भांगरभूंय | प्रतिनिधी
किशोर नायक गांवकार: मडगांवां मनयलो कोंकणी पत्रकार दीस
मडगांव : पत्रकारांची समाजीक बांधिलकी जशी आसता तशी समाजाची पत्रकारांकडे बांधिलकी आसपाक जाय. समाजान पत्रकाराचेर विश्वास दवरुन तांकां आदार दिवपाक जाय. पत्रकार समाजाच्या बर्या खातीर काम करता त्या वेळार समाजानय ताचे फाटल्यान खरपणान उबें रावप तितलेंच म्हत्वाचें आसता. अशें जाल्यारूच एक बरो पत्रकार घडपाक शकता, अशें गोवन वार्ता लाईव्हचे संपादक किशोर नायक गांवकार हांणी कोंकणी भाशा मंडळाच्या सभाघरांत मुखेल सोयरे ह्या नात्यान उलयतना सांगलें.
फा. फ्रेडी जे दा कॉस्ता मेमोरियल ट्रस्ट, कोंकणी भाशा मंडळ, फॅलिसियो कार्दोजाचे पाटलावदार, हांच्या जोडपालवान गुलाब पुरस्कार, कोंकणी पत्रकार दीस कार्यावळीचें आयोजन केल्लें. ह्या वेळार माचयेर पत्रकार तशेंच लेखक तिओतोनियो डिकॉस्टा, एन्थनी मिनेझीस, फा.सुकोर रिबेलो, अनंत अग्नी हाजीर आशिल्ले. ह्या वेळार कोंकणी पत्रकारितेंत योगदान दिल्ल्या पत्रकारांच्या म्हायती पत्रकाराचें लोकार्पण जालें.
पयलींची पत्रकारिता आनी आतांची पत्रकारिता हातूंत खूब फरक आसा. लोकमान्य टिळकांनी जी पत्रकारिता केली त्या वेळार ब्रिटीश आमचे दुस्मान
आशिल्ले. मात, आयज आमीच वेंचून दिल्ल्या सरकारा आड पत्रकारिता करची पडटा. बरेच फावटीं राजकारणा विरोधांत, व्हडल्या उद्देगपतीं आड बरयतना, पत्रकारिता करतना नोकरे वेल्यान काडटात. अशा वेळार समाजान तांच्या फाटल्यान उबें रावप गरजेचें. अशा वेळार समाज ताका कसो सांबाळटा हाचेर विचार जावपाक जाय. आयज पत्रकारिता गंभीर जायत चल्ल्या. तरणाटी पिळगी पत्रकारिता करपाक मुखार येनात अशी खंत किशोर नायक गांवकार हांणी उक्तायली.
मुखेल सोयरे तिओतिनीयो डिकॉस्टा हांणी पत्रकारिता करतना प्रामाणिकपणा आसपाक जाय. सत्य असत्य हातुंतलो फरक जाणून, सत्य घेवन मुखार वचचें. ते लिपोवचें न्हय. पत्रकाराक वेगळीच नजर आसची पडटा. काम करतना स्वताची काळजी घेवप म्हत्वाचें. आपल्या कार्यांतल्यान समाजाक नवी दिका दाखोवची, अशें तांणी सांगलें.
सुरवेक अनंत अग्नी हांणी प्रस्तावीक केलें आनी सोयर्यांची वळख करून दिली. फा. सुकोर रिबेरो हांणी येवकार दिलो. सुत्रसंचालन ब्रिजेश देसाय हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
