भांगरभूंय | प्रतिनिधी
काणकोण : काणकोणचे आमदार तशेंच सभापती रमेश तवडकार हांणी शेनवारा राज्य पांवड्या वयलो रानभाजी महोत्सव येसस्वी करून दाखयलो. आयतारा तांणी काणकोणचीं पडीक शेतां लागवडी खाला हाडपाच्या दिश्टीकोनांतल्यान स्वता आपल्या दाबेलच्या शेतांत देंवून तरवो रोयलो. नवे पिळगेक ही एक तांणी देख घालून दिली.
वयल्या पदाचेर आशिल्ली व्यक्ती लेगीत शेतांत देंवपाक शकता. जो शेतांत देंवता, तोच आपलें पोट भरपाक शकता. जंय पडीक शेत आसा, तें हाचे मुखार सामुहीक लागवडी खाला हाडून पुराय गोंय हरीत गोंय करतले, असो विस्वास सभापती तवडकार हांणी उक्तायलो.
आयतारा जाल्ले उक्तावणाचे कार्यावळींत शेतकी खात्याचे सहाय्यक संचालक नागेश कोमरपंत, आत्माचे संचालक शिवराम नायक गांवकार, पैंगीणची सरपंच सविता तवडकार, श्रीस्थळची सरपंच सेजल गांवकार, पंच अक्षता वेळीप, भाजपचे कार्यकर्ते आनी बलराम शिक्षण संस्थेचे शिक्षक आनी विद्यार्थी तरवो रोवपाक शेतांत देंविल्ले.
फक्त काणकोणचींच न्हय जाल्यार गोंयांतल्या हेर वाठारांतलीं लेगीत शेतां पडीक उरपाक जायना, हे खातीर गोंयांतले भाजप कार्यकर्ते, समाज वावुरपी आनी शेतकारां कडेन चर्चा करून तीं शेतां लागवडी खाला हाडटले. मुख्य म्हणल्यार हें पीक घेतना सेंदीय साऱ्याचोच वापर करून पुराय ऑर्गेनीक शेतां केल्यार भलायकेचे नदरेन फायद्याचेंच जातलें. तशेंच ह्या भाताक बाजारमोल लेगीत चड मेळटलें, अशें ह्या वेळार सभापती तवडकार हांणी सांगलें.
रानभाजी महोत्सव येसस्वी जाला. हाचे मुखार नुस्तें महोत्सवाचें लेगीत आयोजन करपाचो विचार आसा, अशी म्हायती सभापती तवडकार हांणी दिली.
पयसो सगल्याच कडेन आसतलो, पूण पोट भरपा खातीर शेतांत देंवप होच हाचे मुखार सगल्यां कडेन पर्याय उरतलो, अशें सरपंच सविता तवडकार हांणी सांगलें.
शेतकी खात्या वतीन सामुहीत शेती करचे खातीर सगले तरेचो आदार करतात, अशें अधिकारी शिवराम नायक गांवकार हांणी सांगलें.
चणाक सारकें सायां उदकांतले नुस्त्याचे शेतीक लेगीत शेतकी खातें उर्बा दिता अशें अधिकारी नागेश कोमरपंत हांणी सांगलें. ह्या वेळार पत्रकारांक लेगीत तांणी शेतीचो अणभव सांगलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
