भांगरभूंय | प्रतिनिधी
जीत आरोलकार : खदूळ उदक जाल्ले बांयची केली पळोवणी
भांगरभूंय । प्रतिनिधी
पेडणें : आगरवाडो चोपडें पंचायत वाठारांतल्या कुरवान वाडो हे दलीत वस्तींतल्यो तीन म्हत्वाच्यो समस्या- भौशीक मसुंडी, रस्तो आनी शौचालय ह्यो तीन मुखेल समस्या सुटाव्यो जायनात, ते मेरेन वयल्या वाठारांत कसलेच तरेचो प्रकल्प येवपाक दिवचों ना, अशी हमी मांद्रेंचे आमदार जीत आरोलकार हांणी थळाव्या लोकांक दिली. ह्या वेळार आगरवाडो सरपंच हेमंत चोपडेंकार, आदले उपसरपंच नितीन चोपडेंकार, आदले पंच वासू चोपडेंकार आनी गांवचे लोक हाजीर आशिल्ले.
चोपडें कुरबान वाड्या वयल्या परंपरीक बांयचे उदक कांय कारणांक लागून खदूळ जालां. बांयचे वयले वटेन दोंगर आसा. त्या दोंगरा वयली जमीन एका बिल्डरान विकत घेवन थंय नवो प्रकल्प हाडपाचो यत्न चलयला. ते खातीर जमीन टेस्टींग प्रक्रिया वा बॉरवेल मारल्या, असो दावो थळाव्या लोकांनी केला. तेच खातीर बांयचे उदक खदूळ जालां आनी आमी उदकाक पादिसेर जाल्यात, अशी समस्या गांवच्या लोकांनी आमदार आरोलकार हांचे कडेन मांडली.
आमदार आरोलकार हांणी ताकतिकेन येवन बांयची पळोवणी केली. लोकां कडेन चर्चा केली आनी उपरांत वयले वटेन बॉरवेल आनी जमीन टेस्टींग प्रक्रिया करतात ते सुवातेची पळोवणी केली. ते उपरांत गांवच्या लोकां कडेन खोलायेन चर्चा केली. त्या वेळार तांणी संगलें, परंपरीक भौशीक मसुंडी, रस्तो आनी शौचालय ह्यो तीन मुखेल समस्या जे मेरेन सुटाव्यो जायनात, ते मेरेन वयले वटेन कसलोच प्रकल्प येवपाक दिवचों ना. सरपंच हेमंत चोपडेंकार हांणी सांगलें, 2017 सावन थळावे लोक आपल्या हक्का खातीर लडटात. परंपरीक मसुंडी, रस्तो आनी शौचालय ह्यो तीन मुखेल समस्या जे मेरेन सुटाव्यो जायनात, ते मेरेन आपूण सरपंच ह्या नात्यान त्या प्रकल्पाच्या कसल्याच कागदपत्राचेर सय करचो ना. ते खातीर गांवच्या लोकांनी भिवपाची गरज ना. बांयचें उदक खदूळ कित्याक जालां, ताची चांचणी भलायकी खातें करतलें. अहवाल आयले उपरांत फुडली कार्यवाही पंचायती वतीन लेगीत करतले, अशें चोपडेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
