भांगरभूंय | प्रतिनिधी
केंद्रांतल्या भाजपाक सत्ते भायरो करपाच्या निर्धारान एकठांय येवपाक सोदपी राजकी पक्षांच्या फुडाऱ्यांचे हालींच पाटणा जाल्ले
बसकेची भाजपा सयत कांय पक्षांनी धजा उडयत हे बसकचें म्हत्व उणे करपाचें काम नेटान चलयलां. भाजपच्या राष्ट्रीय अध्यक्षा सयत कांय फुडाऱ्यांनी हे बसकचें वर्णन विरोधी फुडाऱ्यांचें आनीक एक फोटो सेशन अश्या उतरांनी केलां जाल्यार कांय जाणांनी ही बसका म्हणल्यार फ्लॉप शो अशें सांगून ताचे कडेन आडनदरच करप बरें, अशें म्हणलां. कांय फुडाऱ्यांक जाल्यार च्या – जेवण एकठांय बसून घेवप होच हे बसके फाटलो हेत दिसलो. तातूंतल्यान कांय निश्पन्न जावचें ना असो निश्कर्श लेगीत तांणी काडला. ऊबाठाचे ठाकरे जमेक धरुनय पंदरा विरोधी पक्षांच्या तीस- एकतीस फुडाऱ्यांनी पाटण्यांत नितीशकुमार हांचे हे बसकेक हाजेरी लायली तरी अडेज- तीन वराचें चर्चें उपरांतूय ही बसका खंयच्याय ठोस निश्कर्शा मेरन येवपाक शकनाशिल्ल्यानूच तिचेर ह्यो प्रतिक्रिया येतात हातूंत दुबाव ना.
येता ते लोकसभा वेंचणुकेंत एकवट तयार करपा खातीर काँग्रेस सयत चडश्या सगल्या मुखेल पक्षांच्या फुडाऱ्यांचे यत्न चालू आशिल्ल्याचें चित्र हे बसकेंत दिसले तरी सगल्यांक ते विशीं एकमेकांचेर विस्वास आशिल्ल्याचें मात खंयच दिसलें ना.. ‘सबका प्रयास, सबका अविश्वास’ ह्याच सिद्धांताचेर जर विरोधी पक्ष तथाकथीत एकवटाची एक्स्प्रेस घेवंन दिल्लीक वचपाचे आसल्यार हे एक्स्प्रेसीक केन्नाय अपघात जावपाचो धोकोच चड दिसता.
भाजपान णव वर्सां आदीं सत्तेर येतना दिल्लो नारो आयज सगल्यांच्या ओंठार आसा. ‘सबका साथ, सबका विकास और सबका विश्वास’ हो भाजपाचो नारो आशिल्लो, उपरांत ताका ‘सबका प्रयास ‘ची लेगीत जोड मेळ्ळी. भाजपा खातीर हो सिद्धांत बरोच येशस्वी थारलो आनी संवसारांतल्या सगल्या लोकांच्या ओंठार पावलो. भाजपाक अशे परिस्थितींत आव्हान दितना विरोधकांक असोच कांयसो ठोस सिद्धांत घेवन फुडें वचपाची गरज आशिल्ली. मात पयले बसकेंतूच तांचें ‘सबका प्रयास, सबका अविश्वास’ हेंच सूत्र जायत्या गजालींक लागून जगा सामकार आयलें आनी विरोधकां मदल्या प्रस्तावीत एकवटा विशीं कोणूय गंभीर नाशिल्ल्याचें दिसलें. एकवटा खातीर सगल्यां कडल्यान यत्न जातात अशें एके वटेन वयलेचाराक दिसतालें हें खरें आशिल्लें तरी कोणेच आपले पत्ते उक्ते करपाची धिटाय हे बसकेंत दाखयली ना. दर एकलो आपले पत्ते छातयेक चिकटून दवरपाक येसस्वी जाला आनी एकमेकां वयलो अविस्वास हेंच ताच्या फाटलें कारण आसतलें होच निश्कर्श जायत्या जाणांनी काडला. ‘सबका प्रयास, सबका अविश्वास’ होच लिपिल्लो नारो आसल्यार फुडले बसकेंतल्यान कांय ठोस घडटलें हाची आस्त बाळगुवपाक मेळची ना. तीन वरांचे बसके उपरांत जर आमी सगल्यांनी एकठांय येवपाचें थारायलां हेंच पोकळ विधान संयोजकांनी करचें हाचेंय अजाप दिसलें. बसका तर तेच खातीर आपयल्ली न्हय? मागीर तुमी वेगळें अशें कितें सांगलें अशें कोणूय म्हणटलो.
बिहाराचे मुख्यमंत्री नितीशकुमार हांणी बसकेचे संयोजक ह्या नात्यान सगल्यांची बरी सरबराय केली तरी ही बसका येसस्वी करपा खातीर तांणी मात्शे चड यत्न केल्ले जाल्यार ती विरोधी एकवटा खातीर खरी उपलब्दी थारपाक शकताशिल्ली. आम आदमीचे अरविंद केजरीवाल हांणी बसकेचे पयलींच आपलो पवित्रो जाहीर केल्लो. तें मतींत घेतल्यार केजरीवाल आनी राहुल गांधी वा मल्लिकार्जुन खर्गे हांकां थोड्या वेळा खातीर काय जायना एकठांय हाडप गरजेचें आशिल्लें, पूण अहंकाराक लागून राहुल गांधीन केजरीवाल हांच्या वांगडा च्या घेतलो ना आनी जेवणा वेळारूय चर्चा करपाक न्हयकार दिलो. हातूंतल्यान जें जावपाचें तेंच जालें. केजरीवाल आनी तांचो पंजाबाचो मुख्यमंत्री भगवंत मान बसका सोडून गेले. विरोधकां मदल्या एकवटाचो मार्ग कितलो खडतर आसतलो असोच संदेश तातूंतल्यान मेळ्ळो. विरोधी एकवटा खातीर हाचे फुडें बसका जातल्यो तातूंत आम आदमी पार्टी नासतली अशें सांगत केजरीवाल हांणे ताच्या मनांतली खदखद उक्तायिल्ल्यान पयलेच बसकेचें तें अपेस थारलें आनी नितीशकुमार हांकांच ताची जापसालदारी घेवची पडली. केजरीवाल हांची समजूत काडून तांचेर एकवटाच्या यत्नाची थोडी तरी जापसालदारी घाल्ल्यार घडये सध्या जें चित्र दिसता ताचे परस मात्शें वेगळें कितें तरी दिसताशिल्लें. ‘आप’ आतां राष्ट्रीय पक्ष जाला. काँग्रेसाची सुवात आपूणूच घेवपाक शकता हो तांचो समज पंजाबांतल्या तांच्या येसान चड घट्ट जावप अपेक्षीतूच आशिल्लें. अशा वेळार फकत केंद्राच्या अध्यादेशाक लागून तांची अडचण जाली आनी विरोधी एकवटाचो वांटो जावपाक तांकां हयकार दिवचो पडलो. आतां केजरीवाल हांच्या पक्षाक भायर दवरून विरोधकांच्या एकवटाचें कशें जातलें आनी जालेच जाल्यार त्या डळमळीत एकवटांतल्यान विरोधकांचें अपेक्षीत वा निर्धारीत लक्ष्य हातासप शक्य जातलें, ह्या प्रस्नाची जाप ‘ना’ हीच आसा.
लोकसभेची वेंचणूक स- सात म्हयन्यांचेर आयल्या तरी ताचे पयलीं नोव्हेंबर मेरेन मध्यप्रदेश, छत्तीसगड, राजस्थान आनी तेलंगणा ह्या चार राज्यांनी विधानसभा वेंचणुको जावपाच्यो आसात. ते खातीरूय विशिश्ट अशें धोरण तयार करपाची गरज आसतना विरोधी पक्ष एकवटा विशीं जाय ती उमेद दाखयनात अशेंच सध्याच्या तांचे बॉडी लँग्वेजींतल्यान दिसता. लोकसभे खातीर एकठांय लडपाचें आनी विधानसभा वेंचणुकांनी मात एकमेकांचो गळो धरपाचें अशें जावपाक शकनाशिल्ल्यान ताचेर कितें तो समंजसपणा दाखोवन तोडगो काडपाची गरज आसा. काँग्रेस पक्षान आतां आमी भाजपाक टक्कर दिवपाक शकनात हें मानून घेतलां. आनी ते खातीर तांकां हेर विरोधी पक्षांचो वांगड जाय. मात कांय फावट पोरण्या वैभवाची याद करून आनी कर्नाटकांतलें तांचे हालींचें येस तांकां अशें काय करपा पसून आडायता तर नासतलें असोय प्रश्न पडटा. काँग्रेस नेतृत्व ताकाच लागून एकवटा विशीं अजून जाय ती उमेद दाखयतना दिसना. विरोधक एकठांय येतात काय तसो आभास तयार करतात हेंच कळना. मात दुसरे वटेन भाजपाच्या लिपचोरयां मजत करपी पक्षांचो आंकडो वाडत आसा, हाचीय दखल तांकां घेवचीच पडटली. भारताक जी 20 चें मेळिल्लें येजमानपद आनी प्रधानमंत्री नरेंद्र मोदी हांची येसस्वी अमेरिका भोंवडी हाका लागून भाजप नेटांत आशिल्ल्याचें चित्र सगळे कडेन दिसता. अश्या वेळार ‘सबका प्रयास, सबका अविश्वास’ हेच सूत्र घेवन विरोधक एकवटा खातीर फुडें वतले जाल्यार तें तांचे खातीर धोक्याचें थारपाक शकता.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
