समाजकारण, आंदोलनांतले मनोहर पर्रीकार

भांगरभूंय | प्रतिनिधी

एक मनोहर कथा हें मंगला खाडीलकर हे लेखिकेचें पुस्तक मुंबय सावन हालींच मंगेशी जात्रेक आयिल्ले धाकटे भयणीन
दिलें. पुस्तकांत पन्नास काणयो, तातूंतल्यो कांय वाचपा सारक्यो. आदले मुख्यमंत्री मनोहर पर्रीकार हांचे विशीं तांच्यो भयणी, भाव, इश्टांनी आनी मंगलाताईन परगटायिल्ल्यो भावना ह्या पुस्तकांत आस्पावल्यात. संजय वालावलकार हे आदल्या मुख्यमंत्र्यांचे लागसारचे इश्ट आनी सोयरे. भयणी लता शंखवाळकार, ज्योती कोटणीस, भाव अवधूत पर्रीकार, पूत उत्पल आनी अभिजात हांणी कमीच उतरांनी मनोहरबाब पितारल्यात. स्वता मनोहरबाब समाजकारणांतल्यान राजकारणांत कशे पावले ती म्हायती तांच्याच उतरांनी मेळटा. केंद्रीय मंत्री श्रीपाद नायक, मुख्यमंत्री डाॅ. प्रमोद सावंत, रत्नाकर लेले, सतीश धोंड, दत्ता खोलकार, दामू नायक, संजीव देसाय हांच्या उतरांतले भाई पुस्तकाचें खाशेलपण.
पुस्तक मराठी भाशेंतलें पूण कोंकणी उतरां गोंयकारांच्या लेखांनी आसात. पयली आवृत्ती 2021 वर्सांतली, 2006 वर्सा पसून ते खातीर लेख मेळोवपाचो यत्न जालो हें पुस्तकांतल्यान कळटा. दोलनांतल्यान व्हड जाल्ले, तिडकल्ले भाई पुस्तकांत वयलेचाराक दिसतात.
भाई एक विरोधी पक्ष फुडारी, विधानसभेंतले भाई, मुख्यमंत्री भाई, भाईंचे मनीसपण, समाजकारणांतले राजकारणांतले भाई, आंदोलनांतले भाई हे विशय मंगलाताईन पुस्तकांतल्यान मांडिल्ले जाल्यार….. 2012 सावन कांय वेळार तेच राम, तेच लक्ष्मण, तेच एकलव्य, तेच अर्जून आनी कृष्ण कशे जाले हें लोकांक दिसतलें आशिल्लें.
तीन दसकां वयर गोंय, देशाच्या राजकारणांत रावतकीच मनोहरबाब निमाण्या दिसांनी विचारमग्न जातना म्हाका पळोवंक मेळ्ळे. 2018 वर्सा गोंय विधानसभा संकुलांत दिशिल्ले भाई वालावलकार हांच्या उतरांतल्यान मंगलाताईंच्या पुस्तकांत दिसतात. 2007 वर्सा वेंचणुकेंत भाजपाक जैत मेळ्ळें ना, ताचेआदीं सत्ता हातांतल्यान गेली तेन्ना भाईंची अवस्था कितें जाल्ली तें श्री. लेले पुस्तकांत काणयेंतल्यान अचूक सांगतात.
19991 वर्सा लोकसभा वेंचणूके आदीं आझाद मैदाना वयली विश्व हिंदू परिशदेची सभा, पणजे पाटो प्लाझा वाठारांतले उक्ते सुवातींत घेतिल्ली उमा भारती हांच्यो सभा प्रदेश भाजपच्या राजकारणाक सत्तेचे वाटेन व्हरपी. 1991 वर्सा मनोहरबाब लोकसभा वेंचणुकेंत आशिल्ले हाची याद उत्पलान लेखांतल्यान करून दिल्या. वेंचणूक जिखले ना पूण विधानसभेची वाट तांकां थंय दिसली.
म्हाड्डोळा तिनसांजेर जाल्ली भाजपाचे केंद्रीय फुडारी लालकृष्ण अडवाणी हांची सभा भाऊं खातीर टर्नींग पाॅयंट आशिल्ली. मनोहरबाब, आदले मुख्यमंत्री लक्ष्मीकांत पार्सेकार, नरहरी हळदणकार गांवांगांवांनी, घराघरांनी वचून वेंचून आयिल्ले. तेन्नाची जीण संघाचे शिस्तीची, मोर्चा आनी आंदोलनाची हें श्रीपादबाब, पार्सेकार हांच्या उतरांनी एक मनोहर कथा पुस्तक वाचल्यार आयच्या तरणाट्यांक कळटलें. जैत मेळमेरेन आंदोलनाक बशिल्ले उठप ना, प्रसंगार पुलीस स्टेशनांत बसून आरती करप, काळे शर्ट, टी शर्ट घालप आंदोलनाचे वेगळें रुप. मध्यानराती मेरेन पणजे मुस्लिमवाड्यार भोंवप, फांतोडेर आल्तिनार सरकारी काॅलनींत केन्ना एकले, केन्ना कार्यकर्त्यां वांगडा चलत वचप हें मतांचे झूज.
कितली ही म्हारगाय ते इंग्लीश व्हाय ह्या आंदोलनाची विस्कावणी पुस्तकांत जावपाक जाय आशिल्ली. कावरें पिर्लाच्या खण आंदोलनाक नेट दिवंक वचपी थंय गोंय आयआयटी व्हरपाचें सपन पळयताले? इंग्लीश व्हाय, मायभास जाय आंदोलनांतले प्रा. सुभाष वेलींगकार हांचे बराबरीन पांवड्या पांवड्यार चलपी मनोहरबाब 1990 तले नासत पूण निमणे मेरेन संघशक्ती तांच्या सांगातान रावली. इंग्लीश व्हाय, मायभास जाय हें आंदोलन भाजपाक परतून सत्ता मेळोवन दिवपी. मुख्यमंत्री डाॅ. सावंत हेवूय ह्या आंदोलनांत आशिल्ले. उपरांत भाजपान फाटीं पळयलें ना, आतां जैत लागीं आयलां, मायभास व्हड जाता, राजभाशे खातीर उदरगतीचीं नवीं पावलां पडटात.
2012 वर्साचें अर्थसंकल्पी भाशण कोंकणीतल्यान करून फुडें वचप, फुडारांत भाजपाच्या 28 आमदारांचे सपन पळोवपी, गणीत मांडपी भाईच, तीं गणितां पुस्तकांत ना ? संगणक शिक्षक (कंप्युटर टिचर्स), शिक्षकांच्या पगाराच्यो मागण्यो, राज्य पांवड्या वेलो बंद, म्हापसा वीज खात्याचेर फातर मारपाक रातीचे काडिल्ले मोर्चा जैता मेरेन व्हरपी. कांय खीण पुस्तकांतल्यान मांडल्यात. गणेशपुरी गणेश मंदीर आंदोलनांतल्या भाईंची याद उत्पलान करून दिल्या. वीट आयला राजकारणाचो हें मनोहरबाबांक म्हणपाचें आशिल्लें तेन्नाच तांकां राखणे मंत्रालयांत झुजपाक आपोवणें आयलें हेंवूय एका लेखांतल्यान होलमता.
सुभाषबाब वेलींगकार मनोहरबाबांचेच न्हय श्रीपादभाऊ, खासदार सदानंद तानावडे, मुख्यमंत्री डाॅ. सावंत हांचे गुरू, मार्गदर्शक. गुरू शिश्याचें नातें सांगपी तांचें पुस्तक येतलें तेन्ना आदल्या आंदोलनाची कीट कशी पडली ती दिसतली. उत्पलाचेय तेच गुरू, तीच शक्ती, तोच एकवट जातलो अशी आस्त बाळगूुया. तिसवाडी, बार्देस, सत्तरी, पेडणें, दिवचल, काणकोण, धारबांदोडें, मुरगांव, फोंडें तालुके भाजपाचेच. साश्ट, केपेंचो घुस्पागोंदळ सदचोच पूण मिशन सालसेत रातयां जैत दितलें तेन्ना मडगांव, फातोड्डें, कुडटरी, शिवोली कुंकळ्ळी, कुडचडें, नुवें, नावेली सयत 40 चे 44 जातले. गणीत गोंयच्या भविश्याचें, विधानसभेतलें, मनोहरबाबांचेंच.
गोंयभर भाईबराबरीन श्रीपादभाऊ भोंवल्यात. उत्तरेंतच किद्याक दक्षिणेंतल्यानय तेच जिखूंक शकतात ताचें कारण समाजकारण. मनोहरबाबांची यादस्तिकां गोंय, देशांत आसात कित्याक? मुख्यमंत्री राज्याच राखणे मंत्री देशाचे ही याद करून दिवपी.
आंदोलनांतल्यान, समाजकारणांतल्यान मनोहरबाबान राजकारण केलें तें समाज सुदारपा खातीर, गोंयां खातीर, देशा खातीर. अभिजात पर्रीकार मनोहरबाबांचो धाकलो पूत. ताचे बापूय, आवय विशीं बरोवप उत्पलावरीच भाईंचे उत्तराधिकारी जावंक योग्य आसात हाची जाणविकाय जाता. ताणेंय उच्च शिक्षण घेतलां, तोवूय उद्देजक.
एके विधानसभा वेंचणुकेंतल्यान उत्पलान आपलें अस्तित्व दाखोवन दिलां. आपलें उलोवप देश पांवड्यार पावोवपी यंत्रणा ताचे कडेन आसा. समाजकारणांतय तो आसाच. राजकारणांतल्यान ताच्या अस्तित्वाक बळ दिवपाक लोकसभा वेंचणूक 2024 टर्नींग पाॅयंट आसतली. मनोहर मोपा विमानतळ, मायभास कोंकणी देश, विदेश पांवड्यार पावोवप, नवे पिळगेक मायभाशेंत हाडप मनोहरबाबांच्या वाटे वेल्यान चलपी डाॅ. सावंत हांचेंय सपन. मोपा, मायभाशे उपरांत मिनाचो प्रस्न वेगळे पद्दतीन सुटावो जातलोच, तंत्रीक बळाच्या आधारान.
मनोहरबाब लागीं लागीं 10-12 वर्सां एके पिळगेक उर्बा दिवपी. मिडियाच्या भिऱ्याक हातान कुशीक काडपी, तांकांय आंदोलनांत व्हरपी भाई पयलींचे खासदार नरेंद्र सावयकार हांच्या लेखांत ना. वेलींगकार सर, सरकारी अधिकारी उपेंद्र जोशी, सावयकार हांणी भाईंक सांबाळ्ळें. मिनाच्या प्रस्नाचेर एमबी शाह आयोगाक लोकलेखा आयोगाचो अहवाल भेटोवपी, खणी सुरू जावपा खातीर राष्ट्रपतींक मेळपी, दिल्लीतय धरणे धरपी भाई मनोहर कथेंत ना. लिखाणाक मर्याद, शीम मेर आसता तें खरें आसलें तरी भाईंच्या वावराचें संशोधन जावपाची गरज आसा. आंदोलन, समाजकारणांतल्यान राखणे मंत्री पदा मेरेन पाविल्ले भाई एक राजकारणीय आशिल्ले. गोंयच्या धर्मीक, बदलपी समाजाचीं गणितां तांणी आपले परीन मनोहर कथेंत मांडल्यांत. तें सत समजून घेवपाची गरज आसा तांच्याच उतरांनी, आंकडे नाकात.
आयज आमी पयले ज्ञानपीठकार रवीन्द्रबाब केळेकार, मनोहरराय सरदेसाय हांची जल्मशताब्दी वर्सां मनयतात तेन्ना तांच्या साहित्याचें विश्लेशण नवे पद्दतीन जाता. मनोहरराय सरदेसाय हांचे वरीच मनोहरबाब पर्रीकार हेवूय एक यादींत उरपाचें व्यक्तीमत्व. तांची जीणय एक सादी, संघर्शाची, ल्हान, व्हडांक उर्बा दिवपी.

सुहासिनी प्रभुगांवकार
9881099260