भांगरभूंय | प्रतिनिधी
नवी दिल्ली, खबरां संस्था: लोकसभेच्या विरोधी पक्षाच्या १५ खासदारांक निलंबीत केल्यात. सभाघराच्या कामांत आडमेळीं हाडपा वयल्यान ही कारवाय केल्या. सभापतीन आक्षेपार्ह खासदारांचीं नांवां सांगले उपरांत लोकसभेंत उरिल्ल्या अधिवेशना खातीर विरोधी पक्षाच्या १५ खासदारांक निलंबीत करपाचो थाराव संमत केलो. निलंबीत केल्ल्या १५ खासदारांतले पांच खासदार कॉंग्रेसीचे आसात.
संसदीय वेव्हार मंत्री प्रल्हाद जोशी हांणी कॉंग्रेसीच्या पांच खासदारांक निलंबीत करपाचो थाराव मांडलो. सभाघरांत टीएन प्रतापन, हिबी एडन, जोथिमनी, रम्या हरिदास आनी डीन कुरियाकोस हांणी सदनाचो आनी अध्यक्षाच्या अधिकाराचो अवमान करून वायट वागणूक दिल्या. अध्यक्षांनी तांचीं नांवांय दिल्यांत. येवपी सत्रा खातीर तांकां सभाघराचे सेवेंतल्यान निलंबीत करचे खातीर आपूण निवेदन करतां अशें निवेदनांत बरयल्लें.
तृणमूल कॉंग्रेसीचे खासदार डेरेक ओब्राय हांकां अधिवेशनाच्या उरिल्ल्या काळा खातीर राज्यसभेंतल्यान निलंबीत केले. उपरांत विरोधक वांगड्यांचेर घेतिल्ले शिस्तबद्ध कारवायाचे वळेरेंत आतां आनीक १५ खासदारांची भर पडल्या.
दोन तरणाटे लोकसभेंत घुसले उपरांत सुरक्षा चुकीचेर चर्चा करपाची मागणी डेरेक ओब्रायन हांणी केल्ली. हे विशीं केंद्रीय गृहमंत्री अमित शाहान राजिनामो दिवचो अशीय मागणी विरोधी फुडार्यांनी केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
