सनरायझर्स हैदराबाद फायनलींत

भांगरभूंय | प्रतिनिधी

सनरायझर्स हैदराबादान इंडीयन प्रिमीयर लिगेचे फायनलींत सुवात मेळयली. ताणें क्वॉलिफायर दोनांत राजस्थान रॉयल्साक 36 धांवड्यांनी हारयलो. हैदराबाद स वर्सांनी फायनलींत खेळटलो. ताच्या मुखाल बळिश्ट कोलकाता नायट रायडर्साचें आव्हान आसतलें. क्वॉलिफायर एक मॅचींत हे दोनूय पंगड एकामेका आड खेळिल्ले.

हैदराबादाच्या जैताचें स्रय शाहबाज अहमद आनी अभिषेक शर्मा ह्या स्पिनरांक वता.

यशस्वी जयस्वाल आनी टॉम कोह्रेर कॅडमोर (10) हांणी सादूर सुरवात केल्ली. पूण, पॅट कमिन्सान ही जोडी फोडली. यशस्वी 21 बॉलांनी 42 धांवड्यो करून बाद जालो. स्पिनरांक मजत करपी खेळपट्टीचेर कमिन्सान रणनिती बदल्ली. शाहबाज अहमदान यशस्वीक बाद केल्या उपरांत अभिषेक शर्मान ताणें आपले पयले ओव्हरींत संजू सॅमसनाक (10) बाद केलो. ते उपरांत शाहबाजान एकेच ओव्हरींत दोन धपके दीत रियान पराग (6) आनी आर आश्विन (0) हांकां बाद केले. अभिषेकान उत्कृश्ट बॉलाचेर शिमरोन हेटमायराक (4) बोल्ड केलो.

राजस्थानाक निमाण्या 24 बॉलांनी 63 धांवड्यांची गरज आशिल्ली. ते उपरांत नटराजनान स्लो बॉलाचेर रोव्हमन पॉवेलाक (6) बाद करून हैदराबादाक जैताच्या हुमऱ्यार हाडून दवरलो. 12 बॉलांनी 52 धांवड्यो अशें कठीण आव्हान राजस्थाना मुखार आशिल्लें. ध्रुव जुरेल ही एकूच राजस्थाना खातीर आस्त बाकी आशिल्ली. ध्रुवान 26 बॉलांनी अर्द शेंकडो पुर्ण केलो. अखेरेक राजस्थानाक 7 विकेटी व्हगडावन 139 धांवड्यो करप शक्य जाल्यो.

ते आदीं राजस्थान रॉयल्साचो मुखेली संजू सॅमसनान आंखिल्ले सगले डावपेच येसस्वी थारले. ट्रॅण्ट बोल्टान अपेक्षीत सुरवात करून दितना पय्लया दोन स्पेलांनी तीन विकेटी घेतल्यो. राहुल त्रिपाठी आनी ट्रॅव्हिस हेड हांणी संघर्श केलो. पूण, सनरायझर्स हैदराबादाचे बॅट्समन राजस्थानाच्या जाळ्यांत सहज आडकले.

युजवेंद्र चहलाची शॉर्ट थर्ड सुवातेर कॅची धरपाचो सराव जालो. ताणें तीन कॅची धरल्यो. आवेश खानान सेगीत दोन बॉलांचेर धपके दिवन हैदराबादाचे अडचणीत आनीक वाड केली. हॅन्रीच क्लासेनाच्या अर्द शेंकड्याचे खेळीक लागून हैदराबादाक आव्हानात्मक स्कोर उबो करपाक शक्य जाल्यो. संदीप शर्मान दोन विकेटी घेवन आपल्या पंगडाक हातभार लायलो.

राजस्थानान टॉस जिखून हैदराबादाक पयलीं बॅटींग करपाचें आमंत्रण दिलें आनी बोल्ट परतून एकदा मुखेल्याच्या विस्वासाचेर खरो थारलो. बोल्टान ताच्या पयल्या स्पेलांत तीन ओव्हरींनी 32 धांवड्यो दिवन 3 विकेटी घेतल्यो. ताणें अभिषेक शर्माक (12) पयल्याच बॉलाचेर बाद केलो. राहुल त्रिपाठीन हैदराबादाची धांवसंख्या वाडयिल्ली. पूण, बोल्टान ताका लेगीत तंबूंत धाडलो. राहुलान 15 बॉलांनी पांच चवके आनी दोन सक्यांचे मजतीन 37 धांवड्यो केल्यो. तेच ओव्हरींत एडेन मार्करमाक (1) बोल्टान बाद केलो.

हैदराबादान पावर प्लेंत 3 बाद 68 धांवड्यो केल्यो. अंदूंच्या हंगामांत बोल्टान पावर प्लेंत सगल्यांत चड 12 विकेटी घेतल्यो. आयपीएलाच्या इतिहासांत पावर प्लेंत सगल्यांत चड विकेटी घेवपाचो विक्रम भुवनेश्वर कुमाराच्या नांवाचेर आसा. ताणें 71 विकेटी घेतल्यात. बोल्ट (62) दुसरे सुवातेर आसा.

मजगतीं, संयमान बॅटींग करपी ट्रॅव्हिस हेडान आक्रमक बॅटींग करपाक सुरवात केली आनी हैदराबादाची धांवांची गती कायम राखतना 10 ओव्हरींनी 4 बाद 99 धांवड्यो करून दिल्यो. संदीप शर्मान 10वे ओव्हरीचो निमाणो बॉल फिशालकायेन स्लो घालो आनी चहलान थर्ड मॅन वाठारांत कॅच धरली. ट्रॅव्हिस 34 धांवड्यो करून बाद जालो आनी हॅन्रीच क्लासेना वांगडा ताची 42 धांवड्यांची (30 बॉल) भागिदारी फुटली. 14वे ओव्हरींत आवेश खानाच्या बॉलाचेर रिव्हर्स शॉर्ट मारपाच्या यत्नांत नितीश कुमार रेड्डीन (5) शॉर्ट थर्डाचेर चहलाक कॅच दिली. आवेश खानान फुडल्या बॉलाचेर अब्दुल समदाक बोल्ड केलो. 120चेर सवी विकेट पडल्या उपरांत हैदराबादान शाहबाज अहमदाक इम्पॅक्ट प्लेयर म्हणून मैदानांत देंवयलो.

हैदराबादान 15 ओव्हरी मेरेन 6 बाद 132 असो स्कोर केलो. चहलान चार ओव्हरींनी 34 धांवड्यो दिल्यो. पूण, ताणें तीन म्हत्वाच्यो विकेटी घेतल्यो. क्लासेनान अखेरच्या ओव्हरींनी आक्रमक बॅटींग सुरू केली आनी 35 बॉलांनी आपलो अर्द शेंकडो पुर्ण केलो. फाटले मॅचींतलो मॅन ऑफ द मॅच पुरस्कार मेळोवपी आर आश्विन म्हारग थारलो. ताणें 43 धांवड्यो दिल्यो. 19वे ओव्हरीच्या पयल्या बॉलाचेर संदीप शर्मान उत्कृश्ट यॉर्कराचेर क्लासेनाक (50) बोल्ड केलो.

क्लासेन आनी अहमद हांणी 25 बॉलांनी 43 धांवड्यांची भागिदारी केली. बोल्टान 45 धांवड्यो दिवन 3 विकेटी घेतल्यो. संदीपान 25 धांवड्यांनी 2 विकेटी घेतल्यो. आवेशान 20वे ओव्हरींत फकत 7 धांवड्यो दिल्यो आनी हैदराबाद 9 बाद 175 मेरेन पावलो. शाहबाज 18 धांवड्यांचेर कॅच बाद जालो. आवेशान 27 धांवड्यो दिवन 3 विकेटी घेतल्यो.