भांगरभूंय | प्रतिनिधी
पणजीः सप्टेंबरांत राज्यांत फक्त 4 डेंग्यू दुयेंती सांपडले. जानेवारी ते सप्टेंबर 2024 वर्साचे तुळेंत 2025 वर्साच्या पयल्या णव म्हयन्यांत डेंग्यू दुयेंतीचो आंकडो सुमार स पटींनी उणो जाला. जानेवारी ते सप्टेंबर 2024 मेरेन राज्यांत 442 डेंग्यू दुयेंती मेळ्ळे. जाल्यार 2025 वर्सा त्याच णव म्हयन्यांत 73 डेंग्यू दुयेंती सांपडले. भलायकी खात्यान दारांतल्यान दारांत केल्ली तपासणी आनी हेर खात्यांक दिल्ल्या जागृताय मोहिमेक लागून फाटल्या वर्साचे तुळेंत अंदूं उणे दुयेंती मेळ्ळे अशी म्हायती राष्ट्रीय व्हॅक्टर बोर्न दुयेंस नियंत्रण कार्यावळीचे उपसंचालक डॉ. महात्मे हांणी सांगलें.
जानेवारी 2025 वर्सा राज्यांत 7, फेब्रुवारींत 9, मार्चांत 7, एप्रीलांत 6, मे म्हयन्यांत 4, जूनांत 10, जुलयांत 13 आनी ऑगस्टांत 13 दुयेंती सांपडले. सप्टेंबरांत डेंग्यू हॉटस्पॉट मानपी उत्तर गोंयांत एकूय दुयेंती मेळूंक नाशिल्लो. मडगांव, कुडचडें, कासावली आनी लोटली हांगा दरेकीं एक दुयेंती सांपडलो. भलायकी खात्यान दरेका सरकारी कार्यालय, शाळा आनी निवासी सोसायटीक डेंग्यू जळारांचें प्रजनन जावचें न्हय हे खातीर नोडल अधिकारी नेमपाची सुचोवणी केल्ली. हाचे वरवीं ह्या अधिकाऱ्यांनी जागो निवळ उरचो हाची खात्री करची पडली. कोयर एकठांय करपाक भलायकी खात्याक मजत करपाची सुचोवणी पंचायत खात्यान सगल्या पंचायतींक दिली.
ह्या दोनूय सुचोवण्यांक लागून भलायकी खात्याच्या कर्मचाऱ्यांचेर अंदूं अतिरिक्त कामाचो भार उणो जालो. ताका लागून तांकां दारांतल्यान दारांत वचून तपासणी करपाक, वखदां फवारपाक, जागृताय मोहीम करपाक आनी हॉट स्पॉट वाठारांचेर चड लक्ष दिवपाक मेळ्ळें. अंदूं राज्यांत सुमार पांच हजार जागृताय मोहीम सुरू जाल्यात. एक हजारां परस चड सुवातेर फवारणीी केल्या. भोंवतणची सुवात निवळ दवरल्यार आनी घरांत, फ्रिजाच्या सकयल आनी खंयच्याय सुवातेर उदक सांचून उरचें ना हाची खात्री केल्यार डेंग्यू जळारांचें प्रजनन उणें जावन दुयेंतींची संख्या आनीक उणी जावंक शकता अशें डॉ. महात्मे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
