भांगरभूंय | प्रतिनिधी
इंडियन प्रिमियर लिगेंत (आयपीएल) काल जाल्ले मॅचींत सनरायझर्स हैदराबादान चेन्नय सुपर किंग्साक 5 विकेटींनी हारायलो. हैदराबादान पयलेच खेपे चेपॉक मैदानाचेर जैत जोडलें. हाचे आदीं ताका एकदाय चेन्नयच्या घरच्या मैदानाचेर जैत जोडपाक जमूंक नाशिल्लें. दुसरे वटेन चेन्नय सुपर किंग्सान घरच्या मैदानाचेर सेगीत चवथी हार घेतली.
चेन्नय सुपरकिंग्सान 155 धांवड्यांची मोख दिल्ली हैदराबादान ही मोख 18.4 ओव्हरींनी 5 विकेटी व्हगडावन मेळयली. इशान किशनान सगल्यांत चड 44 धांवड्यांची खेळी केली.
हाचे आदीं सनरायझर्स हैदराबादाचो मुखेली पॅट कमिन्सान टॉस जिखून चेन्नय सुपर किंग्साक पयलीं बॅटींग करपाचें आमंत्रण दिलें. चेन्नय वतीन युवा खेळगडो शेख राशिद आनी आयुष म्हात्रे हांणी डावाची सुरवात केली. पूण, डावाच्या पयल्याच बॉलाचेर मोहम्मद शमीन 20 वर्सां पिरायेच्या शेख राशिदाक बाद केलो. स्लिपांत उबो आशिल्ल्या अभिषेक शर्मान ताची कॅच धरली. पूण, उपरांत सॅम करनान आयुष म्हात्रेक बरी साथ दिली. आयुषान आक्रमक खेळ कायम दवरिल्लो. दुसरे वटेन 5वे ओव्हरींत सॅम करनाक (9) हर्षल पटेलान बाद केलो. अनिकेत वर्मान ताची कॅच धरली. फुडले ओव्हरींत आयुषाची आडखळ हैदराबादाचो मुखेली पॅट कमिन्सान पयस केली. इशान किशनान ताची कॅच धरली. आयुषान 19 बॉलांनी 6 चवक्यां सयत 30 धांवड्यो केल्यो.
उपरांत रवींद्र जडेजा आनी डेवाल्ड ब्रेव्हिस हांणी डाव सांबाळपाचो यत्न केलो. ब्रेव्हिसान सुरवातीक संयमान बॅटींग केली. ताची भागिदारी रंगता अशें दिसता आसतना जडेजाक कामिंडू मॅण्डिसान 10वे ओव्हरींत बोल्ड केलो. जडेजान 21 धांवड्यो केल्यो.
ते उपरांत शिवम दुबे हो ब्रेव्हिसाची साथ दिवपाक आयलो. ह्या वेळार ब्रेव्हिसान टॉप गियर घालें आनी मॅण्डिसान घाल्ले डावाचे 12वे ओव्हरींत तीन सके मारून धांवगती वाडयली. पूण, मॅण्डिसान फुडले ओव्हरींत बदलो घेतलो. हर्षल पटेलाचे ओव्हरींत मॅण्डिसान ब्रेव्हिसाची जबरदस्त कॅच धरली. ब्रेव्हिसान 25 बॉलांनी एक चवको आनी चार सक्यां सयत 42 धांवड्यो केल्यो.
दुबेक लेगीत व्हड खेळी करपाक जमली ना. तो 12 धांवड्यो करून बाद जालो. उपरातं बॅटिंगेक आयिल्ले महेंद्रसिंग धोनी (6), अंशुल कंबोज (2) आनी नूर अहमद (2) सवाय भितर बाद जाले. अखेरेक दीपक हुडा आनी खलील अहमद हांणी चेन्नयक 150च्या मुखार व्हेलो. अखेरचे ओव्हरीच्या पांचव्या बॉलाचेर दीपक हुडा (22) बाद जालो. अभिषेक शर्मान ताची कॅच धरली. अशे तरेन चेन्नयचो डाव 19.5 ओव्हरींनी 154 धांवड्यांचेर सोंपलो.
हैदराबादा वतीन हर्षल पटेलान चार ओव्हरींनी 28 धांवड्यो दिवन 4 विकेटी घेतल्यो. मुखेली कमिन्सान चार ओव्हरींनी 21 धांवड्यो दिवन 2 विकेटी घेतल्यो. जयदेव उनाडकटान 2 विकेटी मेळयल्यो. मोहम्मद शमी आनी कामिंडू मॅण्डिस हाका एकेक विकेट फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
