भांगरभूंय | प्रतिनिधी
मुंबय, खबरां संस्था : मुंबयंतल्या गिरणी कामगारांचें आनी दुबळ्या बायलांचें जिवीत सुदारपाक वावुरपी काॅम्रेड प्रेमा पुरव (८८) काल पुण्यांत संवसाराक अंतरली. तांकां काळजाचो आताक आयलो. तांचे फाटल्यान डाॅ. मेघा पुरव- सामंत, विशाखा पुरंदरे, माधवी पुलंकारी ह्यो चलयो, जावंय आनी नातरां असो परिवार आसा.
अन्नपूर्णा परिवारा खाला तांणी पतसंस्था, महिला मंडळ, संशोधन केंद्र तांणी सुरु केलें. पयलीं गोंय, बेळगांव हांगा समाजसेवेचें काम करून प्रेमाताई मुंबय पावली. ती कम्युनिस्ट पार्टी कडेन संबंदीत आशिल्ली. कैफी आझमी, अण्णा भाऊ साठे, बलराज सहानी, अहिल्या रांगणेकर, मृणाल गोरे हांचे वांगडा तिणें काम केलां. गिरणी कामगार संघटनेचो वावरुय तांणी केला. बॅंक कर्मचारी फुडारी महेंद्र उर्फ दादा पुरव हांचे कडेन तांचें लग्न जाल्लें.
ती नेमान कामगारांच्या घरांक भेट दिवन तांची, तांच्या बायलांची परिस्थिती जाणून घेताली. तांणी मुखार अन्नपूर्णा परिवाराची स्थापना केली. बायलांक स्वावलंबी करप, शिंदळकी करपी बायलांच्या चलयांक आदार दिवप, अशीं जायतीं कामां प्रेमाताईन केल्यांत. महाराष्ट्र फावंडेशनाचो समाजकार्य जीवनगौरव पुरस्कार तांकां फावो जाल्लो.
खोडये- सत्तरी हो तांचो गांव. तांचे घराणें स्वातंत्र्यसैनिकांचें. प्रेमाताई पुरव ही कोंकणी चळवळींतले एक वावुरपी सदानंद उर्फ भाई तेंडुलकार हांची भयण. ल्हान आसतना पसून तांणी गोंय मुक्ती लढ्यांत काम केलां. आझाद गोमंतक दलाच्या क्रांतीकारकां खातीर ती हातांत बाॅम्ब घेवन वताली. तातूंतलो एक फुटून तांकां जखमूय जाल्ली. उपरांत तांणी बेळगांव, मुंबय हांगा समाजकार्य केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
