समाजीक प्रस्नांतलो एआय सिनेमा

भांगरभूंय | प्रतिनिधी

समाजीक प्रस्नांचेर आपले उमाळे उक्ते करपाची मनशाची लागणूक. ती मांडपाक दिसाळीं, पुस्तकां वांगडा सिनेमा, तंत्रज्ञानय आसा.

इफ्फींत (भारताचो आंतरराष्ट्रीय सिनेमा उत्सव) ए आय (आर्टिफिशल इंटेलिजन्स) चीं ल्हारां जळींमळीं दिसलीं. इफ्फीची साठी लागीं येतना तंत्रज्ञानांतल्यान मनशाचे उमाळे, समाजीक प्रस्न मांडपी, सोडोवपी नवीं ल्हारां घरांत पावतात गुरु शिश्यांचे परंपरेंतल्यान. ती ज्येश्ठनीत.
बांदकाम वेवसायाचे शिमेंत आशिल्ली लार्सन अँड टुब्रो कंपनीची एल अँड टी मायंड ट्री ही कंपनी म्हायती तंत्रज्ञान, ए आय फांट्यांन व्हड जाता. ए आय चो उपेग करून समाजीक प्रस्न कशे सोडोवप ते विशीं मार्गदर्शन करपी सिनेमाक उर्बा दिवपाक फुडें सरपी कंपनींनी मुखेल वांटो एल अँड टी मायंड ट्री चो. दिग्दर्शक, शेखर कपूर हांचो मासूम – 2 सिनेमा घोडे ते कासये मेरेन ए आय तल्यान ल्हान जातलो हो रकाद 56 वे इफ्फींत मेळ्ळो. इफ्फी गोंयांत थिरावता तेन्ना तो ज्येश्ठ, अणभवान वरिश्ठ भारतीय दिग्दर्शक, निर्मात्यां कडेन वता हें कळ्ळें. सिनेमांतले गुरु शिश्य पंरपरेचो लाव गोंयांक घेवचो पडटलो.
समाजीक प्रस्नांचेर आपले उमाळे उक्ते करपाची मनशाची लागणूक. ती मांडपाक दिसाळीं, पुस्तकां वांगडा सिनेमा, तंत्रज्ञानय आसा. मेकळ्या सुवातींनी लायिल्ल्यो टीव्हीच्यो व्हड स्क्रिनी, उणी जावपीं आडमेळीं इफ्फीचो फुडार सिनेशिक्षणाक उर्बा दितलो असो रकाद दिवपी.
सिनेमा घरांत येता, सिनेमा तुमचो फुडार हें 56 व्या इफ्फीन तरणाट्यांक कळीत केलां. इफ्फींत एका तेंपार फकत ज्येश्ठां खातीर (18 वर्सांवयल्या) सिनेमा चड आसताले. सवकासायेन बदलपी इफ्फींतलो सिनेमा घरा मेरेन पावोवपाची खासा ओटीटी चॅनल्साची माची व्हड जाता. तेन्ना सरकार तांचो उपेग उदरगतीची अचूक म्हायती, विशय मांडपाक पावोवपाक करता. इफ्फींतल्या अंदूच्या सिनेमांनी ताची जाणविकाय करून दिली. फुडारांत इफ्फी फकत सिनेमाचें स्पेशल स्क्रिनिंग, प्रिमीअर्स, सर्तींत इनामां जोडिल्ले सिनेमा, प्रदेशीक आनी समाजीक प्रस्न मांडपी, सोडोवपाची माची जातली. इतिहास लेगीत संगीताक तंत्रज्ञानाची जोड दीत इफ्फींत नव्या सिनेमांतल्यान दिसतलो.
किद्याक 60 वर्सांवयले पिरायेचे कलाकार आमीर खान, दिग्दर्शक शेखर कपूर, राजकुमार हिरानी, कमल हसन, रमेश सिप्पी, सुहासिनी मणीरत्नम इफ्फी तेंपार येतात? तांकां घेवन येवपी तांचे शिश्य, विद्यार्थी, तांच्या मार्गदर्शनांतल्यान नवी माची घडयतात. ज्येश्ठांच्या बळग्या बगर इफ्फी मुखार कसो वतलो? इफ्फीचे संचालक शेखर कपूर सिनेमोगी (पॅशन) म्हणून दायजांतल्यान इफ्फींत आयल्यात. विद्यार्थी घडयतना नव्या तंत्रज्ञानांतल्यान सिनेमाची मांडावळ करतात. ए आय येता तेन्ना सिनेमा तंत्रज्ञाना पासून पयस कसो उरतलो? जायराती, समाजीक प्रस्न मांडपा पासत ल्हान सिनेमाची बांदावळ जातना ए आय भोव उपेगी जातलें मात ताका मनशाच्या विचारांची जोड मेळपाची गरज आसा. एआयचे बांदावळींतलो खासा सिनेमा पळयतना गोंयच्यो दर्यादेगो नितळ दवरपाक त्या सिनेमाचो उपेग जावंक शकता हाची जाणविकाय जाली. एल अँड टी मायंड ट्रीचो ल्हानसो सिनेमा कोयर वेवस्थापनाचें शिक्षण दिवपी, प्लास्टिक, कोयराच्या राशींनी दर्यादेगो म्हेळ्यो कशो जातात तें दाखोवपी, उपाय सुचोवपी ए आय तंत्रज्ञानांतल्यान केल्लें कार्टुन फिल्म विशय, आवाजांतल्यान संवसारीक विशय मांडटा.
परंपारीक भारतीय संगीत नव्या वाद्यांची, भेसाची जोड दिवन तिगूंक शकता तेंय दायजांतल्यान, उतरां मोलाचीं असो रकाद दिवपी दिग्दर्शक राजेंद्र तालक हांचो क्लाव्डीया सिनेमा संवसाराक भावतलो. क्लावडियाचो विशय, कलाकारय संवसारीक.
इफ्फी फकत सिनेमा पळोवपाचो न्हय सिनेमाच्यो काणयो, निर्मणेंत आशिल्लो सिनेमा विकपाचें, नव्या देशांची माची मेळोवपाचो उत्सव, बाजार. दायज, परंपरेंतल्यान भायर सरतना नवें तंत्रज्ञान आपणावन तिगूंक शकता तेखातीर सिनेमाचें माध्यम आसा. ल्हान सिनेमा (शाॅर्ट फिल्म) विशय फकत वयलेवयर हातासता, पुराय लांबायेचो सिनेमा चडांत चड सवाय वराचो जाल्यार तो भावतलो, फुडाराचीं सपनां दाखयतलो. इफ्फी तेपासत नवे बांदावळींत वता, माचयो पन्नास जातात तेन्ना सगल्यां उक्त्या आंगणांतल्यान दायज, फुडार दाखोवपाचो यत्न हे इफ्फींत जालो.
भारतांतले मुळावे कलेक, कलाकारांक माची इफ्फींत मेळ्ळी, कलाकार दायजांतले आनी नवे परंपरेंतलें. विदेशी निर्माते, दिग्दर्शक, कंपन्यो तांचो कितलो उपेग करतल्यो? जोडनिर्मणेची नवीं कवाडां उक्तींच न्हय व्हड जातात तेन्ना देसाच्या अर्थकारणाक बळगें मेळटा. तीच तर ज्येश्ठनीत, परंपरा मोडत ए आय मेरेन वचपी.

सुहासिनी प्रभुगांवकार
9881099260