भांगरभूंय | प्रतिनिधी
बेळगांवां जें जालें, तें पळोवन गोंयकार हादरल्यात. साद्या कारणा वयल्यान आदले आमदार, पुलीस अधिकारी लवू मामलेदार हांकां मारपेट जालो. तातूंत तांचो जीव गेलो. गाडी मात्शी लागली म्हूण तरणाट्या रिक्षाकारान तांची पिराय पळयनासतना मारमारी केली. अस्वस्थ जाल्ले मामलेदार हाॅटेलाचीं सोंपणां चडून भितर वतना आताक येवन कोसळ्ळे. खूब वायट जालें. आयज दे दणादण वृत्तीचे, अर्दवट तकलेचे मनीस वाडत आसात. दुबळो, एकसुरो बाबडो मार खाता. चूक चिमटीभर, परिणाम मुठभर. समाजान आत्मचिंतन करपाचो वेळ आयला.
चडशे गाडयेकार हे अँग्री यंग मॅनूच. गाडयेचें मोल, ती दुरुस्त करपाचो खर्च चड म्हूण तांची तिडक मस्तकाक पावता आसतली. अपघात जालो काय कितें जायत तें सांगपाक येना. सांगोल्डा हालींच गाडयेचो स्कुटरीक मात्सो धपको लागतकच मुंबयचे ते दोन पर्यटक जे तरेन धांवून आयले आनी तांणी गोंयकार टॅक्सीकाराक बडोवपाक सुरवात केली, तो व्हिडियो पळयल्यार आंगार कांटो येवपाचो. खुनाची सुपारी घेवपी वा माथेफिरू मनीस आक्रमक जावन हल्लो करता, तसलोच तो प्रकार आशिल्लो. हें गोंयांतूच न्हय, तर सगले कडेन घडटा. आयज तुका, फाल्यां म्हाका. सांगोल्डा प्रकरणाचेर सोशल मिडियाचेर कमेंट करतना एका गोंयकारान म्हणलां, आमचे XX त हें जाल्लें जाल्यार पर्यटकांचीं हाडां जाग्यार उरचीं नासलीं. हाचो अर्थ गोंयांतूय अशे कांय वाठार आसात, जंय गाडयेक गाडी तेंकल्यार पसून चूक कोणाची, वांगडा ल्हान भुरगीं, बायल, आवय आसा, हें पळयनासतना सरळ मारामारीच जाता. कळंगुटे, हरमलाय असलेच प्रकार हालींच घडल्यात. लोकांचें पासियेंस सोंपत चल्लां. कारवाय पुलिसांची करपाची, ख्यास्त दिवपाचें काम न्यायालयाचें, हें पसून लोक, चोंब्यान येवपी लोक विसरुन गेल्यात. समाजाचें प्रतिबिंब सिनेमांत दिसता काय सिनेमाचें समाजांत?
अपघात उपरांत गाडयेकारांक बडोवपाची परंपरा ही पयलीं सावन आसा. पूण, काळ बदलता तशें समाजान संयमी, संस्कारी जावंक नाका? आतां गोंयांत अशिक्षीत लोक उरूंक नात. तरीय हें जाता जाल्यार शिक्षण आनी वागणूक हाचो मात्तूय संबंद ना, हें सिद्ध जाता. संस्कारुय शिकोवन जायनात, ते जल्मताच आसपाक जाय हाचेरुय म्होर बसता. सरभोंवतणी गैरकारभार वाडला. म्हारगाय मळबाक तेंकल्या. काम करतल्यांची, दुबळ्यांची पिळवणूक, शोशण जाता. मेळटा थंय वशिलेबाजी, भ्रश्टाचार. सूर, रोंट दवरले बगर कामां जायच नात. मागीर तो कायदेशीर, 90 टक्के गुण घेतिल्लो पसून आसूं. चंगळवाद वाडला. ताचेर उदका सारको पयसो खर्च करचो पडटा. तो ना जातकच मनीस तिडकता. चड जाल्यार मदांधूय जाता. एकलो करता म्हूण दुसरो ताचे कडेन सर्त करता. तातूंत अपेशी थारल्यार मागीर तो तिडक मेंदवांत घेवनूच भोंवता. वेसनां हिस्पा भायर वाडल्यांत. बेशिस्त, भ्रश्ट मनशाचो आदर्श घेवप्यांचोय आंकडो वाडला. स्वता पुरतो विचार करपी आनी सुवार्थ पूर्ण करपाक खंयच्याय थरार वचपी लोक आयज जळींमळीं आपटतात….. बऱ्याच कारणांक लागून समाजमन तत्वहिन जालां. निरसलां. निरशेलां. तिडकलां. उदेंवपी सुर्याक नमस्कार करपी मानसिकतायेचे जडणघडणेंत सोशल मिडियानूय योगदान दिलां. खरें म्हणल्यार कमेंट करतकच मनांतली तिडक भायर सरून मेंदू शांत जावंक जाय. पूण तो चडूच कुसपाक लागला. समाजांत एकमेकां विशींच्या दुस्वासाक सारें- उदक, धोशीं घालपाचें काम कांयजाण करीत आसात. पूर्वग्रहदुशित मनांचें पीक तरतरलां. वाचन, बरें कितें तरी पळोवप उणें जालां…. परिणाम? कसल्याय कारणा वयल्यान बाचाबाची, गाळी, मारामारी. वड्याचें तेल वांयंग्याचेर काडपाचेच प्रकार. खोरजता एके कडेन आनी खरपिता भलतेच कडेन. तातूंत एकमेकांचे जीव वचपाक लागतात, तेन्ना फुडार काळखी दिसता. फकत मनशांकूच न्हय, तर पर्यटन, अर्थीक मळाकुय हाचें पानवळ भोगचें पडूं येता.
धर्मगुरूंनी, शिक्षकांनी, सरकारी यंत्रणेन, मानसोपचार तज्ञांनी, खास करून पालकांनी घातक थारुं येता अशी ही वृत्ती उणी करपाचो यत्न करुंक जाय. अटक, बंदखण हो एक उपाय काय?? पूण एकदां गुन्यांवकार म्हूण शिक्को बसल्यार मागीर तो मनीस वाट चुकत वचूं शकता. संस्कार हे स्वताच स्वताचेर करपाचे आसतात. खीणभर तिडकीचेर नियंत्रण दवरलें जाल्यार प्रस्न सोंपेपणी सुट्टले. दुस्वास झडयल्यार एकमेकां विशीं आदराची भावनांय स्वताभितर किल्लतली. समाजाचीं विवीध मळां शुद्ध, तत्वनिश्ठ जाल्यार तिडकीचेर, वायट गजालींचेर थोडें तरी नियंत्रण येतलें. संस्कार, उपदेश दिवपी खूबजाण आसात. पूण, तो फक्त आयकुपा पुरतो उरला. कोण हाडटा तो कृतींत? दिवपीय हाडिनात आनी घेवपीय! केन्ना सुदारतलो काय सगलो समाज? काय सभावाक वखदूच ना??
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
