भांगरभूंय | प्रतिनिधी
पणजी ः शिक्षण खात्या वतीन समग्र शिक्षा खाला 859 पदांचेर भरती जातली. हातूंत 700 सुवातो मुळाव्या शिक्षकांच्यो, 30 कला इन्स्ट्रक्टर, 129 सुवातो एनएफक्यूएफचे वेगवेगळे विशय शिकोवपा खातीर आसात.
ह्या पदां खातीर 26 ते 30 मे मजगतीं पर्वरेच्या शिक्षण खात्याच्या कार्यालयांत सरळ मुलाखती जातल्यो. सगली पदां कंत्राटी पद्धतीन भरतले. मुळाव्या शिक्षकांचीं पदां सरकारी शाळां खातीर जाल्यार इन्स्ट्रक्टरची पदां सरकारी आनी अनुदानित शाळां खातीर आसात.
तालुका प्रमाण मुलाखतीच्यो तारखो
मुळाव्या शिक्षकांच्यो 700 मदली 371 पदां अनारक्षीत आसात. 189 ओबीसी खातीर, 84 एसटी खातीर, 35 दिव्यांग खातीर आनी 7 आदल्या सैनिकांच्या भुरग्यां खातीर राखून दवरल्यात. सत्तरी, दिवचल, सांगें तालुक्यांतल्या शाळेंतल्या शिक्षकां खातीर 26 तारखेक मुलाखती जातल्यो. काणकोणां, धारबांदोड्यां खआतीर मुलाखती 27 मे, साश्टी, मुरगांव खआतीर 28 मे, पेडणें, बार्देश, केपें खातीर 29 मे आनी फोंडें आनी तिसवाडी तालुक्यांतल्या शाळां खातीर 30 मे दिसा मुलाखती जातल्यो. ह्या पदां खातीर उमेदवारांक 12 वी पास, डीएड सयत एक वर्साचो अणभव आसूंक जाय.
एनएफक्यूएफ खातीर सुवातो
एनएफक्यूएफचे वेगवेगळे 15 विशय शिकोवपा खातीर 129 पदां मदीं 15 पदां पर्यटन आनी हॉस्पिटॅलिटी विशयाची आसात. लॉजिस्टीक 12, ऑटोमोबायल आनी भलायकी सेवा विशयांत दरेकीं 11, कन्स्ट्रक्शन 9, प्लंबिंग 5, रिटेल 13, ब्युटी आनी वेलनेसांत 10, लॉजिस्टीकांत 12, एपॅरलच्या आनी इलेक्ट्रॉनिक्स विशयांत दरेकीं 10 पदां खातीर भरती जातली. सगल्या पदांचो पगार म्हयन्याक 20 हजार रुपया आसतलो. हाचे खातीर 27 आनी 28 मेक मुलाखती जातल्यो.
उमेदवारांनी सरळ मुलाखती खातीर थारायिल्ल्या वेळा पयलीं उण्यांत उणें अर्द वर आदीं हाजीर आसूंक जाय. ह्या वेळा उपरांत पावपी उमेदवारांक मुलाखती खातीर घेवचे नात. उमेदवारांनी आपले राबितो प्रमाणपत्रा वांगडा हेर गरजेचीं कागदपत्रां हाडप गरजेचीं. चड म्हायती खातीर https://www.goa.gov.in/citizen/recruitment/ ह्या संकेतथळाक भेट दिवपाचें आवाहन समग्र शिक्षणाच्या प्रकल्प अधिकाऱ्यांनी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
