भांगरभूंय | प्रतिनिधी
पणजी : सनबर्न ईडीएम फेस्टीव्हल अंदूं गोंयांत न्हय जाल्यार मुंबय जातलो. 19 ते 21 डिसेंबराक हो तीन दिसांचो म्युझीक फेस्टीव्हल आयोजीत करतले, हे विशीं आयोजकांनी बुधवारा जारी केल्ल्या अधिकृत निवेदनांत ही म्हायती दिली. गोंयांत खूबश्या पांवड्या वयल्यान जावपी विरोध आनी प्रशासनी आडमेळ्यांक लागून हो निर्णय घेतिल्ल्याचें सांगलें.
हे फाटभुंयेर पर्यटनमंत्री रोहन खंवटे हांणी स्पश्ट केलें, सनबर्न ही खासगी कार्यावळ आनी ती गोंयांत आयोजीत करची काय ना, हो निर्णय आयोजकांचोच आसा. तशेंच सरकारान हातूंत हस्तक्षेप करपाची गरज ना. गोंय हें देशांतलें आघाडेचें पर्यटनस्थळ आनी ते खातीर नाका जाल्ले जायरातीची गरज ना. गोंयांत खूबश्या सर्जनशील उपक्रमां वरवीं पर्यटन धोरण चालीक लायतात. हातूंत थळावी संस्कृती, पर्यावरण सांबाळपाचेर भर दितात.
मजगतीं, गोंयांत खूबश्या सुवातांचेर व्हडा प्रमाणांत जावपी वेवसायीक कार्यावळीं विशीं सभापती रमेश तवडकार हांणी आपली भुमिका परतून एक फावट स्पश्ट केली. सनबर्ना सारकिल्ल्यो वेवसायीक कार्यावळी उत्तर गोंयांतूच योग्य आसात, दक्षीण गोंयान आपली परंपरा, सांस्कृतीक वळख सांबाळ्ळ्या. दक्षीण गोंय हें गोंयचें सांस्कृतीक केंद्र. हाका लागून हांगा परंपरीक मुल्यां सयत कार्यावळ आयोजीत जावपाक प्राधान्य दिवचें, अशें तवडकार हांणी मुखार सांगलें. तांचो विरोध एकाद्या विशिश्ट फेस्टीव्हला कडेन न्हय, जाल्यार पुराय धोरणात्मक दिश्टीकोनांतल्यान आसा, अशेंय तांणी स्पश्ट केलें. गोंयची संस्कृती सांबाळप आनी पर्यटनाचे उदरगतींत समतोल राखपाच्या मुद्या वयल्यान परत एक फावट गोयांत खूब व्हड चर्चा जाली. सनबर्नच्या स्थलांतरा उपरांत गोंयाच्या हेर व्हड इव्हेंट्सां वांगडाय योग्य ती भुमिका घेवची, अशें मत विवीध पांवड्यां वयल्यान उक्तायतना दिसलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
