भांगरभूंय | प्रतिनिधी
सद्याची वेवस्था धर्म आनी राश्ट्राचेर जावपी हल्ल्यांक तोंड दिवंक शकनाशिल्ल्यान सनातन राश्ट्राची गरज आसा. देशाची उदरगत फक्त जीडीपी वा तंत्रगिन्यानाक लागून न्हय, तर धर्माक लागून जाता.
सनातन धर्म होच भारताचो प्राण. जो मेरेन सनातन धर्म पाळटात, तो मेरेन भारत गिरेस्तकायेचे तेंगशेर आशिल्लो; पूण फाटल्या कांय दशकांत सनातन धर्माक मुद्दाम हेटाळणी, दुस्वासी नदरेन लोक पळोवपाक लागले. ताका लागून जायते कुटुंबीक, मानसीक, समाजीक, धर्मीक आनी राश्ट्रीय संकश्टां निर्माण जालीं. आयज सनातन धर्म सोंपोवपाचो विडो उखलून जायत्यो व्यक्ती आनी संघटना कार्यरत जाल्यात. एका तेजस्वी राष्ट्राची निर्मिती फकत सनातन धर्माच्या बळग्या वरवींच शक्य आसा. ह्याच कारणाक लागून फोंडेंच्या फर्मागुडी अभियांत्रिकी महाविद्यालयाच्या मैदानांत 17 ते 19 मे मेरेन ‘सनातन राष्ट्र शंखनाद’ महोत्सव आयोजीत केला.
सनातन तत्वां न्याय, समता, नीतीशास्त्र, योग, आध्यात्मिक साधना हांचेर आदारिल्लीं आसात. हाचें तत्वगिन्यान वेद, उपनिषद, गीता, रामायण, महाभारत, ज्ञानेश्वरी आदीं पुर्विल्ल्या धर्मग्रंथांनी आसा. सनातन राष्ट्र हें ह्या तत्वांचेरुच आदारिल्लें आदर्श कल्याणकारी राष्ट्र आसतलें. थोड्या उतरांनी, त्रेतायुगाच्या रामराज्याचें कलियुगांतलें स्वरूप म्हणल्यार ‘सनातन राष्ट्र’ म्हणूं येता.
सद्याचे लौकिक वेवस्थेंत आधुनिकता, अभिव्यक्ती स्वातंत्र्याच्या नांवान सनातन श्रद्धास्थानांची बदनामी करप सुरू जालां. हिंदू धर्मीक परंपरा आनी प्रथांक अंधश्रद्धा अशें ‘लेबल’ लावपाक लागल्यात. वैदिक शास्त्राचेर स्युडो सायन्स अशी टिका जावंक लागल्या. देवी मानतात ती बायल आयज सुरक्षीत ना. कुटुंबा भितर लेगीत मोग आनी आत्मीयताय उणी जाल्या. व्यक्ती भौतिक नदरेन गिरेस्त जाल्या तरी मानसीक नदरेन दुबळी जाल्या; संकश्टांक तोंड दिवपाची तांक लोकांक ना अशें दिसता. हाचें मुखेल कारण म्हणल्यार धर्मीक आनी आध्यात्मिक आचरणाच्या बळग्याचो उणाव.
धर्माचेर जावपी हल्ल्या आड जागृताय जाल्या आनी ताची राखण करपा खातीर चळवळी सुरू जाल्यात, तरी हिंदू धर्माचेर जावपी हल्ले थांबूंक नात. ‘प्लेसीस आॅफ वर्शिप अॅक्ट ह्या काळ्या कायद्यांक लागून परकी आक्रमकांनी नश्ट केल्ल्या देवळांची पुनर्बांदणी करपाक आडखळ येता. आयज घुस्पागोंदळाच्या गंभीर संकश्टाक लागून जायते प्रदेश भारतांतल्यान वेगळे जावपाचे वाटेर आसात. सद्याची वेवस्था धर्म आनी राश्ट्राचेर जावपी हल्ल्यांक तोंड दिवंक शकनाशिल्ल्यान सनातन राश्ट्राची गरज आसा. देशाची उदरगत फक्त जीडीपी वा तंत्रगिन्यानाक लागून न्हय, तर धर्माक लागून जाता.
सनातन संस्थेचे संस्थापक सच्चिदानंद परब्रह्म डाॅ. आठवले हांणी 27 वर्सां आदीं सनातन हें उतर सोडात, पूण हिंदू हो शब्द उचारप पसून धाडस मानताले, त्या काळांत ईश्वरी राज्याची स्थापना हो ग्रंथ बरोवन अध्यात्माचेर आदारिल्ली राष्ट्ररचणूक ही संकल्पना मांडली.
सनातन संस्थेचो रुप्यां महोत्सव आनी सच्चिनानंद परब्रह्म डॉ. आठवले हांचो जल्मोत्सव ह्या निमतान ‘सनातन राष्ट्र शंखनाद’ हो फक्त धर्मीक, संस्कृतीक कार्यक्रम न्हय तर तो धर्म आनी आमचें राष्ट्र राखणेच्या वाटचालींतलो एक म्हत्वाचो पांवडो. भारताच्या सोबीत फुडाराचो हो शंखनाद. ह्या निमतान सनातन धर्माचे सेवेंत सक्रीय आसप म्हणल्यार एके तरेन राष्ट्रनिर्माणाच्या आनी धर्मसंस्थापनेच्या कार्यांत वांटेकार जावप. सद्याच्या काळांतली ही साधनाय आसा.
7775858387
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
