भांगरभूंय | प्रतिनिधी
मंत्री रमेश तवडकार : ‘शिक्षणाचा श्रीगणेशा’ पुस्तकाचें लोकार्पण
भांगरभूंय । प्रतिनिधी
काणकोण : समाजाचें पुनर्वसन फक्त शिक्षक आनी शिक्षणीक संस्थाच करपाक शकतात. काणकोणचें नांव वयर काडपाचें नांव शिक्षणीक संस्थांनी केलें. मराठी माध्यमांतल्यान शिकिल्ले काणकोणचे विद्यार्थी आयज गोंय राज्याच्या प्रसासकीय सेवेचे भाग जाल्यात, अशें कला आनी संस्कृती मंत्री रमेश तवडकार हांणी सांगलें.
सादोळशें काणकोणच्या सरकारी माध्यमीक विद्यालयाचे निवृत्त मुख्याध्यापक तशेंच आदर्श शिक्षक पुरस्कार फावो जाल्ले शिक्षक उल्हास पै भाटीकार हांच्या ‘शिक्षणाचा श्रीगणेशा’ ह्या शिक्षणा संबंदांत म्हायती दिवपी पुस्तकाचें लोकार्पण केले उपरांत मंत्री तवडकार उलयताले.
ह्या वेळार माचयेर शालांत मंडळाचे आदले अध्यक्ष पांडुरंग नाडकर्णी, पुस्तकाचे लेखक उल्हास पै भाटीकार, नगरसेविका सुप्रिया शेखर देसाय, साहित्यीक कमलाकर म्हाळशी, रंजना पब्लिकेशनाचे धनी दिनेश मणेरीकार हाजीर आशिल्ले.
भाटीकार हांणी बरयिल्लें ‘शिक्षणाचा श्रीगणेशा’ हें पुस्तक आयच्या शिक्षकांनी वाचचें आनी अणभवचें, अशें तवडकार हांणी सांगलें.
दर परिक्षे उपरांत शिक्षकांनी विद्यार्थ्यांचें पृथकरण करप गरजेचें आसा. शिक्षकान विद्यार्थ्यांचेर बारीक लक्ष दवरपाक जाय. विद्यार्थ्याची वळख शिक्षकाक आसपाक जाय, तेन्नाच शिक्षक बरे तरेन शिकोवपाक शकता. विद्यार्थ्याक आपल्या शिक्षणाचो फायदो जिणेंत जावपाक जाय, ते नदरेन भाटीकार हांचें पुस्तक शिक्षक तशेंच विद्यार्थ्यांक लेगीत फायद्याचें थारतलें, अशें पांडुरंग नाडकर्णी हांणी सांगलें.
ह्या वेळार संजना प्रकाशना वतीन लेखक उल्हास पै भाटीकार हांचे हस्तुकीं सत्कार केलो. सोयऱ्यांची वळख कमलाकार म्हाळशी हांणी करून दिली. सोयऱ्यांक प्रथमा राजाध्यक्ष, प्रणिता भट, निला वेळगेकार, आरती पै खोत, रश्मी शिरोडकार, लक्ष्मिता पागी हांणी फुलांतुरे भेटयले.
ह्या वेळार सुप्रिया देसाय, दिनेश मणेरीकार हांचींय उलोवपां जालीं. उल्हास पै भाटीकार हांणी येवकार दिलो. प्रणिता गांवकार हांणी सुत्रसंचालन केलें, जाल्यार रमेश कोमरपंत हांणी उपकार मानले. शेळेर वाठारांतल्या सरकारी उच्च माध्यमीक विद्यालयाच्या सभाघरांत ही कार्यावळ जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
