भांगरभूंय | प्रतिनिधी
लोकसभा वेंचणूक फुडल्या एप्रील वा मे म्हयन्यांत जातली. ताचे उपरांत जुलयांत नवें सरकार अर्थसंकल्प सादर करतलें. काल जालो तो अंतरीम अर्थसंकल्प. तातूंत कितें म्हारग वा सवाय जावंक ना. कर सवलतूय तशीच आसा. उदरगतीचो आढावो, येवजण्यांचों नियाळ, विस्तार, फुडाराच्यो घोशणा हाचेरूय अर्थसंकल्पाचो भर दिल्लो जाणवता. ताचेर सगल्यांनीच मतां दिल्यांत. पूण तटस्थ, अभ्यासू मतां तशीं उणींच आसात. सरकाराचे घटक, समर्थक हांकां अर्थसंकल्प बरो दिसला. विरोधी पक्ष आनी तांच्या समर्थकांक तातूंत त्रुटी दिसल्यात. लोकसभा वेंचणुके पयलीं पक्षांतरां जावन विरोधांतलें सरकार पक्षान आयले जाल्यार तांचें अर्थसंकल्पा विशींचें मत बदलतलें आनी सत्तेचें कदेल सोडून विरोधांत वचप्यांक दोन म्हयन्यां पयलीं बरो दिशिल्लो अर्थसंकल्प सारको ना हाचो साक्षात्कार जातलो. अर्थांत हाकाच लोकशाय म्हणटात आनी सगल्या भारतीय राजकारण मोगींनी हो ‘विचार बदल, नवीं तत्वां’ मानून घेतल्यांत. सर्वसामान्यांक कितें म्हारग जालें, सवाय जालें आनी इन्कम टॅक्स हाचे भायर कांयच पडिल्लें नासता.
पर्यटनाच्या मळार येवजण्यो जाहीर जाल्यात, त्यो गोंया खातीर म्हत्वाच्यो. दर्यावेळ पर्यटना वांगडा हेर पर्यटन थळां, धर्मीक पर्यटनाकूय बळगें दिवचें पडटलें. उद्देगां खातीरूय येवजण्यो आसात. पूण त्यो चालीक लागप आनी ते खातीर वेळार निधी मेळप गरजेचें. अंदूं 4708 कोटी मेळटले. पोरूं परस 445 कोटी चड. तरणाट्यांची आवड नदरे मुखार दवरून गोंयांत आयटी आनी हेर उद्देजकांची गुंतवणूक जातली हाचेर भर दिल्यार बरो. मुळाव्या सुविधांतूय सुदारणा जाय. तें चड गरजेचें. बरे रस्ते तशेंच उदक, वीज चोवीस वरां मेळत, हेर सेवा, सुविधा तत्पर आसल्यार गोंयांत उद्देगांची रांक लागतली.
बँकेच्या पासबुकार कॅरी फाॅरवर्ड अशें बरोवपाची पद्दत आसता. अर्थसंकल्पांतूय तशें आसूंक फावो. म्हणल्यार आदल्या अर्थसंकल्पांत केल्ल्यो घोशणा, येवजण्यो चालीक लागल्यात काय त्यो फक्त उदकांतले बुडबुडे थारल्यात, हाचो नियाळ घेवंक फावो. विरोधकांच्या मतान, कांय वर्सां पयलीं वर्साक दोन कोटी नोकऱ्यो दिवपाची घोशणा जाल्ली. पूण तिका 50 टक्के पसून येस मेळूंक ना. शेतकारांचें उत्पन्न दुपेटीन वाडोवपाची घोशणा जाल्ली…. आदल्या अर्थसंकल्पांतल्यो येवजण्यो बरे तरेन चालीक लावपाचे यत्न केन्नाय करूं येतात. अर्थसंकल्पांत 18 लाख कोटी रुपयांची तूट आसा. फुडाराक ती वाडत वतली. ताचेर मात करपाक खासा धोरण आखचें पडटलें.
आमी भारतीय संवेदनशील, खूब कश्ट करपी. विदेशांतल्या व्हडल्या कंपनींचेर भारतीयांचो शेक चलता. पूण, हाचेच वांगडा आमचे मदले बरेच जाण सपनां पळोवपी, तीं साकार जातलीं हाची वाट देखपी. पूण, हात- पांय हालोवपी न्हय. कोणेंय सपनां दाखयलीं कांय आमच्या ह्या भावराती मुंगेरीलालांक खोशेचो उमाळो येता. तीं सपनां खरीं करपाक आमी सगल्यांनी मेळून एकवटान वावुरपाक जाय हें तांकां होलमना. ‘लडने को तुम, खाने को हम’, ही वृत्ती उदरगतीक फोंडांत घालूंक शकता. 25 वर्सां कित्याक, योग्य मार्गार योग्य पद्दतीन चल्ल्यार आमची अर्थवेवस्था 10 वर्सां भितर उणीच तिसऱ्या नंबराचेर पावूंक शकता. 2047 मेरेन भारत विकसीत राष्ट्र जातलें, अशी आस्त ह्या अर्थसंकल्पाक लागून दिसता, अशें संरक्षण मंत्र्यान म्हणलें. हें सपन साकार करपाक जागे जावन घाम गळोवचो पडटलो. अनुदान, सवलती अर्थांत ‘रेवड्यो’ बंद जाल्यार ह्या सपनाक बळगें मेळूं येता.
ह्या अर्थसंकल्पांत कितें आसा? आयकर सवलत आसा तशीच आसा. कितेंच म्हारग जावंक ना आनी सवायूय जावंक ना. सुर्योदय येवजणे वरवीं 1 कोटी घरांचेर सौर पॅनल बसयतले. ताका लागून दर म्हयन्याक प्रत्येक घराक 300 युनिटां मेरेन लायट मेळटली. वर्साक 15 हजारां वयर वांटावतले. मत्स्य संपदा येवजणे वरवीं निर्गत दुपेट वाडून 1 लाख कोटींचेर पावतली. 55 लाख तरणाट्यांक रोजगार मेळटलो. थेट कर, जीएसटींत बरीच वाड जाल्या. 2019 सावन आयात देंवल्या. भलायकेच्या मळार गर्भाशयाच्या कॅन्सरा पसून चलयांक वाटावपाक 9 ते 14 वर्सांच्या चलयांक वासीन दितले. तें खंय 90 टक्के प्रभावी. संवसारांत दरवर्सा तीन लाख बायलांक ह्या रोगान मरण येता. बायलांक अर्थीक नदरेन सक्षम करपाक लखपती दीदी येवजण सुरू केल्या. तिचे वरवीं आपमजत गटाच्या दोन कोटी बायलांक रोजगारा खातीर प्रशिक्षण दितले. डिसेंबर 2025 मेरेन लाखांनी बायलो कोट्याधीश जातल्यो, असो हावेस अर्थसंकल्पांत उक्तायला.
विरोधक म्हणटात, अर्थसंकल्पांत जें कितें मांडलां तातूंत धोरणात्मक अशें कांय ना. फाटल्या 10 वर्सांत अर्थीक मळाचेर दिल्लीं आस्वासनां पूर्ण जावंक नात. कुछ तो लोग कहेंगे, लोगों का काम है कहनाँ, अशें म्हणून हें सोडून दिवचें न्हय. अर्थसंकल्प पुराय आनी येसस्वीपणान चालीक लागलो हें दरेकल्याक दाखोवचेंच.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
