भांगरभूंय | प्रतिनिधी
गोंयांत सध्या पर्यटन तेंगशेर पावलां. येरादारीची कोंयडी सोडयत- सोडयत दर्यादेग वाठारांत गेल्यार पर्यटनाक कितलो ओतो आयला ताचें दर्शन जातलें. ‘अभी तो पार्टी शुरू हुई है’ म्हणटात, ते भशेन पावला पावलाक पार्ट्यो सुरू जाल्यात खऱ्यो, पूण सगल्यांत व्हडली पार्टी ‘सनबर्न’ जावपाची आसा. हौशी पर्यटक तातूंत रंगून, बुडून वतले. हे व्हडले पार्टेची जायरात पुराय भारत आनी विदेशांतूय जाल्या. वागातोरा जावपी सनबर्न महोत्सवाक 28 ते 30 डिसेंबर मेरेनूच परवानगी दिल्या, अशें सरकार सांगता. मात, तो 31 डिसेंबर मेरेन चलतलो, अशें आयोजकांच्या वॅबसायटीचेर आनी हेर कांय कडेन पळोवंक मेळटा. चार दिसांचें बुकिंगूय जालां. नेमकें कितें तें कळना. सरकार म्हणटा, ‘फक्त तीन दिसां खातीर परवानो दिला. कोणेतरी दिशाभूल करपी खबर वॅबसायटीचेर दिल्या. आमी तांकां नोटीस धाडून जाप मागल्या!!’ तिकेटी पयलींच विकल्यात आनी 31 डिसेंबराक सनबर्न जावंक ना, जाल्यार ती पर्यटकांची दिशाभूल केल्ले सारकी जावचीं ना? ताका लागून सरकारी यंत्रणेक ते दीस ही कार्यावळ जावची ना, हो संदेश संवसाराच्या खाची- कोनशांनी पावोवचो पडटलो. एक वर्सा सनबर्न जावचें ना, अशें जाहीर जाल्लें, पूण उपरांत तें गुपचूप जाल्लें, हाचीय यंत्रणांक याद आसतलीच!
हालींच गोंयच्या मुंबय उच्च न्यायालयान पोरुंचो सनबर्न बेकायदेशीर आशिल्लो, अशें म्हणिल्लें. कोणाचेर कारवाय बी जाल्ल्याचें आयकूंक येवंक ना. न्यायालयानूच समिती स्थापन करून महोत्सवा विशीं निर्णय घेवचो, अशें सांगलां. तशेंच हेर कांय मार्गदर्शक तत्वांय घालून दिल्यांत. रातचें आवाजाचें प्रदुशण जावचें ना, हाचीय जतनाय घेवंक सांगल्या. सनबर्ना खातीर सरकारान खाशेले पुलीस पंगड तयार केल्यात. तशेंच ताच्या आयोजनाचेर बारीकसाणेन नदर दवरपाक उंचेली समितीय स्थापन केल्या. मात, वॅबसायटी वयले जायरातीक लागून सदचे प्रमाण हो महोत्सव जावचे पयलींच वादांत सांपडला.
31 डिसेंबराक कांय कडेन नव्या वर्सा निमतान रातच्यो धर्मीक कार्यावळी आसतात. प्रार्थना जातात. घरगुती सुवाळेय आसतात. ते रातीं सनबर्न कार्यावळ दवरल्यार थळाव्यांक त्रास जातलो. आवाजाचें प्रदुशण जातलेंच, पूण येरादारीची कोंयडीय जातली, अशी भिरांत थळाव्यांनी उक्तायल्या. ताका लागून 31 वेर सनबर्न दवरचो न्हय, अशें तांणी सांगिल्लें. कांय आमदारांनीय तशी मागणी केल्ली. उपरांत सरकारान ती मानून घेतली. ताका लागून ते रातीं महोत्सव जाल्यार तेय अस्वस्थ जावपाची घडये शक्यताय आसा. ह्या महोत्सवाच्या आड बऱ्योच संघटणा आसात. त्यो न्यायालयांत गेल्यात. मात, तांचो खर विरोध आसा, हें अजून तरी जाणवूंक ना. तांच्या मतान, असल्या व्हडल्या महोत्सवांनी बेकायदेशीर गजाली जातात. सरकाराची येणावळ बुडोवपाचोय प्रकार जाता. ह्या महोत्सवांनी घुंवळे वखदां घेवपाचे प्रकार घडटात. कारण काळजाचो आताक येवन कांय जाणांक मरण येवपाचे प्रकार हाचे आदीं घडल्यात. हे खेपे घुंवळे वखदांचो वापर जावचो न्हय म्हूण खाशेले पुलीस पंगड तयार केल्यात. साद्या कपड्यांतले पुलीस कर्मचारी थंय दवरपाक जाय. सगले कडेन सीसीटीव्ही कॅमेरे लावपाक जाय. ड्रग्स विकपी गर्दुल्यांक ह्या महोत्सवा पसून पयस दवरल्यार बरें. पर्यटन खात्यान काल रातीं महोत्सवा खातीर 28 अटी घाल्यात. सिगार, घुंवळे वखदांचेर कडक बंदी आसतली. अश्लील कृत्य करपाक मेळचें ना. येरादारीची वेवस्था करची पडटली. आवाजाचेरूय नियंत्रण दवरचें पडटलें. रातीं 10 वरांचेर आवाज बंद करपाक सांगलां. अर्थात हाचेर नदर दवरपाक समिती, पुलीस पंगड आसात. ह्या अटींक आयोजक पाळो दितात काय नात, तें सनबर्न महोत्सव सुरू जातलो तेन्ना कळटलेंच.
गोंय पर्यटन राज्य आशिल्ल्यान असले महोत्सव दर शेनवार- आयतार जाले म्हूण कोण हरकत घेवचो ना. मात, ते घुंवळे वखदां पसून पयस आसचे, सोऱ्याच्यो न्हंयो व्हांवच्यो न्हय, आवाज उणो आसचो आनी तो रातीं 10 वरांचेर पुराय बंद जावचो. येरादारीची कोंयडी जावची न्हय. मुखेल म्हणल्यार थळाव्या लोकांक, खास करून दुयेंतींक, भुरग्यांक, मोनजातीक त्रास, मनस्ताप जावचे न्हय… आनी ते महोत्सव हप्ते पुंजोवपाची आयती संद थारचे न्हय!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
