भांगरभूंय | प्रतिनिधी
पणजी : सभापती पदा खातीर 25 सप्टेंबराक वेंचणूक जावपाची आसा. भाजपा वांगडा मगोप सयत तीन अपक्ष आमदारूय आसात. हाका लागून भाजपाचे उमेदवार आमदार गणेश गांवकार हांकां जैत मेळटलें हाची आमकां खात्री आशिल्ल्याचें मुख्यमंत्री डॉ. प्रमोद सावंत हांणी सांगलें. मंगळारा आमदार गांवकार हांणी विधिमंडळ सचिव नम्रता उलमन हांचे कडेन आपलो अर्ज दाखल केलो. ह्या वेळार भाजप प्रदेशाध्यक्ष दामू नायक, मंत्री विश्वजीत राणे, सुदिन ढवळीकर आनी आमदार हजर आशिल्ले.
अर्ज दाखल केल्या उपरांत मुख्यमंत्र्यांनी माध्यमां कडेन संवाद सादलो. तांणी म्हणलें, विधानसभेच्या सभापती पदा खातीर भाजपा वतीन आमदार गणेश गांवकार हांणी आयज अर्ज दाखल केला. आमचे वांगडा मगोपचे फुडारी सुदिन ढवळीकार आसात. युतीतले पक्ष आनी अपक्ष आमदार मेळून 40 मदल्यो 33 सुवातो भाजपाकडेन आसात. आमी सगळे जाण एकठांय आशिल्ल्यान आमदार गणेश गांवकार भोवमतान वेंचून येतले. विरोधी पक्षांनी तांचो अर्ज भरला. तांकां तांचें काम करपाक दियात.
ह्या वेळार आमदार गांवकार हांणी सांगलें, विरोधी पक्षांनी ह्यान पयलीं सभापती पदा खातीर अर्ज दाखल केला. मात ह्या पदाखातीर सगल्यांनी तेंको दिवपाक जाय अशें म्हजें मत. हाका लागून हांव विरोधी पक्षांक मागणी करतलों.
मंत्री सुदिन ढवळीकार हांणी सांगलें, गणेश गांवकार हे खूब बरे मनीस. तांच्या अर्जा खातीर हांवें अनुमोदन दिलां. विधानसभेंतलो आंकडो पळयल्यार जैत आमकांच मेळटलें हें निश्चीत आसा. तरी आमी आमदार गांवकार हांकां 25 तारखेरूच परबीं भेटयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
