सभापतीन स्वतंत्र रावपाक जाय

भांगरभूंय | प्रतिनिधी

विजय सरदेसायः काणकोण पत्रकार संघाची वर्सुकी कार्यावळ

भांगरभूंय । प्रतिनिधी

काणकोणः सभापतीन स्वतंत्र रावपाक जाय. मुख्यमंत्र्यांच्या चेपणा खाला रावचें न्हय. लोकशाय चार तत्वांच्या खांब्यांचेर तिगल्या. मात आयज लोकशायेचें खांबे दुबळे करपाचें काम सुरू जालां, अशें गोवा फॉरवर्डाचे फुडारी तशेंच फातोड्डेंचे आमदार विजय सरदेसाय हांणी सांगलें.

काणकोण पत्रकार संघाच्या वर्सुकी सुवाळ्यांत सरदेसाय उलयताले. तांचे वांगडा माचयेर काणकोणचे नगराध्यक्ष रमाकांत गांवकार, सांत आंद्रेंचे आमदार विरेश बोरकार, केपेचें आमदार एल्टन डिकॉस्टा, आदले आमदार इजिदोर फर्नांडीस, पत्रकार संघाचे अध्यक्ष बबेश बोरकार, सचीव सुभाष बोरकार, भांडारी संतोष गांवकार हाजीर आशिल्ले.

राजकारण्यांक सकारात्मक छापून आयिल्लें जाय. पेड न्यूजाक लागून लोकशायेक धोको निर्माण जाला. आयज सोद पत्रकारितेची गरज आसा. खरें कितें, फट कितें तें लोकां मुखार येवपाक जाय. तेन्नाच लोकशाय घटमूट जातली, अशें सरदेसाय हांणी सांगलें.

काणकोणां किडनी पेड्डेर जावपाचें प्रमाण चड आसा. ताचेर संशोधन जावपा वांगडाच उपाय येवजण चालीक लावपाक जाय, अशेंय सरदेसाय हांणी सांगलें.

विरेश बोरकार हांणी सांगलें, विधानसभेच्या चार दिसांच्या अधिवेशनांत लोकांचे प्रस्न कशे कितें मांडपाक मेळटले? अधिवेशनाचो कार्यकाळ वाडोवन दिवपाची आपणे मागणी केल्या, अशी म्हायती तांणी दिली.

पत्रकार लोकांचे प्रस्न समाजा मुखार मांडटात. तातूंत ग्रामीण पत्रकारांच्या बऱ्या मानधनाचो विचार जावपाक जाय. सरकारान तांकां शारांतल्या पत्रकारां भशेनूच सुविधा दिवपाक जाय, अशें बोरकार हांणी सांगलें.

काणकोणच्या रवींद्र भवनांत काणकोण पत्रकार संघाक सुवात मेळची हे खातीर आमदार आसतना सरकाराक मसुदो तयार करून दिला. ताची फाटपुरवण काणकोण पत्रकार संघान करची. तशेंच काणकोणच्या पत्रकारांनी निश्पक्षपणान पत्रकारिता करची, अशें इजिदोर फर्नांडीस हांणी सांगलें.

पत्रकारांचे जागरूकतेक लागून गांवची उदरगत करपाक संद मेळटा. पत्रकारांच्यो नदरो जुस्त जाय थंयच पडटात. ताका लागून चुकिल्ल्यांक योग्य वाट दाखोवपाक बऱ्याक पडटा, अशें एल्टन डिकॉस्टा हांणी सांगलें.

दोनूय बाजू आयकून घेवन बातमी केल्यार कोणाचेंच लुकसाण जायना. उरफाटे दिसाळ्यां वयलो विस्वास आनीक घट जाता, अशें रमाकांत नायक हांणी सांगलें. तशेंच विवीध मळांचेर कामगिरी केल्ल्या योग्य मनशांची निवड करून तांचो सत्कार केल्ले खातीर तांणी काणकोण पत्रकार संघाचें कवतूक केलें.

ह्या वेळार विवीध मळांचेर बरी कामगिरी केल्ल्या व्यक्तींचो शाल, नाल्ल आनी मानपत्र दिवन मानेस्तां हस्तुकीं सत्कार केलो.

हरिश्चंद्र खोलकार, संजय कोमरपंत, देविदास गांवकार, नारायण देसाय, सुभाष महाले, अजीत पैंगीणकार आनी संतोष गांवकार हांणी मानपत्रांचें वाचन केलें.

ह्या सुवाळ्यांत काणकोण पत्रकार संघान घेतिल्ले लघुपट आनी वृतांत लेखन सर्तीचीं इनामां मानेस्तां हस्तुकीं जैतिवंतांक भेटयलीं.

ह्या सुवाळ्यांत समृद्धी कोमरपंत, डेलिशा फर्नांडीस, एविडल फर्नांडीस, श्रमदेवी सेल्फ हेल्प ग्रूप आवळी हांणी नाच सादर केलो. जाल्यार सुभाष कोमरपंत हांणी ईशस्तवन सादर केलें. मल्लिकार्जून विद्यालयाच्या विद्यार्थ्यांनी येवकार गीत सादर केलें. बबेश बोरकार हांणी येवकार दिलो. अजीत पैंगीणकार हांणी काणकोण पत्रकार संघा विशीं म्हायती दिली. संजय कोमरपंत हांणी सुत्रसंचालन केलें. सुभाष महाले हांणी उपकार मानले.

सुवाळ्यांतले सत्कारमूर्ती

प्रसाद नायक गांवकार (गोमॅकॉ जनसंपर्क अधिकारी), प्रकाश देसाय (उत्कृश्ठ शेतकार), उल्हास गांवकार (उत्कृश्ठ उजो पालोवपी दळाचे जवान), विजयकुमार गायक (उत्कृश्ठ पालिका कर्मचारी), आर्य प्रभू गांवकार (नीट परिक्षेंत वयली सुवात), अंकूर काणकोणकार (युवा एंट्रेप्रुनेर), संध्या देसाय (मदले सुटयेंतले खाण पुरवणदार), बर्नाड फर्नांडीस, धीरज काणकोणकार आनी उल्हास गांवकार (पत्रकार).

संघाचे लघुपट सर्तीचो निकाल

काणकोण पत्रकार संघान लघुपट सर्त घेतिल्ली. ताचो निकाल फुडें दिल्ले प्रमाण. पयलें इनाम- विश्वप्रताप पवार, दुसरें- मीना वेळीप, तिसरें- एस. एस. आंगले उच्च माध्यमीक विद्यालय. उमेद वाडोवपी इनामां- मानसी परीट, अवेरिना डायस, डेलिशा फर्नांडीस, सदानंद प्रभुगांवकार.

वृतांत सर्तीचो निकाल

काणकोण पत्रकार संघान घेतिल्ले वृतांत सर्तींचो निकाल फुडें दिल्ले प्रमाण. पयलें- दिव्या प्रियोळकार, दुसरें- क्लेशेल डायस, तिसरें- संतोषी वेळीप. उमेद वाडोवपी इनामां- आर. यशवंत. श्लोक काणकोणकार, शर्वरी काणकोणकार, दिव्या धर्मी वेळीप, हे सर्तीचें परिक्षण शांताजी गांवकार आनी प्रसाद पागी हांणी केलें.