें करतना इश्ट आसल्यार चूक दाखोवन दिवपाचें आनी बरें आसल्यार दुस्मानाची लेगीत तोखणाय करपाचें व्हड मन जाय! भित्रो मनीस समाज माध्यमांचेर थोमण्यांच्या भाशेन लिपून रावन दुसऱ्यांचेर टिका करता. संस्कारी मनीस अश्या पोस्टांक किंकोत करता. पूण आपल्या पोस्टान दुसऱ्याक मनस्ताप जावं येता हाचें भान चुकीचे, फटीचे, दुस्वासाचे, थोमण्यांचे पोस्ट घालतल्यांनी मतींत दवरपाक जाय.
खर कायदे जाय
जेन्ना इतिहासीक म्हत्वाच्या फुडाऱ्यांक फटीच्या म्हायतीचो वापर करून बदनाम करपाचे यत्न जातात तेन्ना तांचेर खर कारवाय जावपा सारखे कायदे तयार जावपाक जाय. इतिहास तोडून फोडून समाज माध्यमां वरवीं खरो दाखोवपाचो दुर्दैवी यत्न जाता आनी तो खरो मानपी लोकांची संख्या वाडटा. समाज माध्यमांवेली ही म्हायती फाल्यांची पिळगी खरें मानतली आनी तांच्या खांद्यार बसून हे फटासवीर एका पिळगे कडच्यान दुसरे पिळगे मेरेन अमर कशे भोंवत रावतले ही भिरांत आसा. समाज माध्यमाचेर एकामेकांच्या मतांचो, विचारांचो, अभिव्यक्तीचो आदर करपाक शिकया. समाज माध्यमाचो तोच तर खरो उद्देश आसा.
हारवर्ड विद्यापिठाच्या विद्यार्थ्यांक एकामेकां कडेन जोडपा खातीर मार्क जुकरबर्गान फेसबुकाची स्थापना केल्ली. आज फेसबूक आसत वा व्हॉटस्अॅप ह्योच व्हड युनिव्हर्सिटी जाल्यात. तिचे कोट्यांनी युजर अर्थकारण, राजकारण, पर्यावरण, इतिहास आदी विशयांचे ‘स्वयंघोशीत तज्ञ’ जावन आपल्या बेगडी हुशारकायेचें प्रदर्शन करीत आसतात. समाज माध्यमां मनश्यां आनी मनां जोडपा खातीर वापरया, तोडपा खातीर न्हय. दुस्मानकाये खातीर न्हय, इश्टागती खातीर वापरया. ‘ये जोडे रिश्तों को भी…’ हें फॅविकॉलाचे जायरातींतलें वाक्य समाज माध्यमांकय लागू करया.

अनंत अग्नी
9422439903