भांगरभूंय | प्रतिनिधी
पणजी : सनबर्न महोत्सवाक लागून गोंय सरकाराक शुल्कांतल्यान 2 कोटी 27 लाख 15 हजारांची येणावळ मेळटली. हे भायर आयोजक कंपनीक 1 कोटी 99 लाख 65 हजारांचें डिपोझीट दवरचें पडटलें. महोत्सवा उपरांत डिपोझीट कंपनीक परत मेळटलें.
सनबर्न महोत्सवा खातीर कंपनीक 1,92,50,000 शुल्क फारीक करचें पडटलें. हाचेर 3,46,5000 इतलो जीएसटी फारीक करचो पडटलो. हे सगळे मेळून 2 कोटी 27 लाख 65 हजार रुपया जातात. गोपां कडल्यान ही म्हायती मेळ्ळ्या. पर्यटना विशींचे उच्चाधिकार समितीन सशर्त मान्यताय दितना हें शुल्क लागू केलां.
धारगळ पंचायतीन मान्यताय दिले उपरांत सनबर्न महोत्सवाक पर्यटन खात्यान तत्वता मान्यताय दिल्या. 28 ते 30 डिसेंबर मेरेन हो महोत्सव जातलो. कोविडाचो काळ सोडलो जाल्यार गोंयांत दर वर्सा वर्स सोंपपाक सनबर्न महोत्सव जाता. अंदूंय तो जातलो.
सगळे परवाने घेवपाची जापसालदारी आयोजक कंपनीची आसा. पंचायतीच्या ना हरकत दाखल्या सयत हेर सगळे परवाने घेवचे पडटले. सगळे परवाने घेतल्या उपरांतूच मान्यताय निश्चीत जातली. हाचे पयलीं बरीच वर्सां गोंयांत सनबर्न महोत्सव जाला. सनबर्न महोत्सवाक लागून पर्यटन संबंदांतल्या वेवसायांक लाव जाता. परवाने घेवन आनी शिस्तींत महोत्सव जावपाक कांयच हरकत ना, अशी सरकाराची भुमिका आसा. सनबर्न आयोजन करपी स्पेसबावंड वॅब लॅबस प्रायव्हेट लिमिटेड कंपनीन परवान्या खातीर 13 नोव्हेंबराक पर्यटन खात्या कडेन मान्यताये खातीर अर्ज केल्लो. पर्यटना विशींचे उंचेल्या पावंड्या वयल्या समितीन बसका घेवन मान्यताय दिवपाची शिफारस केली. हे शिफारशी उपरांत पर्यटन खात्यान मान्यताय दिल्या. मुंबय उच्च न्यायालयान लेगीत महोत्सवाक सशर्त मान्यताय दिल्या. धारगळ ग्रामसभेंत सनबर्नाक विरोध करपी थाराव संमत जाल्लो. ह्या थारावाक स्पेसबावंड कंपनीन आव्हान दिलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
