भांगरभूंय | प्रतिनिधी
आमदार प्रवीण आर्लेकारः भितर घुसून महोत्सव बंद उडोवपाची शिटकावणी
भांगरभूंय । प्रतिनिधी
पेडणें: सनबर्न महोत्सवाक आपलो विरोध ना, पूण तो पेडणें मतदारसंघांतले धारगळ पंचायत वाठारांत मातूय नाका. तो आपूण जावपाक दिवचो ना. ज्या दिसा तो जातलो त्या दिसा कितें जातलें तें गोंयकारांक ते उपरांतूच कळटलें, अशी शिटकावणी पेडणेंचे आमदार प्रवीण आर्लेकार हांणी दिल्या.
पेडणें मतदारसंघांतले सरपंच, उपसरपंच, पंच, नगरसेवक हांचे वांगडा आर्लेकार हांणी 4 डिसेंबराक जोडबसका घेतिल्ली. बसके उपरांत ते पत्रकारां कडेन उलयताले. त्या वेळार तांणी वयली शिटकावणी दिली.
धारगळे सनबर्न जावचो अशें दिसता तांणी आनी जांकां तो नाका तांणी आपलें मत सांगचें, अशें आर्लेकार हांणी बसकेंत सांगलें. ह्या वेळार बसकेक हाजीर आशिल्ल्या सगळ्यांनीच सनबर्न महोत्सवाक आपलो खर विरोध उक्तायलो. आमी सगळे आमदारा वांगडा आसात. आमदार जेन्ना सनबर्ना आड रस्त्यार देंवतलो तेन्ना तांचे वांगडा आमीय रस्त्यार देंवतले, अशें तांणी जाहीर केलें.
हे बसकेक आदलो जिल्हो पंचायत वांगडी तुकाराम हरमलकार, धारगळचे आदले सरपंच तशेंच सध्याचे पंच भूषण उर्फ प्रदीप नायक, आदले सरपंच अनिकेत सागावकार, मोपाचे सरपंच सुबोध महाले, तोरशेची सरपंच छाया शेट्ये, नगरसेविका अश्विनी पालयेंकार, नगरसेविका तृप्ती सावळ, वजरीची आदली सरपंच संगिता गांवकार, प्रकाश कांबळी, पोरस्कडेची सरपंच दिप्ती हळदणकार, नगरसेविका तृप्ती सावळ आनी हेर पंच हाजीर आशिल्ले.
पत्रकारांक म्हायती दितना आर्लेकार हांणी सांगलें, सनबर्न जाय काय नाका ह्या संबंदांत बसका आयोजीत केल्ली. तातूंत सगळ्यांनीच सनबर्नाक विरोध केला. जर महोत्सव जालोच जाल्यार भितर घुसून आपूण तो बंद उडयतलों, हें तांणी परतून एकदां सांगलें. आपणें दिल्लें उतर अखेर मेरेन पाळटा, अशेंय तांणी स्पश्ट केलें.
भूषण नायक हांणी सांगलें, धारगळ पंचायतीन परवानगी दिली म्हूण कांय जायना. सनबर्न मुळांत धारगळकारांक नाका. फक्त पांच पंच वांगड्यांनी सनबर्न जाय न्हूण परवानगी दिल्या, धारगळकार हे कशेंच सोंसून घेवचे नात. ह्या प्रकरणांत आमी सर्वोच्च न्यायालयांत लेगीत वचपाची तयारी दवरल्या.
तुकाराम हरमलकार हांणी सांगलें, सनबर्न आदीं जातालो थंय मुजरत करचो, पूण तो धारगळे मात नाका. सनबर्न महोत्सवाक लागून धारगळकाराक आनी पेडणेंकारांक कसलो फायदो जातलो, हें आदीं सरकारान पेडणेंकारांक सांगचें. गरजेभायर नाका आशिल्ले वेवसाय पेडणेंकारांच्या माथ्यार थापूं नाकात, अशी मागणी प्रकाश कांबळी हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
