भांगरभूंय | प्रतिनिधी
धारवाडः समाजांतले उणाव अधोरेखित करपाक आनी भोवमता कडेन आशिल्ले मतभेद नोंद करपाक सातत्यान बरोवप चालू दवरप गरजेचें. हाचे वरवींच समाजांत जागृताय निर्माण जावंक शकता अशें ज्ञानपीठ पुरस्कार जैतिवंत लेखक दामोदर मावजो हांणी सांगलें.
आयतारा धारवाड प्रोग्रेसिव्ह कल्चरल असोसिएशन ऑफ इंडिया (PCAI) वतीन आयोजीत केल्ले लेखक आनी केंद्र साहित्य अकादेमी पुरस्कार जैतिवंत सिद्धलिंगा पट्टणशेट्टी हांच्या भोवमान आनी संवाद कार्यावळींत ते उलयताले.
मावजो हांणी सांगलें, देशांतल्यो सगळ्योच भास व्हड आसात. खंयचीय भास न्हयकारप योग्य न्हय, पूण खंयचीय भाशा सक्तीची केल्यार समस्या निर्माण जातात. तरणाट्या लेखकांनी आपले परंपरेचीं मुल्यां आत्मसात करून नव्यो गजाली निर्माण करपाचो यत्न करचो. तशेंच समाजांतल्या वंचित आनी सामान्य लोकांच्या जिविता कडेन संबंदीत आशिल्लें साहित्य बरोच तेंप लोकांच्या उगडासांत उरता असोय उल्लेख तांणी केलो. प्रा. सिद्धलिंगा पट्टणशेट्टी हे वेगवेगळ्या भारतीय भाशांक सन्मान दिवन वावुरपी आनी विविधतायेचो आदर करपी लेखक अशेंय मावजो हांणी सांगलें.
बुक ब्रह्माचे संयोजक देवू पट्टर हांणी प्रा. पट्टणशेट्टी हांच्या कवितेंतल्या कल्पनाशक्तीचेर भर दिलो. तांच्या कवितांनी प्रतिमांचो गिरेस्त संग्रह आसा आनी तातूंत बदल, उदरगत आनी आशयाचे प्रवाह स्पश्टपणान दिसून येता अशें तांणी सांगलें. सत्तेर आशिल्ल्यां पसून अंतर दवरप आनी चुकीच्या वावराचेर ओगी रावप ना हीं तांच्या लेखनाची खाशेलपणां असोय उल्लेख तांणी केलो.
प्रो. पट्टणशेट्टी हांच्या गद्य लेखनान वाचप्यांचीं काळजां जिखलीं, कारण तातूंत चड तोखणाय ना आनी चड टिका ना अशें लेखिका प्रज्ञा मत्तिहळ्ळी हांणी सांगलें. नाटककार शिरीष जोशी हांणी पट्टणशेट्टी हांच्या नाटकांचेर आपले विचार मांडले.
वाचल्यारुच लेखक जाता
प्रा. सिद्दलिंग पट्टणशेट्टी हांणी तरणाट्या लेखकांनी व्हड प्रमाणांत वाचपाची गरज आसा अशें मत उक्तायलें. व्हड प्रमाणांत वाचन केल्यार लेखक म्हणून उदरगत जावपाक मजत जाता. तशेंच सादारण मनशांचे जिणेचे अणभव लेखनांतल्यान मांडप तितलेंच म्हत्वाचें अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
