सबलंकान किताब राखलो

भांगरभूंय | प्रतिनिधी

अरिना सबलंका हिणें सेगीत दुसरे खेपे ऑस्ट्रेलियन ओपनाच्या बायलांच्या एकोड्या गटांत वस्तादपण जोडलें. रॉड लेवर एरेनांत जाल्ले फायनलींत बेलारुसाची सबलंका हिणें फायनलींत चीनाचे क्विनवेन झेहेंग हिका फकत एका वरा भितर 6-3 आनी 6-2 अशा सरळ सेटांनी हारयली. सबलंकान अंदूंचे सर्तींत तीन मानांकीत खेळगडयांक हारयलीं.

ह्या जैता सयत व्हिक्टोरिया अझारॅंका उपरांत मॅलबॉर्न पार्कांत बायलांच्या एकोड्या गटांत सेगीत दोन खेपे वस्तादपण जोडपी सबलंका दुसरी खेळगडी थारली. अझारॅंकान 2012 आनी 2013त सेगीत किताब जिखिल्लो.

25 वर्सां पिरायेची सबालंका वर्स 2000 उपरांत एक लेगीत सेट वगडायनासतना वस्तादपण जोडपी पांचवी बायल खेळगडी थारली. सबलंकाचे पयलीं लिंडसे डॅव्हनपोर्ट (2000), मारिया शारापोवा (2008), सेरेना विलियम्स (2017) आनी अॅश बार्टी (2022) हांणी असो पराक्रम केल्लो.

आपली तिसरी ग्रॅण्ड स्लॅम फायनल खेळपी सबलंकान सुरवातीच्या सेटातूंच प्रतिस्पर्धी खेळगडेची सर्व्हिस ब्रेक करून 2-0 अशी आघाडी घेतिल्ली. ते उपरांत चीनाचे खेळगडयेन फुडले गेमींत आपले खातीर तीन ब्रेक पॉयण्टाची संद तयारी केल्ली. पूण, अणभवी सबलंकान प्रतिस्पर्धी खेळगडयेक आडावपाक बरे तरेन संघर्श केलो आनी पयलो सेट फकत 32 मिनटांनी 6-3 असो जिखलो.

सबलंकान दुसऱ्या सेटांत रोखडीच 5-2 अशी आघाडी घेतली. उपरांत 6-2 अशा फरकान जैत जोडून वस्तादपण जोडलें.