भांगरभूंय | प्रतिनिधी
पणजीः रस्ते हॉटमिक्स करचे पयलीं अभियंते वीज, उदक, सिवेज आनी संबंदीत खात्याक पत्र बरोवन रस्तो हाॅटमिक्स करपाचे तारखे पयलीं कितें कामां आसत जाल्यार तीं पुराय करपाचो उगडास करुन दितले. जर पत्र बरोवपाक अपेशी थारल्यार संबंदीत कार्यकारी अभियंत्याचेर कारवाय जातली. बांदकाम खात्याचे प्रधान मुखेल अभियंत्यांच्या फुडारपणा खाला संबंदीत खात्याच्या मुखेलींची समिती तयार करून हाचेर देखरेख दवरतले, अशी म्हायती बांदकाम मंत्री दिगंबर कामत हांणी सभाघरांत दिली.
निक्तोच हॉटमिक्स केल्लो रस्तो दुसर्या दिसा फोडटात. ही गजाल बांदकाम खात्याक खबर आसा. जर खबर आसा जाल्यार खात्यान हे विशीं कसली कारवाय केल्या, असो प्रस्न प्रस्नोत्तर वरा वेळार वास्कोचे आमदार दाजी साळकार हांणी विचारलो.
लोकांक दिसता रस्ते रस्ताद आसात आनी तांकां कोण आवय बापूय ना, म्हणून ते वचून फोडटात. मात ह्यान फुडे अशे जावचें ना, अशें कामत हांणी सांगलें.
रस्त्या वांगडा सगल्यो गरजेच्यो गजाली जशें उदका आनी सिवेज पायपलायन, ऑप्टीकल फायबर केबल, भुंयगत लायटीचे केबल परवानगी घेनासतना हॉटमीक्स केल्ले रस्ते फोडून घालतात. मात आतां रस्त्यांचें हॉटमिक्स करचे पयली अभियंतो सगळे संबंदीत खात्या कडेन पत्रवेव्हार करून हॉटमिक्स करपाचे तारखे पयलीं उरिल्लीं कामां हातांत घेवपाचो उगडास करून दितले. जर हें करपाक अपयेसी थारता जाल्यार संबंदीत अभियंत्याचेर कारवाय जातली, अशी शिटकावणी कामत हांणी दिली.
ते भायर बांदकाम खात्याचे प्रधान मुखेल अभियंत्याच्या फुडारपणा खाला समन्वय समिती तयार करून वीज खात्याचे मुखेल अभियंते, सिवरेज महामंडळाचे वेवस्थापक संचालक, पियेवपाचे उदका खात्याचे मुखेल अभियंते आनी हेर खात्यांच्या मुखेलींची वांगडी म्हण निवड करतले. तांची म्हयन्यांत एकदां बसका जावन स्थितीचो ते नियाळ घेतले आनी खंयचो रस्तो खणप, केन्ना खणप हे विशींचो तांकां आराखडो सादर करपाक लायतले, अशी म्हायती कामत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
